Zeremi 30 - WẼNNAAM SEBRE 2014

Kãab-noog Israyɛll nebã yĩnga

¹ Sẽn-Ka-Saab yeela a Zeremi yaa:

² Maam a Sẽn-Ka-Saab sẽn yaa Israyɛll Wẽnnaamã yetame: «Gʋls bũmb nins mam sẽn yeel foomã sebr pʋgẽ.

³ Maam a Sẽn-Ka-Saab yetame: ‹Wakat n wate, tɩ mam na n maneg Israyɛll ne Zʋʋda nebã yellã tɩ lebg sõama. Mam na n tall-b lame n lebg n wa tẽng ning mam sẽn dag n kõ b yaab-rãmbã pʋgẽ, tɩ b soog-a.› Yaa maam a Sẽn-Ka-Saab n yeele.»

⁴ Ad goam nins Sẽn-Ka-Saab sẽn gom Israyɛll ne Zʋʋda nebã wɛɛngẽ:

⁵ Sẽn-Ka-Saab yetame: Tõnd wʋmda bʋrg sẽn wat ne yɛɛsgo. Yaa rabeem bala, vɩ-bãan ka leb n be ye.

⁶ M kotame tɩ y sok n gese, rao rogdame la? La yaa bõe tɩ m neẽ tɩ raopã fãa teeg b seese, wa pag sẽn kũmd dogem? Bõe yĩng tɩ b fãa nensã pelge?

⁷ Kayto! Ra-kãng na n yɩɩ ra-kãsenga, na n yɩɩ daar sẽn ka wẽnd a taaba. Na n yɩɩ toog daar a Zakoob yagensã yĩnga, la b na n paama fãagr n yi a pʋgẽ.›

⁸ Saasẽ-Pãng-Soabã yetame: «Badaare, mam na n kaoo balgr ning sẽn be bãmb yublẽ wã, mam na kaoo b loetsã. Bãmb ka na n leb n tʋm sãamb yĩng ye.

⁹ Bãmb na n tʋma maam a Sẽn-Ka-Saab sẽn yaa bãmb Wẽnnaamã, ne a Davɩɩd mam sẽn na n yãk t'a yɩ bãmb dĩmã yĩnga.

¹⁰ Sẽn-Ka-Saab leb n yetame: ‹La foom a Zakoob sẽn yaa mam tʋmtʋmdã, da zoe rabeem ye! Israyɛll nebã, da bas-y tɩ y pɛleng yɩk ye! Bala, mam na n fãaga yãmb tẽn-zãrg ning y sẽn beẽ wã, la m fãag y yagensã tẽng ning b sẽn be yembd pʋgẽ wã. Israyɛll nebã na n lebg n waame, la b na n leb n zĩnda yam-gãneg ne vɩ-bãan pʋga, la ned kõn zĩnd sẽn na n kẽes-b rabeem ye.

¹¹ Bala, mam bee ne yãmba, n na n fãag-yã. Mam na n sãama buud nins fãa mam sẽn dig yãmb tɩ y sãeeg n be b sʋkã, la m ka na n sãam yãmb ye. M na n demsa yãmb ne tɩrlem, m ka na n bas-y taal n ka sɩbg-y ye. Maam a Sẽn-Ka-Saab n yeele.»

Poglg maagre

¹² Maam a Sẽn-Ka-Saab yetame: «Yãmb sãmpogrã ka tõe n maag ye. Yãmb poglgã ya n zabda hal wʋsgo.

¹³ Ned ka be n sõngd yãmb ye, Ned ka be n na n tɩp y nodrã ye. Tɩɩm ka be yãmb yĩng ye.

¹⁴ Neb nins fãa sẽn dag n nong yãmbã yĩma y yelle, n ka leb n baood y zĩig ye. Bala, mam wẽe yãmb wa bɛ sẽn wẽed to-to wã. Mam sɩbga yãmb sɩbg-toaaga, yãmb kongrã sẽn waoogã yĩnga, yãmb yel-wẽnã sẽn yaa wʋsgã yĩnga.

¹⁵ Bõe yĩng tɩ y kelemd y sãmpogrã yĩnga? Bõe yĩng tɩ y kelemd y poglgã sẽn ka maagdã yĩnga? Mam maan-y-la woto, y kongrã sẽn waoogã yĩnga, y yel-wẽnã sẽn yaa wʋsgã yĩnga.

¹⁶ Yaa rẽ n kɩte, tɩ neb nins fãa sẽn sãamd-b yãmbã na n sãame. Sẽn kis-b yãmbã fãa na n kẽnga yembdo. Sẽn namsd-b yãmbã na n paama namsgo, la mam na n basame tɩ b fã sẽn fãad-b yãmbã fãa.

¹⁷ Mam na n lebs n manega yãmb yellã, mam na n maaga y poglgã. Maam a Sẽn-Ka-Saab n yeele. B boonda yãmb tɩ b sẽn dig-b rãmbã, n yetẽ tɩ Sɩyõ nebã yaa neb b sẽn ka leb n baood b zĩig ye.»

B lebs n manega nebã yelle

¹⁸ Ade, maam a Sẽn-Ka-Saab yetame: «Mam na n lebs n manega a Zakoob yagensã fu-rot nins sẽn sãamã. Bãmb rotã nimbãaneg tara maam. B na n lebs n mee bãmb tẽmsã b raboodã zĩigẽ, la b lebs n me b ro-neebã b zĩ-kʋdẽ wã.

¹⁹ Bãmb na n yɩɩla pẽgr yɩɩla. B na n wʋma bãmb laad be. Mam na n kɩtame tɩ b fɩɩg n lebg wʋsgo, la bãmb sõorã kõn leb n boog ye. Neb a taabã na n waooga bãmba, b kõn leb n paoog bãmb ye.

²⁰ Bãmb kambã na n leb n yɩɩ wa b sẽn dag n yaa-a soab pĩndã. Bãmb na n leb n tigma taab mam taoore. Mam na n sɩbga neb nins fãa sẽn namsd bãmbã.

²¹ Bãmb sʋkã ned a yembr n na n yɩ b naaba. Sẽn na n soog-a bãmbã na n yɩɩ bãmb buudã neda. Mam na n kɩtame tɩ yẽnda kolg maam, la yẽnda na n kolga maam, bala, ned ka na n saag n kolg maam, tɩ sã n ka maam n bool-a soab ye. Maam a Sẽn-Ka-Saab n yeele.

²² Yãmb na n leb n yɩɩ mam neba, la mam na n yɩɩ yãmb Wẽnnaam.

²³ Ade, yaa Sẽn-Ka-Saab sobg n fugdi. A fugda hal wʋsgo, a bee nin-wẽnsã zut n gõnemdẽ.

²⁴ Sẽn-Ka-Saab sũurã ka na n sigi, tɩ b ka maan b sẽn datã, la b pids b saagrã ye. Wakatã sã n ta, yãmb na n wʋma bõn-kãng võore.»