Zeremi 3 - WẼNNAAM SEBRE 2014

Pʋg-yoodr sũur sẽn diglme

¹ Maam a Sẽn-Ka-Saab yetame: «Ned sã n dig a pag tɩ ned a to rɩk-a, a sɩdã tõe n leb n peeg-a lame sɩda? A sã n leb n peeg-a, a ka na n dẽgem tẽngã zãng sɩda? La yãmb a Israyɛll nebã, yãmb maana wa pʋg-yoodr sẽn tar dolsen-dãmb wʋsgo. Yãmb na n lebg n waa mam nengẽ sɩda?

² Zẽk-y y nens n ges tãn-bɛɛlã zutu. Rẽ yĩnga, tãng bee bãmb sʋkã yãmb sẽn ka maan wa yoaadb a zug sɩda? Yãmb yasa sor noor n gũud y rolsen-dãmba, wa Araab sẽn gũud neb we-raoog pʋgẽ. Yãmb dẽgma tẽngã ne y yoobã, la ne y wẽngã maanego.

³ Yaa woto n kɩt tɩ saag ka ni sigri, la sẽoog me ye. La baoosgo, yãmb nensã yaa wa pʋg-yoodr nenga. Yãnd ka tar yãmb ye.

⁴ La moasã, yãmb saag n boonda maam tɩ y ba, la y zoa meng hal y yãadem wakate,

⁵ la y yetẽ: Bãmb na n pa b sũ-yikrã pʋg wakat fãa bɩ? Bãmb sũur na n kell n yika ne tõnd n ka basdẽ bɩ? Yaa woto la yãmb dag n gomda, la y baas n ket n maand wẽnga, la y sɩd tõogame me!»

Israyɛll ne Zʋʋda maana wa pʋg-yoodre

⁶ Rĩm a Zoziyaas zamaanẽ, Sẽn-Ka-Saab yeela maam yaa: «Fo yãnda Israyɛll nebã sẽn maan wa pʋg-yoodrã bɩ? Bãmb basa maam n dʋ tãms nins fãa sẽn yaa lug-lugã zutu, la b kẽng tɩɩs nins fãa sẽn tar maasmã tẽngre, n tɩ maan yoobo.

⁷ La mam dag n tagsame tɩ b sã n maan yõwã fãa n sɛ, b na n lebgame n wa mam nengẽ, la bãmb ka lebg n wa ye. La bãmb saam-biisã sẽn yaa Zʋʋda nebã sẽn yaa zãmb dãmbã yãnda bãmba.

⁸ Baa ne mam sẽn dig Israyɛll nebã b yoobã fãa yĩng n kõ-b basg sebrã, mam yãame tɩ Zʋʋda nebã sẽn yaa bãmb saam-biisã sẽn yaa zãmb dãmbã ka tol n zoe rabeem ye. Bãmb me kẽnga be n tɩ maan yoobo.

⁹ Bãmb maana yoob ne kug la raad tɩ yaa n loog nugu, n dẽgem tẽngã.

¹⁰ La ne rẽ fãa, Zʋʋda nebã sẽn yaa Israyɛll nebã saam-biisã sẽn yaa zãmb dãmbã ka lebg n wa mam nengẽ ne b sũyã fãa ye. B rag n ka be sɩdã pʋg ye. Maam a Sẽn-Ka-Saab n yeele.»

¹¹ Sẽn-Ka-Saab yeela maam yaa: «Baa ne Israyɛll nebã sẽn yaa yoaadbã sẽn bas maamã, bãmb tɩrlem n baas n yɩɩd Zʋʋda nebã sẽn yaa zãmb dãmbã.»

¹² Bãmb yeela maam tɩ m kẽng n zẽk m koɛɛg n tees rɩtg sẽnẽ, n togs gom-kãensã: «Israyɛll nebã sẽn yaa yoaadba, lebg-y n wa-y-yã! Bala, mam ka na n leb n gãnem m neng ne yãmb ye. Mam yaa nonglem soaba. Mam sũur ka na n yik n ka sigd ye. Maam a Sẽn-Ka-Saab n yeele.

¹³ Sak-y n deeg-y bal tɩ y kongame. Yaa Sẽn-Ka-Saab sẽn yaa yãmb Wẽnnaamã la y zãgs yã. Yãmb kẽngame n tɩ waoog bu-zẽms wẽnnaam-dãmb tɩɩs sẽn tar maasem tẽngre, n ka kelg mam goamã ye. Maam a Sẽn-Ka-Saab n yeele.»

Zeruzalɛm tigingu

¹⁴ Maam a Sẽn-Ka-Saab yetame yaa: «Kom-wegemse, lebg-y n wa-y-yã, bala yaa maam la y soaala. Mam na n yãka nin-yɛng-yɛng tẽng fãa pʋgẽ, la neb a yiib-yiib buud fãa pʋgẽ, n tall n kẽng Sɩyõ.

¹⁵ Mam na n kõo yãmb taoor dãmb sẽn ta m yam tɩ b soog-y ne bãngre, la ne yam-sõngo.»

¹⁶ Maam a Sẽn-Ka-Saab yetame yaa: «Yãmb sã n lebg wʋsg n dog kamb tẽn-kãng pʋgẽ wakat-kãense, b ka na n leb n gom y kaoolã koglgã yell ye. Bãmb ka na n tags a yelle, wall b tẽeg a yell ye. B ka na n bao-a, wall b maan a to ye.

¹⁷ Wakat-kãnga, b na n boola Zeruzalɛm tɩ ‹Sẽn-Ka-Saab naam geere.› Bu-zẽmsã fãa na n tigma be ne mam yʋʋre, la b na n basa b sũ-keglmã.

¹⁸ Wakat-kãense, Zʋʋda buudã na n naaga Israyɛll buudã, tɩ b tũ taab n yi tẽng ning sẽn be rɩtgã, n kẽng tẽng ning mam sẽn dag n kõ b yaab-rãmbã.»

¹⁹ Mam dag n nongẽ lame n geelg yãmb n naag m kambã, n kõ-y tẽng sẽn tar bõn-sõamyã, tẽng sẽn yaa buud toay-toayã fãa tẽn-neere. Mam dag n tagsame tɩ y na n boolẽ-la maam tɩ y ba, n ka wẽnemd n bas maam ye.

²⁰ La yãmb a Israyɛll nebã zãmba maam wa pag sẽn zãmb a sɩdã. Maam a Sẽn-Ka-Saab n yeele.»

²¹ B wʋmda Israyɛll neb yãbre, la b se-yõkr tãn-bɛɛlã zutu. Bala, bãmb bʋdgame n bas sorã, n yĩm Sẽn-Ka-Saab sẽn yaa bãmb Wẽnnaamã.

²² Maam a Sẽn-Ka-Saab yetame: «Yãmb a nin-tõtse, lebg-y n wa-y tɩ m kɩt tɩ y lebg sɩd dãmba.» Bãmb yeelame: «Ad-y tõndo, d wata yãmb nengẽ, bala, yãmb a Sẽn-Ka-Saab n yaa tõnd Wẽnnaam.»

²³ Sɩda, pʋʋsg ning sẽn maand kunkubã zutã, ne bʋrg ning sẽn yit tãmsã zutã yaa zĩrẽ bala. Sɩd-sɩdã, Israyɛll nebã fãagr yita Sẽn-Ka-Saab sẽn yaa tõnd Wẽnnaamã nengẽ.

²⁴ Hal tõnd yãadem wakate, yãndã sẽn yaa Baallã rɩɩ arzɛk ning d yaab-rãmbã sẽn dag n tʋm n paamã. A rɩɩ b piisã ne b niigã la b kambã.

²⁵ Bɩ d gãand d yãndã zugu, la bɩ d paoogrã pil-du. Bala, tõnd ne d yaab-rãmbã maana yel-wẽn n beeg Sẽn-Ka-Saab sẽn yaa tõnd Wẽnnaamã hal d yãadem wakat tɩ ta rũndã. Tõnd ka sak n deeg bãmb koɛɛgã ye.