Zeremi 29 - WẼNNAAM SEBRE 2014

A Zeremi gʋlsa sebr n tʋm yembsã

¹ No-rɛɛs a Zeremi zĩnda Zeruzalɛm n tʋm sebr tɩ b tɩ kõ kãsem-dãmb nins sẽn kellã ne maan-kʋʋdbã, la no-rɛɛsdbã ne neb nins fãa a Nebukatnedzaar sẽn dag n kɩt tɩ b yõg Zeruzalɛm n tall n kẽng Babilondã.

² B sẽn tʋm sebrã yɩɩ wakat ning b sẽn yiis rĩm a Zekoniya ne a ma wã, la zakã tʋmtʋmdbã, ne Zʋʋda ne Zeruzalɛm nanambsã, la tʋʋm-mitbã ne sãabã Zeruzalɛm n tall-b n kẽng yembdã zugẽ.

³ La Zʋʋda rĩm a Sedesiyaas tʋma a Safan biig a Eleyaza, ne a Hilkiiza biig a Gemariya ne sebrã tɩ b tɩ kɩs Babilond dĩm a Nebukatnedzaare. Ad goam nins sẽn be sebrã pʋgẽ:

⁴ Ad Saasẽ-Pãng-Soabã sẽn yaa Israyɛll Wẽnnaamã sẽn yet neb nins fãa bãmb sẽn dag n kɩt tɩ b yõg Zeruzalɛm n tall n kẽng yembd Babilondã:

⁵ Me-y rot n zĩnd b pʋsẽ! Sel-y tɩɩs n dɩ b biisi.

⁶ Kẽ-y kãadem n dog kamba. Bao-y pagb n kõ y kom-dibli wã, la bao sɩdb n kõ y kom-pugli wã tɩ bãmb me rog kamba. Rog-y n fɩɩg-y zĩig ning yãmb sẽn beẽ wã, la y ra bas tɩ y sõor boog ye.

⁷ Bao-y tɩ vɩ-bãan zĩnd tẽng ning mam sẽn kɩt tɩ b tall yãmb n kẽngã pʋgẽ, la y pʋʋs Sẽn-Ka-Saab a yĩnga, bala tẽngã sã n zĩ bãane, yãmb me na n zĩnda bãane.

⁸ Ad Saasẽ-Pãng-Soabã sẽn yaa Israyɛll Wẽnnaamã sẽn yeta: Da sak-y tɩ no-rɛɛsdbã ne bag-bʋgdbã sẽn be yãmb sʋkã tudg-y ye. Da rɩk-y y zãmsdã wa bũmb sẽn yaa sɩd ye.

⁹ Bala, bãmb yetame tɩ b sẽn togsd yãmb pĩnd-n-bãngr goam ninsã yaa ne mam yʋʋre, la ka sɩd ye. Ka maam n tʋm bãmb ye. Maam a Sẽn-Ka-Saab n yeele.

¹⁰ Maam a Sẽn-Ka-Saab yetame: «Yãmb sẽn na n zĩnd Babilondã sã n wa pid yʋʋm pis-yopoe, mam na n sõnga yãmba, n pids kãab-noog ning m sẽn dag n kãab yãmbã, n kɩt tɩ y lebg n wa zĩ-kãngã.

¹¹ Bala, maam a Sẽn-Ka-Saab yetame: ‹Mam mii saagr ning m sẽn saagd yãmb yĩngã. Ka saagr sẽn na n wa ne toog yãmb zug ye, yaa vɩ-bãan saagre, sẽn na n yɩlẽ tɩ y beoog vɩɩmã yɩ neere, la tɩ y paam tẽeb pidsgu.

¹² Dẽ, yãmb na n boola maam la y pʋʋs maam, la m na n leok-y lame.

¹³ Yãmb na n baoo maam, la y na n yãnda maam. Bala, yãmb na n baoo maam ne y sũyã fãa.

¹⁴ Maam a Sẽn-Ka-Saab yetame: Mam na n basame tɩ y yãnd-ma, la m na n leb n manega yãmb yellã. Mam na n kɩtame tɩ y yi soolem ninsi, la tẽms nins fãa mam sẽn dag n dig yãmb tɩ y kẽngã. Mam na n talla yãmb n lebg n wa zĩ-kãngã m sẽn dag n kɩt tɩ b yiis yãmb n tɩ kẽes yembdã.

¹⁵ Yãmb yaool n yetame tɩ Sẽn-Ka-Saab kɩtame tɩ no-rɛɛsdb gom ne yãmb Babilond tẽngã pʋga.› »

¹⁶ La ad Sẽn-Ka-Saab sẽn yeta, rĩm ning sẽn led a Davɩɩd zĩigẽ n dɩt naamã wɛɛngẽ, la nebã fãa sẽn be tẽn-kãng pʋgẽ wã, ne y saam-biisã sẽn be ne yãmb yembdã pʋgẽ wã wɛɛngẽ:

¹⁷ «Saasẽ-Pãng-Soabã yetame: ‹Mam na n tʋma zabr sʋʋg ne kom la bã-longds b yĩnga, la m kɩt tɩ b lebg wa kankam-põaas ned sẽn ka tõe n dɩ ye, b põogrã keelem.

¹⁸ Mam na n diga bãmb ne zabr sʋʋga, la kom ne bã-longdse. Mam na n kɩtame tɩ dũniyã soolem-dãmbã fãa sã n yãnd bãmb bɩ rabeem-kãseng yõk-ba. Soolem nins fãa mam sẽn na n dig bãmb tɩ b kẽngã pʋsẽ, nebã na n gesa yãmb wa kãab-beedo, wall bũmb sẽn kẽesd rabeem, wall yãnd bũmbu,

¹⁹ b sẽn ka kelg mam goamã yĩnga. Maam a Sẽn-Ka-Saab n yeele. Mam yaool n tʋma m tʋmtʋmdbã sẽn yaa no-rɛɛsdbã yãmb nengẽ n ka bas ye. La yãmb ka kelg-b ye. Maam a Sẽn-Ka-Saab n yeele.› »

²⁰ La yãmb dãmb fãa mam sẽn kɩt tɩ b yiis Zeruzalɛm n tall n kẽng yembd Babilondã, kelg-y Sẽn-Ka-Saab koɛɛgã!

²¹ Ad Saasẽ-Pãng-Soabã sẽn yaa Israyɛll Wẽnnaamã sẽn yete, a Kolaya biig a Akaab ne a Maseya biig a Sedesiyaas sẽn gom zĩrẽ pĩnd-n-bãngr goam ne mam yʋʋrã wɛɛngẽ, n yetẽ: «Mam ningda bãmb Babilond dĩm a Nebukatnedzaar nugẽ, la a na n kɩtame tɩ b pãb bãmb yãmb taoore.

²² B na n kɩtame tɩ Zʋʋda neb nins fãa sẽn be yembd Babilondã rɩk nin-bãmbã b yiibã yʋy n kãabd kãab-beedo, n yetẽ: Bɩ Sẽn-Ka-Saab maan foom wa b sẽn maan a Sedesiyaas ne a Akaab n kɩt tɩ b sẽ bãmb bugmẽ wã.

²³ Bala, bãmb maana yalem-tʋʋm Israyɛlle, n maan yoob ne b taab pagba, n yag zĩrẽ ne mam yʋʋre, tɩ mam yaool n dag n ka kõ-b noor ye. Mam mii bõn-kãnga, la m yaa kaset soaba. Maam a Sẽn-Ka-Saab n yeele.»

B gʋlsa sebr n tʋm a Semaya

²⁴ Yeel Nehelam tẽng rao a Semaya,

²⁵ tɩ Saasẽ-Pãng-Soabã sẽn yaa Israyɛll Wẽnnaamã yetame: Fo gʋlsa sɛb ne f meng yʋʋr n tʋm tɩ b tɩ kõ Zeruzalɛm nebã fãa, ne maan-kʋʋd a Sofoni sẽn yaa a Maaseya biigã, la maan-kʋʋdb a taabã. Ad goam nins fo sẽn gʋls seb-kãens pʋsẽ:

²⁶ «Sẽn-Ka-Saab yãka foom tɩ f yɩ maan-kʋʋd n led maan-kʋʋd a Zehozada zĩigẽ, tɩ fo tõe n gũ Sẽn-Ka-Saab roogã, tɩ ned ning fãa sẽn zʋbsd n togsd pĩnd-n-bãngr goamã, bɩ f kɩt tɩ b sẽb a soab ne bãense, la b balg a yublã ne kutu.

²⁷ La yaa bõe tɩ fo ka tãs Anatot rao a Zeremi sẽn maand a meng no-rɛɛs yãmb sʋkã?

²⁸ Yẽnda tol n tʋma neb tõnd nengẽ Babilond ka, tɩ b wa togs tõnd koe-kãnga: Yãmb na n zĩnda yembdã pʋg n kaoose! Me-y rot n zĩnd be! Sel-y tɩɩs n dɩ b biisi!»

²⁹ Maan-kʋʋd a Sofoni karma seb-kãng n kõ no-rɛɛs a Zeremi.

³⁰ La Sẽn-Ka-Saab yeela a Zeremi yaa:

³¹ Tʋm tɩ b tɩ yeel neb nins b sẽn yõg n tall n kẽng Babilondã yaa: Ad Sẽn-Ka-Saab sẽn yete, Nehelam tẽng rao a Semaya wɛɛngẽ: A Semaya togsa yãmb pĩnd-n-bãngr goam n dat tɩ yãmb teeg zĩrẽ, tɩ m yaool n ka tʋm-a ye.

³² Woto yĩnga, ad maam a Sẽn-Ka-Saab sẽn yeta: Nehelam dao a Semaya sẽn maan tɩ nebã kɩɩs Sẽn-Ka-Saabã yĩnga, mam na n sɩbga yẽnda ne a yagensã. Yẽnda buudã ned ba a yembr ka na n zĩnd nin-bãmbã sʋk ye. Yẽnda ka na n yãnd maan-neer ning mam sẽn na n maan m nebã ye.