Zeremi 26 - WẼNNAAM SEBRE 2014

B baooda a Zeremi n dat n kʋ

¹ A Yoyakim biig a Zoziyaas sẽn yaa Zʋʋda rĩmã naamã sɩngre, Sẽn-Ka-Saab goma ne a Zeremi n yeele:

² «Maam a Sẽn-Ka-Saab yetame: ‹Kẽng n tɩ yals Sẽn-Ka-Saab roogã zak pʋga, n gom ne neb nins fãa sẽn yit Zʋʋda soolem tẽmsẽ wã fãa, n wat n wõgemded maam a Sẽn-Ka-Saab roogẽ wã, n togs bãmb goam nins fãa mam sẽn yet foomã, n da bas ba a yembr ye.›

³ Daarninga, b na n kelgame tɩ b ned kam fãa bas a manesem-wẽngã. Sã n yɩ a woto, mam na n basa wẽng ning m sẽn dag n saagd n dat n maan-b b tʋʋm-wẽnsã yĩngã.

⁴ Yeel-b tɩ maam a Sẽn-Ka-Saab yetame: ‹Yãmb sã n ka sak n kẽn wa sẽn zems mam tõogã m sẽn kõ yãmbã,

⁵ la y ka kelg mam tʋmtʋmdbã sẽn yaa no-rɛɛsdbã mam sẽn tʋm yãmb nengẽ naoor wʋsg tɩ y ka kelg-bã,

⁶ mam na n maana ro-kãngã wa m sẽn maan Sɩlo wã, la m kɩt tɩ tẽn-kãngã lebg kãab-wẽnga, buud nins fãa sẽn be dũniyã zugã yĩnga.› »

⁷ Maan-kʋʋdbã ne no-rɛɛsdbã la nebã fãa wʋma a Zeremi sẽn gomd gom-kãensã Sẽn-Ka-Saab roogã pʋgẽ wã.

⁸ La a Zeremi sẽn gom goam nins fãa Sẽn-Ka-Saab sẽn yeel yẽnda t'a togs nebã fãa wã n sɛ, maan-kʋʋdbã ne no-rɛɛsdbã la nebã fãa yõka yẽnda n yeel-a yaa: «Fo na n kiime!

⁹ Bõe yĩng tɩ fo togsd pĩnd-n-bãngr goam ne Sẽn-Ka-Saab yʋʋre, n yetẽ tɩ ro-kãngã na n yɩɩ wa Sɩlo, tɩ la tẽn-kãngã na n lebga raboog tɩ ned ka leb n zĩnd a pʋgẽ?» Dẽ, nebã fãa gũbga a Zeremi Sẽn-Ka-Saab roogã pʋgẽ.

¹⁰ Zʋʋda nanambsã sẽn wʋm bõn-kãnga, b yii rĩmã zakẽ n kẽng Sẽn-Ka-Saab roogẽ wã, la bãmb zĩnda Sẽn-Ka-Saab zakã rignoor ning b sẽn boond tɩ rigno-paallã.

¹¹ Dẽ, maan-kʋʋdbã ne no-rɛɛsdbã goma ne nanambsã la nebã fãa n yeel-b yaa: «Rao-kãngã toga ne kũum, bala, a togsa pĩnd-n-bãngr gom-toos sẽn kẽed ne tẽn-kãngã wɛɛngẽ, wa yãmb sẽn wʋmã.»

¹² La a Zeremi yeela nanambsã fãa ne nebã fãa yaa: «Yaa Sẽn-Ka-Saab meng n tʋm maam tɩ m wa togs pĩnd-n-bãngr goam nins fãa yãmb sẽn wʋme, sẽn kẽed ne ro-kãngã la tẽn-kãngã wɛɛngẽ wã.

¹³ Moasã, bɩ y tek y yel-manesmã ne y tʋʋmã. Kelg-y Sẽn-Ka-Saab sẽn yaa yãmb Wẽnnaamã koɛɛgã, tɩ b bas toog ning b sẽn dag n saagd n na n kɩt tɩ wa yãmb zugã vaale.

¹⁴ Sã n yaa sẽn kẽed ne mam wɛɛngẽ, ade, mam bee y nugẽ. Maan-y sẽn ta yãmb yam, la sẽn zems y nifẽ.

¹⁵ La bãng-y tɩ y sã n kʋ maam, mam zɩɩmã raagr taal na n zĩnda y zugu, la tẽn-kãngã ne a nebã me zugu. Bala, yaa Sẽn-Ka-Saab n sɩd tʋm maam tɩ m wa togs yãmb gom-kãensã fãa.»

¹⁶ Dẽ, nanambsã ne nebã fãa yeela maan-kʋʋdbã ne no-rɛɛsdbã yaa: «Rao-kãngã ka tog ne kũum ye. Bala, yaa ne Sẽn-Ka-Saab sẽn yaa tõnd Wẽnnaamã yʋʋre, la a gom ne tõndo.»

¹⁷ Tẽngã kãsem-dãmb kẽer yikame n yeel nebã fãa yaa:

¹⁸ «Wakat ning a Ezekɩyaas sẽn dag n yaa Zʋʋda rĩmã, Moresɛt dao a Miise rag n togsa Zʋʋda nebã fãa pĩnd-n-bãngr goam n yeele: ‹Ad Saasẽ-Pãng-Soabã sẽn yeta: Sɩyõ na n lebga wa pʋʋg b sẽn gudgi. Zeruzalɛm na n lebga raboogo, la tãng ning Sẽn-Ka-Saab roogã sẽn be-a zugã na n lebga kãgre.›

¹⁹ Dẽ yĩnga, Zʋʋda rĩm a Ezekɩyaas ne Zʋʋda nebã fãa kʋʋ no-rɛɛs a Miise la? Ayo, rĩm a Ezekɩyaas zoee Sẽn-Ka-Saabo, n kos Sẽn-Ka-Saab tɩ b sik b sũuri. Dẽ, Sẽn-Ka-Saab basa toog ning b sẽn dag n saagd n na n kɩt tɩ wa bãmb zugã tɩ vaale. Tõnd na n maana yel-kãseng a woto n dogl yell d mens zut sɩda?»

A Yoyakim kɩtame tɩ b kʋ a Uuri

²⁰ Rao a yembr me n dag n togsd pĩnd-n-bãngr goam ne Sẽn-Ka-Saab yʋʋre. Yẽnda yʋʋr ya a Uuri, n yaa Kiryat-Yeyarim dao a Semaya biiga. A Uuri togsa pĩnd-n-bãngr gom-toos sẽn kẽed ne tẽn-kãng wɛɛngẽ, wa a Zeremi sẽn dag n togs goam ninsã.

²¹ Rĩm a Yoyakim ne a gãndaadã la a nanambsã fãa wʋma gom-kãense, la rĩmã baoome n na n kʋ a Uuri. La a Uuri sẽn wʋm dẽnda, rabeem yõka yẽnda t'a zoe n kẽng Ezɩpte.

²² Dẽ, rĩm a Yoyakim tʋma a Akboor biig a Ɛlnatan ne neb kẽer Ezɩpte.

²³ Bãmb tɩ yiisa a Uuri Ezɩpte, n tall-a n wa rĩm a Yoyakim nengẽ. La rĩmã kʋʋ yẽnda zĩig pʋgẽ ne zabr sʋʋga, n dɩk a kũumã n tɩ lob tẽngã nebã yaadẽ.

²⁴ La sã n yaa ne a Zeremi, a Safan biig a Ayikam kogla yẽnda, n ka bas tɩ nebã paam-a n kʋ ye.