Zeremi 20 - WẼNNAAM SEBRE 2014

A Zeremi namsgo

¹ A Imeer biig a Pasewʋʋr sẽn yaa maan-kʋʋda, la Sẽn-Ka-Saab roogã gũudbã naabã wʋma pĩnd-n-bãngr gom-kãensã a Zeremi sẽn togsã.

² La a Pasewʋʋr yõka a Zeremi n pãbe, n balg-a Sẽn-Ka-Saab roogã zak rignoor ning sẽn boond tɩ Benzame digno-kãsengã.

³ La vẽkembeoogo, a Pasewʋʋr baaga a Zeremi t'a Zeremi yeele: «Sẽn-Ka-Saab ka pʋd y yʋʋr t'a Pasewʋʋr ye. B pʋd-y lame t'a Magoor-Misaabe, sẽn dat n togs tɩ ‹yɛɛsg n be zĩigã fãa.›

⁴ Bala, Sẽn-Ka-Saab yetame: Mam na n kɩtame tɩ yãmb ne y zo-rãmbã fãa yɛɛse. Y bɛɛbã na n kʋʋ yãmb ne zabr sʋʋs y nifẽ. La mam na n kɩtame tɩ Babilond dĩmã wa yõg Zʋʋda nebã fãa n tall n kẽng Babilonde, la b kʋ bãmb ne zabr sʋʋga.

⁵ La bãmb na n kɩtame tɩ b bɛɛbã wʋk arzegsã fãa ne b paoongã la b te-sõamy wã fãa sẽn be tẽn-kãngã pʋgẽ wã, ne Zʋʋda rĩm-dãmbã paoongã fãa n kẽng Babilonde.

⁶ La foom a Pasewʋʋre, foom ne f zakã rãmb fãa na n kẽnga Babilond n tɩ yɩ yembse, n ki tɩ b mum yãmb be. Na n yɩɩ yãmb ne y zo-rãmb nins yãmb sẽn dag n togs zĩrẽ pĩnd-n-bãngr goamã.»

A Zeremi yẽgengo

⁷ Sẽn-Ka-Saabo, yãmb belga maam, la mam deega belgrã. Yãmb wõra maam n tõoge. Nebã laada maam daar fãa. Nebã fãa yaanda maam.

⁸ Bala, wakat fãa, mam sã n gomda, mam zẽkda m koɛɛg n yetẽ: «Wẽnga! Sãoongo!» Yãmb goamã yĩnga, mam paamda paoogr ne yaalg wakat fãa.

⁹ Mam sã n yeel tɩ m ka na n leb n togs Sẽn-Ka-Saab yelle, wall m gom ne bãmb yʋʋre, a lebgda wa bugum m sũurã pʋgẽ, a bee m kõabã pʋsẽ. Mam maoodame n dat n sĩndi, la m ka tõe ye.

No-rɛɛsã basa a meng Wẽnnaam nugẽ

¹⁰ Mam wʋmda neb wʋsg sẽn wɩt maam n yetẽ: «A ‹Yɛɛsg-n-be-zĩigã-fãa!› » Wilg-y-yã a sẽn beẽ! Wilg-y-yã a zĩiga! Mam zo-rãmbã fãa geta maam n gũud m lʋɩɩse. Bãmb yetame: «Wa-y tɩ d belg-a tɩ daarning bɩ d tõog n dok d sũur ne-a.

¹¹ La Sẽn-Ka-Saab bee ne maam wa gãndaoog sẽn tar pãnga. Rẽ n kɩt tɩ mam namsdbã na n lak n lʋɩ. Bãmb ka na n tõog maam ye. Bãmb na n dɩɩ yãnde, b sẽn ka tõogã yĩnga. Na n yɩɩ yãnd sẽn ka na n sɛ abada, hal tɩ b ka leb n tõe n yĩm a yell ye.

¹² Saasẽ-Pãng-Soaba, yãmb n feesd nin-tɩrga, yãmb n mi sẽn be ninsaal tagsgẽ la a sũurẽ. Bas-y tɩ m yãnd y sẽn na n dok y sũur ne-b to-to. Bala, mam basa m yɛlã fãa ne yãmba.

¹³ Yɩɩl-y Sẽn-Ka-Saab yĩnga, pẽg-y bãmba! Bala, bãmb fãagda nimbãan-ned nin-wẽns nugẽ.

¹⁴ Bɩ kãab-wẽng zĩnd daar ning m ma sẽn dog maamã zugu! Bɩ raarã ra zĩnd bark ye!

¹⁵ Bɩ kãab-wẽng zĩnd ned ning sẽn dag n kẽng m ba nengẽ n tɩ togs-a t'a paama bi-ribla, tɩ kiba-kãng kõ-a sũ-noogã zugu!

¹⁶ Bɩ nin-kãng yɩ wa tẽms nins Sẽn-Ka-Saab sẽn sãam n ka zoe b nimbãanegã! Bɩ a wʋm toog kelems yibeoogo, la zabr kelems wĩnto-sʋka.

¹⁷ Bõe t'a ka kʋ maam tɩ m ket m ma pʋgẽ? M ma wã pʋg n dag na n yɩẽ mam yaoogo, tɩ m kell n pa be wakat fãa.

¹⁸ Bõe tɩ m yi m ma pʋgẽ n na n yãnd toog ne sũ-sãanga, la m na n ki ne yãnde?»