Zeremi 18 - WẼNNAAM SEBRE 2014

A Zeremi kẽnga yagb nẽngẽ

¹ Sẽn-Ka-Saab yeela a Zeremi yaa:

² Yik n kẽng yagbã yir tɩ yaa beenẽ la m na n gom ne-fo.

³ Dẽ, mam kẽnga yagbã yir n tɩ yã t'a zĩ a yagd-doogẽ n yagdẽ.

⁴ Rʋk ning yagbã sẽn yagdã sãamame, la yẽnda rɩk a yagdã n leb n maan rʋk a to sẽn ta a yam.

⁵ La Sẽn-Ka-Saab soka maam yaa:

⁶ Israyɛll nebã, dẽ yĩnga, mam ka tõe n maan yãmb wa yagbã sẽn maandã sɩda? Yagdã sẽn yaa bũmb ning yagbã nugẽ wã, yãmb me yaa a woto mam nugẽ. Maam a Sẽn-Ka-Saab n yeele.

⁷ Mam sã n gom buud bɩ soolem yelle, n yeel tɩ m na n viig-a lame, la m siig-a, n kɩt t'a meneme,

⁸ t'a tek yam n bas wẽng ning a sẽn dag n maandã, mam me na n teka yam n bas wẽng ning m sẽn dag n saagd a yĩngã.

⁹ Mam sã n gom buud bɩ soolem yelle, n yeel tɩ m na n me-a lame la m tilg-a,

¹⁰ t'a kɩɩs n maan sẽn ka noom maam, mam me na n teka yam n bas maan-neer ning m sẽn dag n saagd n dat n maanã.

¹¹ La moasã, mam kota foom tɩ f yeel Zʋʋda ne Zeruzalɛm nebã yaa: Ade, Sẽn-Ka-Saab yetame: «Mam segenda toog y yĩnga, mam saagda zabr y yĩnga. Dẽ, bɩ yãmb ned kam fãa tek yam n bas a manesem-wẽnsã. Tek-y y manesmã ne y tʋʋmã!»

¹² La nebã na n yeelame: «Ra nams-y y meng ye! Tõnd ned kam fãa na n maana wa a sẽn tagsde, d na n maana wa sẽn zems d sũ-keglmã.»

Israyɛll nebã yĩma b Wẽnnaamã yelle

¹³ Woto yĩnga, Sẽn-Ka-Saab yeelame: «Sok buud a taabã n gese, ãndã n wʋm bũmb a woto? Israyɛll nebã maana wẽng wʋsgo.

¹⁴ Pĩisã sẽn be weoogẽ wã koom sɛtame sɩda? Libã tãmsã kʋɩls koom sẽn yaa maasgã kʋɩtame sɩda?

¹⁵ Mam nebã yaool n yĩma mam yelle. Bãmb yõogda wisd n kõt belgr wẽnnaam-dãmba. B belga bãmb tɩ b bʋdg n bas b kʋdem-wẽndẽ soayã, n kɩt tɩ b tũ so-bugsi, la soay sẽn ka kõoge.

¹⁶ B kɩtame tɩ bãmb tẽngã lebg zĩ-vɩʋʋgo. B kɩtame t'a lebg yɛɛsg bũmb wakat fãa. Neb nins fãa sẽn tũud be n loogdẽ wã sã n yãnd-a, b pɛleng yɩkdame tɩ b gird b zutu.

¹⁷ Mam na n kɩtame tɩ b bɛɛbã rig-b tɩ b sãeeg wa sobg sẽn yi yaang n dɩkd bũmbu. B sãoongã wakate, mam na n wẽnemda m neng n bas-ba.»

Nebã set n dat n sãama a Zeremi

¹⁸ Nebã yeelame: «Wa-y tɩ d sɩɩg taab noor n kɩt t'a Zeremi meneme! Bala, tõnd ka na n kong maan-kʋʋdb sẽn na n zãms tõndo, wall yam dãmb saglgo, wall Wẽnnaam no-rɛɛs koɛɛg ye. Wa-y tɩ d kãneg-a, la d ra kelg a sẽn togsd goam ninsã fãa ye!»

A Zeremi pʋʋsa Wẽnnaam

¹⁹ Sẽn-Ka-Saabo, kɩll-y y tʋbr n kelg-ma! Kelg-y bũmb nins m bɛɛbã sẽn yetã!

²⁰ Yel-sõmd yaood yaa beem la? Bãmb tuu bok n dat tɩ m lʋɩ a pʋgẽ. Tẽeg-y tɩ mam dag n yalsa yãmb taoore, n yõk yãmb sɛɛg bãmb yĩnga, tɩ y sũurã ra wa puug ne-b ye.

²¹ Woto yĩnga, kɩt-y tɩ kom ne zabr sʋʋg kʋ b kambã. Kɩt-y tɩ b kambã ki, la y kɩt tɩ b pagbã lebg pʋg-kõapa. Kɩt-y tɩ bã-longds kʋ b raopã, tɩ b ra-sãmbã pa tãpẽ.

²² Kɩt-y tɩ b wʋm b kelems b yiyã pʋsẽ, wakat ning b bɛɛbã sẽn na n wa ling bãmb n wʋk b teedã. Bãmb tuu bok n dat n bẽd maam, bãmb dɩgla bẽdg mam naoã sẽn na n tabgẽ wã.

²³ Sẽn-Ka-Saabo, yãmb mii saagr nins fãa b sẽn saagd n dat n kʋ maamã. Ra kõ-b sugr b yel-wẽnã yĩng ye. Ra yẽes-y bãmb yel-wẽnã ye! Bas-y tɩ b lʋɩ y nifẽ! Sɩbg-y bãmb y sũ-yikrã pʋgẽ!