Zeremi 16 - WẼNNAAM SEBRE 2014

¹ Sẽn-Ka-Saab yeela maam yaa:

² «Ra kẽ kãadem n dog kamb zĩ-kãngã ye.

³ Bala, ad bũmb nins sẽn na n paam kamb nins sẽn na n dog zĩ-kãngã, la sẽn na n paam b ba-rãmbã ne b ma-rãmbã sẽn na n dog-bã:

⁴ Bãas n na n kʋ-ba, la neb ka na n yãb b yĩnga, wall b mum-b ye. Bãmb na n yɩɩ birg tẽn-gãongã yĩnga. B na n paa tãpẽ, la kom na n kʋʋ bãmb tɩ b lebg yĩngr bõn-yɩgdɩ ne we-rũms rɩɩbo.»

⁵ Bala, maam a Sẽn-Ka-Saab yetame: «Ra kẽng ned yiri, b sẽn yãbd b ned sẽn ki yĩng ye. Ra yãb b nedã yĩnga, la ra bels-b ye. Bala, mam yiisa m laafɩ wã ne m nonglmã, la m nimbãan-zoeerã nin-bãmbã sʋka. Maam a Sẽn-Ka-Saab n yeele.

⁶ Nanambs ne nin-tals na n kii tẽn-kãngã pʋga, la b ka na n mum bãmb wall b yãb b yĩng ye. Ned ka na n bog a menga, wall a põng a zug a yĩng ye.

⁷ B ka na n naag ned ning ned sẽn ki wã n dɩ la b yũ, la b bels-a ye, baa sã n yaa a ba bɩ a ma n ki.

⁸ Ra kẽng ned yiri, a sẽn maand tigr yĩnga, n naag-a n dɩ la f yũ ye.»

⁹ Bala, ade, maam a Saasẽ-Pãng-Soabã sẽn yaa Israyɛll Wẽnnaamã yetame: «Mam na n kɩtame tɩ sũ-noog ne kɩdeng rãamde, la pʋg-paal sɩd ne pʋg-paal yɩɩl sɛ zĩ-kãngã yãmb zamaanẽ wã tɩ y yã.»

¹⁰ Fo sã n togs nin-bãmbã gom-kãensã fãa tɩ b sok foom: «Bõe yĩng tɩ Sẽn-Ka-Saab yãk yam n na n kɩt tɩ to-kãseng a woto paam-do? Tõnd beegrã yaa bõe? Bõe yel-wẽn la tõnd maan n beeg Sẽn-Ka-Saab sẽn yaa tõnd Wẽnnaamã?»

¹¹ Dẽ, bɩ f leok bãmb tɩ maam a Sẽn-Ka-Saab yetame: «Yaa yãmb yaab-rãmbã sẽn bas maam la b kɩɩs mam zãmsgã, n yaool n tũ bu-zẽms wẽnnaam-dãmb n wõgemd n waoog-bã yĩnga.

¹² La yãmba, yãmb maana sẽn yaa wẽng n yɩɩd y yaab-rãmbã. Yãmb ned kam fãa maanda wa sẽn zems a sũ-keglmã, n ka kelgd maam ye.

¹³ Mam na n diga yãmb n yiis tẽn-kãngã, tɩ y kẽng tẽng yãmb ne y yaab-rãmbã sẽn ka mi pʋga. Beenẽ, yãmb na n waoogda bu-zẽms wẽnnaam-dãmb wĩntoog ne yʋngo, bala mam ka na n leb n zoe y nimbãaneg ye.»

¹⁴ Rẽ kɩtame tɩ Sẽn-Ka-Saab yetẽ: «Wakat n wate, tɩ ned ka na n leb n wẽen ne Sẽn-Ka-Saab sẽn vɩ wã sẽn yiis Israyɛll nebã Ezɩpt pʋgẽ wã yʋʋr ye.

¹⁵ Bãmb na n wẽena ne Sẽn-Ka-Saab sẽn vɩ wã yʋʋre, soab ning sẽn yiis-a Israyɛll nebã nug-rɩtg tẽngẽ wã, la tẽms nins fãa mam sẽn kɩt tɩ b sãeeg n kẽngã pʋgẽ wã! Mam na n kɩtame tɩ b lebg n wa tẽng ning mam sẽn dag n kõ b yaab-rãmbã pʋgẽ.»

¹⁶ Maam a Sẽn-Ka-Saab yetame: «Mam na n tʋma neb wʋsg tɩ b wa yõg-b wa ned sẽn yõgd zĩm. Dẽ poore, m na n kɩtame tɩ neb wʋsg rig bãmb n yiis tãmsã fãa ne kunkubã fãa zutu, la hal baa tãmsã bogdẽ.

¹⁷ Bala mam nin geta bãmb yel-manesmã fãa, la b kongrã ka solg ne maam ye.

¹⁸ Pipi bũmbu, mam na n dola bãmb b kongrã ne b yel-wẽnã naoor a yiibu, bala bãmb dẽgma mam tẽngã, n pids m soolmã ne b yel-yoodã kũum la b tʋʋm-beedã.»

Wẽnnaam b yembr bal n yaa sɩda

¹⁹ Sẽn-Ka-Saabo, yãmb yaa mam pãnga, la m pãng zĩiga, la m zĩ-soalgdg yel-pakr wakate! Buud toay-toay na n yii dũniyã kɩremsã fãa n wa yãmb nengẽ, la b na n yeelame: Tõnd yaab-rãmbã reega zĩrẽ tɩ yaa b pʋɩɩre, la a yaa bũmb sẽn ka yõodo.

²⁰ Ned tõe n maana a wẽnnaam-dãmb n kõ a menga, tɩ b yaool n ka sɩd wẽnnaam-dãmb bɩ?

²¹ Yaa woto n kɩte, tɩ mam na n kɩt tɩ b bãng tɩ m tara noor la pãn-kãsenga. Woto, bãmb na bãng tɩ m yʋʋr yaa Sẽn-Ka-Saabo.