Zeremi 15 - WẼNNAAM SEBRE 2014

Wẽnnaam nebã sɩbgre

¹ Sẽn-Ka-Saab yeela maam yaa: «Ba a Moyiis ne a Sãmwɛll sã n wa yals mam taoore, mam ka na n zoe nin-bãmbã nimbãaneg ye. Rig-b tɩ b menem mam taoor n bao zĩiga.

² Ba b sã n sok foom tɩ yɛɛnẽ la b na n kẽnge, bɩ f leok-b tɩ maam a Sẽn-Ka-Saab yetame: Sẽn tog-a ne kũum, bɩ a ki! Sẽn tog n pa-a tãpẽ, bɩ a pa tãpẽ! Sẽn tog n ki-a kom, bɩ a ki kom! Sẽn tog-a ne yembdo, bɩ a loog yembdo!»

³ Maam a Sẽn-Ka-Saab yetame: «Mam na n sɩbga bãmb ne tood a naase: zabr sʋʋg na n kʋʋ bãmba, baas na n zendma bãmba, yĩngr bõn-yɩgdɩ ne we-rũms na n dɩɩ bãmb n kɩt tɩ b meneme.

⁴ Mam na n kɩtame tɩ dũniyã soolem-dãmbã fãa sã n yãnd bãmba, bɩ rabeem-kãseng yõk-ba, Zʋʋda rĩm a Ezekɩyaas sẽn yaa a Manaase biigã sẽn maan bũmb nins Zeruzalɛm pʋgẽ wã yĩnga.»

Sẽn-Ka-Saab yam ya n yiime

⁵ Sẽn-Ka-Saab yetame: «Zeruzalɛm nebã, ãndã n na n zoe yãmb nimbãaneg n yãb-yã? Ãnda n na n bʋdg n sok n bãng yãmb gãase?

⁶ Maam a Sẽn-Ka-Saab yetame: Yãmb basa maam, yãmb tuda maam y kudga. Woto yĩnga, mam zẽka m nug n sãamd yãmba. Mam yam ya n yii ne yãmb nimbãaneg zoeese.

⁷ Mam yelgda bãmb tẽn-kãngã rignoyẽ wã mam kʋʋ bãmb kambã, mam menesa m nebã, la bãmb ka tek yam ye.

⁸ Mam kɩtame tɩ b pʋg-kõapã sõor yɩ wʋsgo, n yɩɩd bĩisrã sẽn be ko-kãsengã noorã. Mam kɩtame tɩ sãamd wa wĩnto-sʋka, n kʋ ra-sãmbã tɩ toog ne rabeem yõk b ma-rãmb wakat a ye pʋgẽ.

⁹ Sẽn dog-a kom-dibli a yopoe wã pãng sɛɛme t'a vʋʋsem leebdẽ. A wĩndgã lʋɩɩ wĩnto-sʋka. Yãnd tar-a lame t'a zĩ ne paoogre. Mam na n basa sẽn kell-bã b bɛɛbã nusẽ tɩ b kʋ-b ne zabr sʋʋga. Maam a Sẽn-Ka-Saab n yeele.»

A Zeremi yẽgengo

¹⁰ M ma, toog bee mam zugu, fo sẽn dog maamã yĩnga! Tẽngã neb fãa zabda ne maam, la b fãa kɩɩsda maam! Mam ka tar ned samde, ned me ka tar mam samde. La b fãa yaool n kãabda maam wẽnga.

¹¹ Sẽn-Ka-Saab yetame: «Hakɩɩka, mam fãaga yãmb y na yɩ neer yĩnga. Hakɩɩka, mam zab n sõnga yãmb toog ne yel-pakr wakate.»

¹² Sẽn-Ka-Saab leb n yeelame: «Kut tõe n kaoogame sɩda? Nug rɩtg sẽnẽ kutã ne zũud tõe n kaooga nana sɩda?

¹³ Mam na n kɩtame tɩ b fã yãmb arzegsã ne y paoongã, tɩ yɩ yaood yel-wẽn nins fãa yãmb sẽn maan y soolmã fãa pʋgẽ wã yĩnga.

¹⁴ Mam na n kɩtame tɩ y lebg y bɛɛbã yembse, tẽng yãmb sẽn ka mi pʋgẽ. Bala, mam sũurã na n puuga hal wʋsgo, n dɩ yãmb wa bugum.»

¹⁵ Sẽn-Ka-Saabo, yãmb miime! Tẽeg-y m yell n sõng-ma, la y rok m sũur ne m namsdbã, n da kaoos waoong tɩ b wa maan-m wẽng ye. Bɩ y bãng tɩ yaa yãmb yĩng la mam paam paoogre.

¹⁶ Mam sẽn wʋm y goamã, m deegame. Saasẽ-Pãng-Soab a Wẽnnaam, yaa yãmb n so maam, la y goamã kõo maam sũ-noog n kɩt tɩ m kɩdemdẽ.

¹⁷ Mam ka zĩnd ne laadb n maan sũ-noog ye. Yãmb nugã modga maam tɩ m zĩnd m yembre, bala yãmb kɩtame tɩ m sũur yiki.

¹⁸ Yaa bõe tɩ m namsgã ka sɛtẽ? Yaa bõe tɩ m poglgã zabd n ka maagdẽ? Yãmb belga maam wa kʋɩlg sẽn tar koom dũndã, n ka tar koom beoog ye.

¹⁹ Woto yĩnga, maam a Sẽn-Ka-Saab yetame: «Fo sã n lebg n wa, mam na n deega foom, n kɩt tɩ f leb n yɩ m tʋmtʋmda. Fo sã n bas gom-yaals n gom gom-sõamyã, fo na n leb n yɩ m no-rɛɛsa. Yaa nebã n tog n lebg n wa fo nengẽ, ka foom n tog n lebg n bao bãmb zĩig ye.

²⁰ La nin-bãmb nifẽ, mam na n kɩtame tɩ f yɩ wa zũud lalg nebã sẽn ka tõe n sãam ye. Bãmb na n zaba ne foom, la b ka na n tõog-f ye. Bala, mam bee ne foom n na n fãag-fo, la m yols-fo. Maam a Sẽn-Ka-Saab n yeele.

²¹ Mam na n fãaga foom nin-wẽns nusẽ, mam na n yolsa foom nin-toos nusẽ.»