Zeremi 12 - WẼNNAAM SEBRE 2014

¹ Sẽn-Ka-Saabo, yãmb yaa tɩrg wʋsg ne m wa yet tɩ m tara yell ne yãmba. La baoosgo, mam dat n goma ne yãmb tɩrlem bʋ-kaoor yelle. Yaa bõe tɩ nin-wẽns paamd tõogre, tɩ sẽn zãmbd-b yãmbã me zĩ bãane?

² Yãmb sela bãmb wa tɩɩse, tɩ b kɩ yẽg n bɩ n wom biisi. Bãmb gomda yãmb yell wʋsgo, la b sũyã yaool n zãra ne yãmba.

³ La yãmb a Sẽn-Ka-Saabo, yãmb mii maam, yãmb nee maam. Yãmb feesa maam n yãnd tɩ m sũurã tagsg bee ne yãmba. Yiis-y nin-wẽnsã kɛɛng wa piis b sẽn yõg n na n tɩ kʋ. Welg-y bãmb toor kʋʋbã daar yĩnga.

⁴ Warã na n zĩnda tẽngã pʋg hal tɩ ta dabʋre? Pʋtã mood na n kʋɩta a woto hal tɩ ta dabʋre? Rũmsã ne bõn-yɩgdɩ wã kiime, tẽn-kãng nebã sẽn maan wẽng n yeel tɩ Wẽnnaam ka na n yãnd b manesmã yĩnga.

⁵ Sẽn-Ka-Saab yetame: «Fo sã n ka tõe n tũ sẽn zoet-b ne nao n zoe, fo na n maana wãn n tõog n wags ne wiidi? Fo sã n be tẽng sẽn gãe bãan pʋgẽ tɩ f yam gãe, fo na n maana a wãn moasã Zʋrdẽ kãgrã pʋgẽ?

⁶ Sɩd me, baa fo ba-biisã, fo buud meng zãmbda foom, n naagd f bɛɛbã n zabd ne-fo. B sã n wa gomd no-noom goam ne foom, bɩ f ra tẽ bãmb ye.»

Wẽnnaam basa b roogã ne b nebã

⁷ Mam basa m doogã, mam basa neb nins sẽn yaa mam soolmã. Mam basa m nin-nongdsã m bɛɛbã nugẽ.

⁸ Mam nebã sẽn yaa mam soolmã yik n zabda ne maam wa gɩgemd sẽn be kãgrẽ. Bãmb zẽkda b koɛɛg ne maam. Yaa woto n kɩt tɩ mam kisg-ba.

⁹ Dẽ yĩnga, mam nebã sẽn dag n yaa mam soolmã lebga wa luiin-gʋlem tɩ sɩlsã laand n dat n wẽ-a bɩ? Tigm-y we-rũmsã fãa gilli! Tigm-y-b n tall-b n wa tigrã zĩigẽ!

¹⁰ Rũm-kɩɩmb wʋsg tabda mam reezẽ pʋʋgã n sãamdẽ. Bãmb kɩtame tɩ pʋʋg ning mam sẽn nongã lebg we-raoogo, b kɩtame t'a lebg zĩ-vɩʋʋgo.

¹¹ B kɩtame tɩ tẽngã lebg zĩ-vɩʋʋgo. Tẽngã bee sũ-sãang pʋga. A sãamame n be mam taoore. Tẽngã fãa sãamame, la ned kae n yãbd-a ye.

¹² Sẽn sãamd-b fãa wã bee we-raoogã soayã fãa zut n watẽ. Bala, Sẽn-Ka-Saab sʋʋgã sãamda tẽngã zĩisã fãa, tɩ ned ba a yembr ka leb n tõe n vɩɩmd bãan yɛs ye.

¹³ Bãmb dag n bʋda bɩle, la b na n kẽeba gõose. B namsa b meng zaalem bala, Yãmb koodã yãnd tar-y lame, Sẽn-Ka-Saab sũ-puug-kãsengã yĩnga.

Sẽn-Ka-Saab goma ne Israyɛll yagsã

¹⁴ Ad Sẽn-Ka-Saab sẽn yet mam yag-wẽnsã fãa sẽn sãamd tẽng ning mam sẽn pʋɩ n kõ Israyɛll buudã sẽn yaa mam nebã wɛɛngẽ. Woto yĩnga, mam na n diga bãmb n yiis-b b tẽngẽ wã, la m na n yiisa Zʋʋda nebã bãmb sʋka.

¹⁵ La m sã n yiis bãmb n sɛ, m na n leb n zoee bãmb nimbãanega, n kɩt tɩ ned kam fãa leb n leb a soolmẽ, la a tẽngẽ.

¹⁶ Bãmb sã n togs m nebã n maan wa bãmba, la b sã n wẽen ne maam a Sẽn-Ka-Saab sẽn vɩ wã yʋʋr wa b sẽn dag n zãms m nebã tɩ b wẽen ne Baallã, bãmb me na n paama zĩig m nebã sʋka.

¹⁷ La b sã n ka sak n kelge, mam na n dig-b lame n yiisi, la m na n menes-b lame. Maam a Sẽn-Ka-Saab n yeele.