Zeremi 11 - WẼNNAAM SEBRE 2014

Buud sẽn ka pids a kaoola

¹ Sẽn-Ka-Saab yeela a Zeremi yaa:

² «Kelg kaool-kãngã goamã, n dɩk-b n taas Zʋʋda ne Zeruzalɛm nebã!»

³ Yeel bãmb tɩ Sẽn-Ka-Saab sẽn yaa Israyɛll Wẽnnaamã yetame: «Kãab-wẽng bee ned ning fãa sẽn ka sakd kaool-kãngã goamã zugu!»

⁴ Yaa kaool ning mam sẽn maan ne y yaab-rãmbã daar ning mam sẽn yiis bãmb Ezɩpt tẽngã sẽn dag n yaa toog wa kut boaagã. Mam yeela bãmb tɩ b kelg maam, la b maan bũmb nins fãa mam sẽn yeel-bã. Woto, bãmb na n yɩɩ mam nebã, la mam na n yɩɩ bãmb Wẽnnaam.

⁵ La m na n pidsa m wẽeneg ning mam sẽn dag n wẽen ne y yaab-rãmbã n yeel tɩ m na n kõo bãmb tẽng sẽn tar bĩisim ne sɩɩd wʋsgã. Rẽ la yãmb sẽn tar dũndã wã. La mam yeelame: «Sẽn-Ka-Saabo, bɩ y kɩt t'a yɩ woto.»

⁶ Sẽn-Ka-Saab yeela maam: «Moon gom-kãens fãa Zʋʋda tẽmsã pʋsẽ ne Zeruzalɛm soayã zutu, n yeel-b tɩ b kelg kaool-kãngã goamã n sak-ba.

⁷ Bala, mam sẽn dag n yiis y yaab-rãmbã Ezɩptã, mam keooga bãmb n ka bas ye, n yeel-b tɩ b sak m goamã. La mam kell n sagla nebã hal tɩ ta rũndã.

⁸ La bãmb ka sak n kelg ye. Bãmb ned kam fãa maana wa sẽn zems a sũ-keglmã. Mam yeela bãmb tɩ b sak m kaoolã goamã, la bãmb ka sak ye. Woto, mam maana bãmb wa sẽn zems goam nins fãa sẽn be kaoolã pʋgẽ wã.»

⁹ Sẽn-Ka-Saab yeela maam yaa: «Zʋʋda ne Zeruzalɛm nebã lagma taab n kɩɩs maam.

¹⁰ Bãmb leb n maana yel-wẽn nins b yaab-rãmbã sẽn dag n kɩɩs mam noor n maanã. Bãmb baoo buud a taab wẽnnaam-dãmbã n waoog-ba. Israyɛll ne Zʋʋda nebã sãama kaool ning mam sẽn dag n maan ne b yaab-rãmbã.

¹¹ Woto yĩnga, maam a Sẽn-Ka-Saab yetame: ‹Mam na n kɩtame tɩ toog paam bãmb tɩ b ka tõog n põs ye. La baa bãmb sã n bool maam, mam ka na n kelg-b ye.

¹² La Zʋʋda ne Zeruzalɛm nebã na n tɩ kelem n boola wẽnnaam-dãmb nins bãmb sẽn dag n yõogd wisd n kõtẽ wã n kos sõngre, la wẽnnaam-kãens ka na n sõng bãmb b toogã wakat ye.

¹³ Bala, yãmb a Zʋʋda nebã wẽnnaam-dãmbã sõor yaa wʋsg wa y tẽmsã sõore. Yãnd tẽn-kug nins yãmb sẽn me n na n yõogd wisd b zut n kõt Baallã sõor yaa wʋsg wa Zeruzalɛm soayã.

¹⁴ Bɩ foom a Zeremi ra pʋʋs maam, la f ra kelem n bool maam nin-bãmbã yĩng ye. Bala, bãmb sã n bool maam b toogã pʋgẽ, mam ka na n kelg-b ye.› »

Israyɛll yaa Sẽn-Ka-Saab oliiv tɩɩga

¹⁵ Bõe la mam nebã mam sẽn nongã leb n baood mam doogã pʋgẽ? Bãmb tẽedame tɩ b tõe n maana pʋleng ne maoong n gɩdg b sãoongã bɩ? Bãmb tagsdame tɩ b tõe n maana woto n põs la?

¹⁶ Mam dag n pʋda yẽnda yʋʋr tɩ oliiv tɩ-sõng sẽn womd bi-sõama. La bʋr-kãseng pʋgẽ, mam na n yõoga a vãadã bugum, la m kao a wilã.

¹⁷ Saasẽ-Pãng-Soabã sẽn sel yãmb a Israyɛll ne Zʋʋda nebã yetame tɩ toog na n waa yãmb zutu, wẽng ning yãmb sẽn maanã yĩnga. Yãmb yõoga wisd n kõ Baalle, n kɩt tɩ m sũurã puugi.

B baood n maana a Zeremi wẽnga

¹⁸ Sẽn-Ka-Saab wilga maam n kɩt tɩ m bãng bũmb nins m bɛɛbã sẽn saagd mam wɛɛngẽ.

¹⁹ La mam dag n yaa wa peosg b sẽn tɛt n na n tɩ kʋ. Mam dag n ka bãng tɩ b seta taab n dat n maan maam wẽng ye. Bãmb yeelame: «Bɩ d sãam tɩɩgã ne a biisã, la d kɩt t'a yʋʋrã menem bõn-vɩɩsã sʋka, tɩ b ra leb n tẽeg a yell ye.

²⁰ La Saasẽ-Pãng-Soabã yaa bʋ-kaood-tɩrga. Bãmb feesda nebã tagsgã ne b sũyã. Bas-y tɩ m yã y sẽn na n dok y sũur ne nin-kãensã. Bala, mam basa m yɛlã fãa ne yãmba.

²¹ Woto yĩnga, Sẽn-Ka-Saab goma Anatot neb nins sẽn dat n kʋ maamã wɛɛngẽ. Nin-kãens yetame tɩ m sã n leb n togs pĩnd-n-bãngr goam ne Sẽn-Ka-Saab yʋʋre, b na n kʋʋ maam.»

²² Rẽ kɩtame tɩ Saasẽ-Pãng-Soabã yetẽ: «Ade, mam na n sɩbga nin-kãense. Bãmb ra-sãmbã na n paa tãpẽ, la kom na n kʋʋ b kom-dibli wã ne b kom-pugli wã.

²³ Yʋʋmd ning mam sẽn na n sɩbg Anatot nebã, mam na n kɩtame tɩ toog paam-ba, la ned ba a yembr ka na n kell ye.»