Zake 2 - WẼNNAAM SEBRE 2014

Da tũus neb ye

¹ M ba-biisi yãmb sẽn tẽed tõnd Zu-soab a Zeezi Kirisã, sẽn so-a ziirã, bɩ y ra tũus neb ye.

² Ned sẽn pid sãnem nugbĩnga la a yer naam fut sã n kẽ yãmb kaorengo, tɩ naong soab me sẽn yer nimbãan-fut me kẽ,

³ yãmb sã n waoog ned ning sẽn yer-a naam futã n yeel-a: Fo wa n zĩnd waoogr zĩ-kãngã wã, la y yeel naongã soaba: Fo yals yĩngr be, wall f yeel: Zĩnd tẽng mam naoẽ wã.

⁴ Dẽ yĩnga, yãmb ka tũusd nebã, la y ya bʋ-kaoodb sẽn tar tags-wẽnse?

⁵ M ba-bi-nongdse, kelg-y-yã! Dẽ yĩnga, Wẽnnaam ka tũus neb nins dũni sẽn get wa naong rãmbã n kɩt tɩ b yɩ arzegs rãmba la b na n soog soolem ning bãmb sẽn kãab neb nins sẽn nong-b bãmbã yĩng sɩda?

⁶ La yãmba, yãmb paooga naong soabã. Dẽ yĩnga, arzegs rãmbã ka weoogd yãmb la b tar yãmb n kẽnd bʋʋd zĩisẽ sɩda?

⁷ Dẽ yĩnga, ka bãmb n paoogd yʋ-sõng ning Wẽnnaam sẽn kõ yãmbã?

⁸ Sɩda, yãmb sã n sakd Wẽnnaam soolem tõog sẽn be gʋls-sõamyã pʋgẽ, n yetẽ tɩ: «Nong f to wa f mengã,» yãmb maanda neere.

⁹ La yãmb sã n get nebã n tũusd-ba, yãmb maanda yel-wẽnde, la tõogã kɩtame tɩ yãmb bãng tɩ y beegame.

¹⁰ Bala, ned ning fãa sẽn sak-a tõodã fãa, n yaool n maan yel-wẽnd n kɩɩs a yembr tãa, a lebga bɛɛgd ne tõodã fãa.

¹¹ Soab ning sẽn yeel tɩ: Ra yo wã, soab‑kãng me n yeel tɩ: Ra kʋ wã. La fo sã n ka n maan yoobo, n yaool n kʋ neda, fo lebga tõog kɩɩsda.

¹² Gom-y la y tʋm wa neb b sẽn na n tall lohorem tõog n kao b bʋʋdo.

¹³ Bala, ned sã n ka tar nimbãan-zoeere, bʋʋdã me ka na n zoe a nimbãaneg ye. Nimbãan-zoeer tõogda bʋʋdo.

Tẽebo la tʋʋma

¹⁴ M ba-biisi, ned sã n yet t'a tara tẽeb n yaool n ka tʋmdẽ, a yõod yaa bõe? Dẽ yĩnga, tẽ-kãng tõe n fãagame?

¹⁵ D ba-bi-raoog bɩ d ba-bi-poak sã n yaa beelle, tɩ daar fãa bɩ a ka tar dɩɩb n dɩtẽ,

¹⁶ tɩ yãmb ned a yembr yeel-a yaa: Kẽng-y ne laafɩ, yiis f waoodo, la f rɩ n tɩge, n yaool n ka kõ-a bũmb ning a sẽn tog n paam a sõngr yĩnga, gom-kãng yõod bee yɛ?

¹⁷ Yaa a woto me ne tẽebã. Tẽeb sã n ka naag ne tʋʋma, a mengã yaa kɩɩnga.

¹⁸ La nina na n yeelame: Fo tara tẽebo, la mam tʋmdame. Wilg maam f tẽeb tɩ tʋʋm ka tũ ye, la mam na n talla m tʋʋma n wilg foom m tẽebo.

¹⁹ F tẽedame tɩ Wẽnnaam a yembr bal n be. Yaa sõama. Zĩn-dãmbã me tẽedame, la b rigda ne rabeem.

²⁰ Yam ka sek soaba, fo rat n bãngame tɩ tẽeb sẽn ka naag ne tʋʋm ka yõod la?

²¹ Ka ne tʋʋm la tõnd ba a Abrahaam paam tɩrlem, a sẽn ning a bi‑ribl a Izak tẽn-kugr zug n kõ Wẽnnaamã la?

²² Fo neeme tɩ tẽeb n dag n naag ne a tʋʋmã, la a tʋʋmã yĩnga, Wẽnnaam kɩtame t'a tẽebã zems zãnga.

²³ Woto, Wẽnnaam gʋls-sõngã paama pidsgu. B yeelame yaa: A Abrahaam tẽe Wẽnnaam, la b gesa rẽnda wa tɩrlem a yĩnga. La b bool-a lame tɩ Wẽnnaam zoa.

²⁴ Yãmb neeme tɩ yaa ne tʋʋm la ned paamd tɩrlem, la ka ne tẽeb bal ye.

²⁵ Pʋg-yoodr a Rahaab me, ka ne tʋʋm yĩng la a paam tɩrlem a sẽn deeg Israyɛll gũusdbã, la a kɩt tɩ b tũ sor a to n loogã sɩda?

²⁶ Yĩng sã n ka naag ne sɩɩga, a yaa kũum. Woto me, tẽeb sã n ka naag ne tʋʋma a yaa kɩɩnga.