Zakari 8 - WẼNNAAM SEBRE 2014

Vɩ-bãan ne naar kãabgo

¹ Saasẽ-Pãng-Soabã goma ne maam n yeele:

² «Maam a Saasẽ-Pãng-Soabã yetame: ‹Mam nonga Sɩyõ, mam nong-a-la ne nonglem-kãsenga, nonglem ning mam sẽn tar yẽnda yĩngã yaa kãseng n dɩt maam wa bugum.› »

³ Sẽn-Ka-Saab yetame: «Mam na n lebg n waa Sɩyõ, la m na n zĩnda Zeruzalɛm pʋgẽ. B na n pʋda Zeruzalɛm tɩ «pʋ-peelem Tẽnga» la Saasẽ-Pãng-Soabã tãn-sõngo.»

⁴ Saasẽ-Pãng-Soabã yetame: «Nin-kẽemba, pagb la raopa, b ned kam fãa na n tika a rasaare, n kẽng n tɩ zĩnd Zeruzalɛm nebã seg taabã zĩisẽ, bãmb yʋʋmã sẽn yaa wʋsgã yĩnga.

⁵ Kom-dibli la kom-pugli na n pida tẽngã nebã seg taabã zĩisẽ n deemdẽ.»

⁶ Maam Saasẽ-Pãng-Soabã yetame: «Sã n mikame tɩ badaare, bu-kellã tagsdame tɩ yaa bũmb sẽn ka tõe n yɩ, dẽ yĩnga, mam me tog n tagsame tɩ yaa bũmb sẽn ka tõe n yɩ la? Yaa maam a Saasẽ-Pãng-Soabã n yeele.»

⁷ Saasẽ-Pãng-Soabã yetame: «N-yẽe! Mam na n fãaga m nebã n yiis-b tẽms sẽn be yaanga, la nin-taoorã pʋgẽ.

⁸ Mam na n lebg n tall-b lame n wa, la bãmb na n zĩnda Zeruzalɛm pʋgẽ. Bãmb na n yɩɩ mam neba, la mam na n yɩɩ bãmb Wẽnnaam, n yaa sɩd soaba, la tɩrlem soaba.»

⁹ Saasẽ-Pãng-Soabã yetame: «Yãmb dãmb sẽn wʋm gom-kãensã no-rɛɛsdbã sẽn togs wakat ning b sẽn yẽbg Saasẽ-Pãng-Soabã roogã, la wakat ning b sẽn na n me-a wã, paam-y raoodo!

¹⁰ Bala, sẽn deng rũndã, ninsaalbã rag n ka tar yaoodo, la rũmsã ka tʋmd n kẽesd yõod ye. Bɛɛbã yĩnga, ned ka tõe n yi n gõ la a wa bãan ye. Bala, mam dag n basa ninsaalbã fãa ne taaba.»

¹¹ Moasã, maam a Saasẽ-Pãng-Soabã yetame: «Mam ka na n leb n maan bu-kellã wa m sẽn maan pĩndã ye.

¹² Sɩd me, mam na n waa ne vɩ-bãan bõn-buudu. Reezẽ tɩɩsã na n woma biisi, tẽn-gãongã na n saka bõn-koaadla. Sa-gãongã na n sika a meenem, la mam na n kɩtame tɩ bõn-kãng fãa lebg mam nebã bu-kellã rẽnda.

¹³ Dẽ, Zʋʋda buudu, Israyɛll buudu, yãmb sẽn dag n lebg kãab-wẽng bãnd bu-zẽmsã sʋk to-to wã, woto me, mam na n fãaga yãmba, la yãmb na n lebga buud sẽn tar barka. Da zoe-y rabeem ye, paam-y raoodo!»

¹⁴ Bala, Saasẽ-Pãng-Soabã yetame: Yãmb yaab-rãmbã rag n kɩtame tɩ mam sũurã yiki, tɩ mam yãk yam n na n sɩbg yãmba, la m ka maan m bãngẽ ye. Maam a Saasẽ-Pãng-Soabã n yeele!

¹⁵ Woto me, mam lebg n yãkda yam moasã, n yeel tɩ badaare, m na n maana Zeruzalɛm ne Zʋʋda buudã neere. Dẽ wã, da zoe-y rabeem ye!

¹⁶ Ad yãmb sẽn tog n maan bũmb ninga: «Gom-y sɩd ne taaba! Kao-y bʋʋdã ne tɩrlem la ne sɩda, y bʋ-kaoorã zĩisẽ.

¹⁷ Bɩ ned ra tags a sũurẽ n dat n maan a to wẽng ye. Bɩ y kisg zĩrẽ wẽenego. Bala, mam kisa yel-bãmbã fãa. Yaa maam a Sẽn-Ka-Saab n yeele!»

No-loeer daar sẽn lebg tigr daare

¹⁸ Sẽn-Ka-Saab sẽn yaa Saasẽ-Pãng-Soabã goma ne maam a woto:

¹⁹ Maam a Saasẽ-Pãng-Soabã yetame: «Kiuug a naasẽ soabã no-loeerã, ne a nu soabã no-loeerã, la kiuug a yopoe soabã no-loeerã, ne kiuug piig soabã no-loeerã, na n lebga kɩdeng la sũ-noog rayã, b na n lebga tigr kɩdeng day Zʋʋda buudã yĩnga. Dẽ wã, nong-y sɩda, ne vɩ-bãane.»

²⁰ Saasẽ-Pãng-Soabã yetame: «Neb buud toor-toor ne tẽms wʋsg neb na n leb n wa pida Zeruzalɛm.

²¹ Tẽng a yembr neb na n kẽng n tɩ yeela tẽng a to rãmb yaa: «Wa-y tɩ d kẽng n tɩ yõk Sẽn-Ka-Saab sɛɛg n ges b sũurã ka na n sigi. D kẽng n tɩ bao Saasẽ-Pãng-Soabã.» La ned kam fãa na n leokame: «Mam me na n tũume n kẽnge!»

²² Neb kʋʋng wʋsg ne soolem-dãmb sẽn tar pãng n na n wa Zeruzalɛm n wa bao Saasẽ-Pãng-Soabã, n yõk bãmb a Sẽn-Ka-Saab sɛɛg n ges b sũurã ka na n sigi.

²³ Saasẽ-Pãng-Soabã yetame: «Badaare, neb sẽn gomd goam buud toor-toor pʋgẽ neb piig na n gãda Zʋɩf a yembr fãa fuug noor n yeele: ‹Tõnd na n tũu yãmb n kẽnge. Bala, tõnd wʋmame tɩ Wẽnnaam bee ne yãmba.› »