Zakari 7 - WẼNNAAM SEBRE 2014

No-loeer Zeruzalɛm lʋɩɩsã tẽegr yĩnga

¹ Rĩm a Daryʋʋs sẽn deeg a naamã tɩ yʋʋm naaslẽ, Sẽn-Ka-Saab goma ne a Zakari kiuug a wɛ soabã b sẽn boond tɩ Kislɛv kiuugã rasem a naas daare.

² A Betɛll rag n tʋma a Saretsɛɛr ne a Regɛm-Melɛk ne yẽnda nebã, tɩ b tɩ yõk Sẽn-Ka-Saab sɛɛg n ges b sũurã kõn sigi,

³ la b tɩ sok Saasẽ-Pãng-Soabã roogã maan-kʋʋdbã, ne no-rɛɛsdbã yaa: «Mam tog n kell n yãbame n tãag kiuug a nu soabã, la m loe noore, wa mam sẽn dag n maan hal yʋʋm zãrã bɩ?»

⁴ Saasẽ-Pãng-Soabã goma ne maam n yeele:

⁵ «Yeel tẽngã nebã fãa ne maan-kʋʋdbã yaa: ‹Yãmb sẽn loe noor n wiis kiuug a nu soabã ne kiuug a yopoe soabã, hal yʋʋm pis-yopoe sẽn loogã pʋgẽ wã, rẽ yĩnga, sɩd yaa mam yĩng la yãmb loe noorã sɩda?

⁶ Yãmb sẽn dɩt la y yũudã, ka yãmb mensã yĩng la y rɩt la y yũud sɩda?

⁷ Rẽ yĩnga, ka koe-kãng la Sẽn-Ka-Saab rag n tũnug b no-rɛɛsdbã hal kʋdem-wẽndẽ n moon n togsã sɩda? Wakat-kãng tɩ Zeruzalɛm ne tẽms nins sẽn dag n gũbg yẽnda wã rag n pida ne nebã, n gãe bãane. Rẽ tɩ Negɛɛv ne tẽms nins sẽn be kunkub sʋkã rag n pida ne nebã?»

⁸ Sẽn-Ka-Saab goma ne a Zakari n yeele:

⁹ «Saasẽ-Pãng-Soabã yetame: ‹Kao-y bʋʋdã tɩrga, maan-y taab neere, la y zoe taab nimbãanega.

¹⁰ Ra maan-y pʋg-kõor ne kɩɩb pãnga, la y ra maan sãan ne naong soab pãng ye. Da tags-y y sũyã pʋs n dat n maan taab wẽng ye.›

¹¹ La bãmb zãgsame tɩ b ka na n kelg ye. Bãmb kɩɩsame n yẽd b tʋba, sẽn na n yɩl n da wʋm ye.

¹² Bãmb diglma b sũyã wa diyama, sẽn na n yɩl n da kelg tõogã ne goam nins Saasẽ-Pãng-Soabã Sɩɩgã sẽn tũnug kʋdem-wẽndẽ no-rɛɛsdbã n kõ bãmbã ye.» Dẽ, bõn-kãng yĩng kɩtame tɩ Saasẽ-Pãng-Soabã sũurã yiki.

¹³ Saasẽ-Pãng-Soabã yeelame: «Mam sẽn bool bãmbã, b ka kelg ye. Dẽ wã, bãmb sã n wa bool maam, mam me ka na n kelg ye.

¹⁴ Mam sãeega bãmb n kẽes bu-zẽms nins fãa bãmb sẽn dag n ka mi wã sʋka. Bãmb loogame n bas b tẽngã t'a sãam zãnga, tɩ ned ka leb n kẽnd a pʋga, la b ka ne ned sẽn pɩʋʋgd beenẽ me ye. Tẽng ning sẽn dag n yaa tẽn-noogã sãamame.»