Zakari 5 - WẼNNAAM SEBRE 2014

Vẽnegr a yoobẽ soaba: Seb-pindg sẽn laande

¹ Mam leb n zẽka m neng n gese, la mam paama vẽnegr yɛsa. Mam yãnda seb-pindg sẽn laand yĩngri.

² La malɛɛkã yeela maam yaa: «Fo nee bõe?» Mam leokame: «Mam nee seb-pindg sẽn laande, t'a woglmã yaa kãntɩɩg pisi, t'a yalmã yaa kãntɩɩg piiga.»

³ Dẽ, Malɛɛkã yeela maam yaa: «Yaa kãab-wẽngã n yit n na n zab ne tẽngã zãngã. Sɩd me, kãab-wẽngã yetame tɩ b na n diga wagda wã fãa n yiis tẽngã, a leb n yeelame tɩ b na n diga sẽn wẽend-b zĩrẽ wẽenegã n yiis tẽngã.»

⁴ Sẽn-Ka-Saab yeelame: «Mam na n yiis a kãab-wẽngã t'a tõe n kẽ wagdrã roogẽ, ne sẽn wẽend-a zĩrẽ wẽeneg ne mam yʋʋrã roogẽ, n pa be n sãam yẽnda ne a raadã la a kugã.»

Vẽnegr a yopoe soaba: Peoogo

⁵ Malɛɛk ning sẽn dag n gomd-a ne maamã yiime n yeel maam yaa: «M kotame tɩ f nak f neng n gese. Ges yaa bõe la sẽn yitã.»

⁶ La mam sokame tɩ yaa bõe la woto. T'a leok maam tɩ yaa peoog la sẽn watã. A leb n yeelame yaa: «Yaa bãmb yel-wẽnã sẽn be tẽngã zĩig fãa wã la woto.»

⁷ Wakat-kãnga, peoogã limdã sẽn yaa namdã fõkame, la pag n dag n zĩ peoogã pʋga.

⁸ Malɛɛkã yeelame yaa: «Yaa wẽnemã.» La a lebs n dĩ-a n kẽes peoogã pʋga, n lebs namdã limd n fõgne.

⁹ Dẽ, mam nak n gesame, la mam yãnda pagb a yiib sẽn yita. Sebgã rag n wẽeda b pɩgsã. Bãmb dag n tara pɩgs wa bakaorg pɩgsa. Bãmb zẽka peoogã t'a be yĩngr ne tẽng sʋka.

¹⁰ Mam soka malɛɛk ning sẽn gomd-a ne maamã yaa: «Bãmb dɩka peoogã n dabd yɛɛnẽ?»

¹¹ Malɛɛkã leoka maam yaa: «B rabd n na n tɩ mee roog Sineyaar tẽng n kõ-a. B sã n me roogã n sɛ, b na n ning-a-la beenẽ, t'a pa be.»