Zakari 4 - WẼNNAAM SEBRE 2014

Vẽnegr a nu soaba: Fɩtl doagendg ne oliiv tɩɩse

¹ Malɛɛk ning sẽn dag n gomd-a ne maamã lebg n wa neka maam wa b sẽn nekd ned a gõeemẽ.

² Yẽnda soka maam yaa: «Fo nee bõe?» La mam leokame: «Mam nee fɩtl doagendg sẽn yaa sãnem gilli, n tar tʋk sẽn be a yĩngrã, la fɩtl-dãmb a yopoe n dog a zugu, la fɩtl fãa tara yõgneg zĩis a yopoe sẽn be a zugẽ wã.

³ Oliiv tɩɩs a yiib n yas n yeg-a, a yembr bee tʋkã rɩtgo, t'a yembrã be a goabga.

⁴ Mam leb n soka malɛɛk ning sẽn dag n gomd-a ne maamã yaa: «M soaala, bõn-kãensã rat n yeelame tɩ bõe?»

⁵ La malɛɛkã leoka maam yaa: «Fo ka mi bõn-kãensã sẽn dat n yeel tɩ bũmb ning sɩda?» Dẽ, mam leokame: «Ayo, m soaala!»

⁶ Dẽ, malɛɛkã yeela maam yaa: «Ad Sẽn-Ka-Saab koɛɛg a Zorobabɛll yĩnga: ‹Ka ne gãndaalem, leb n ka ne pãng me ye. Yaa ne mam sɩɩgã. Yaa maam a Sẽn-Ka-Saab sẽn yaa Saasẽ-Pãng-Soabã n yeele.»

⁷ Tãn-kãsenga, fo yaa ãnda a Zorobabɛll taoore? B na n sarma foom. A Zorobabɛll na n yãka mam doogã pãng kugr beenẽ, la nebã na n kilsame n yeel tɩ ‹pẽgre, bɩ a paam pẽgre!›

⁸ Sẽn-Ka-Saab goma ne maam n yeel yaa:

⁹ ‹Yaa a Zorobabɛll nus n yẽbg ro-kãngã, la yaa yẽnda nusã n na n me-a n baase, dẽ, yãmb na n bãngame tɩ yaa Sẽn-Ka-Saab sẽn yaa Saasẽ-Pãng-Soabã n tʋm maam yãmb nengẽ.›

¹⁰ Woto wã, ãnda la sẽn paoog tʋʋmdã sẽn sɩng bilfã? B sã n wa yãnd namdã sẽn be a Zorobabɛll nugẽ wã, b na n kɩdmame. Fɩtl-dãmb a yopoe wã mamsda Sẽn-Ka-Saab ninã sẽn get dũniyã gill fãa wã.»

¹¹ Dẽ, mam soka malɛɛkã yaa: «Oliiv tɩɩs a yiibã sẽn yas fɩtl doagendgã rɩtg ne a goabgã mamsda bõe?»

¹² Mam leb n sok-a-la naoor a yiibẽ soab yaa: «Oliiv tɩɩs wil a yiibã sẽn be sãnem soay a yiibã sãnem-koom sẽn tũud n yitẽ wã sɛɛgã mamsda bõe?»

¹³ Malɛɛkã leoka maam yaa: «Fo ka mi bãmb sẽn mamsd bũmb ning sɩda?» La mam yeelame: «Ayo, m soaala!»

¹⁴ Dẽ, a yeela maam yaa: «Bãmb yaa neb a yiib nins b sẽn pʋdg ka-paalgã b zutã, bãmb yasa dũni gill soaalã taoore.»