Zakari 3 - WẼNNAAM SEBRE 2014

Vẽnegr a naasẽ soaba: Maan-kʋʋr kãsem a Zozoe

¹ Sẽn-Ka-Saab wilga maam maan-kʋʋr kãsem a Zozoe sẽn yas Sẽn-Ka-Saab malɛɛkã taoore. La a Sʋtãan dag n yasa malɛɛkã nug-rɩtg n na n dõd-a.

² Sẽn-Ka-Saab malɛɛkã yeela Sʋtãanã yaa: «Sʋtãana, bɩ Sẽn-Ka-Saab leng-fo! Bɩ Sẽn-Ka-Saab sẽn yãk Zeruzalɛmã leng-fo! Rẽ yĩnga, rao-kãngã ka wẽnd raoog b sẽn yiis bugmẽ sɩda?»

³ A Zozoe rag n yera fu-rẽgd n yas malɛɛkã taoore.

⁴ Malɛɛkã yeela neb nins sẽn dag n yas a Zozoe sɛɛgẽ wã yaa: «Yees-y-yã a fu-rẽgdã!» Dẽ poore, a yeela a Zozoe yaa: «Gese, mam yiisa fo kongrã, la m na n lebs n yeelg foom tigr futu.»

⁵ Mam yeelame yaa: «Vil-y-yã a zugã ne peen-vindg sẽn yaa yɩlemde!» Dẽ, b vila a zugã ne peen-vindg sẽn yaa yɩlemde, la b yeelg-a futu. La Sẽn-Ka-Saab malɛɛkã rag n yasa beenẽ.

⁶ Dẽ, Sẽn-Ka-Saab malɛɛkã yeela a Zozoe yaa:

⁷ «Saasẽ-Pãng-Soabã yetame: ‹Fo sã n tũ mam noyã, la f sak mam tõodã, yaa foom n na n soog m doogã, foom n na n ges m doogã zags yelle, la mam na n kõo foom lohorem tɩ f zĩnd neb nins sẽn be ka wã sʋka.› »

⁸ Maan-kʋʋr kãsem a Zozoe, mam kot-f lame tɩ f kelge, bɩ fo tʋmd-n-taasã sẽn zĩ fo taoorã me kelge, bala, nin-bãmbã yaa bãnde. Ade, mam na n kɩtame tɩ bõn-bullã sẽn yaa mam tʋmtʋmdã wa.

⁹ Sɩd me, mam ninga kugr a Zozoe taoore, la kug-kãngã a yembrã zugu, nin a yopoe n be beenẽ. Mam mengã na n gʋlsa gʋlsem a zugu. Yaa maam a Saasẽ-Pãng-Soabã n yeele. Mam na n yiisa tẽn-kãngã kongrã daar a yembr pʋgẽ.

¹⁰ Maam a Saasẽ-Pãng-Soabã yetame: Badaare, yãmb na n boola taab n kẽng y reezẽ tɩɩsã ne y kankamsã tẽngre.