Zakari 12 - WẼNNAAM SEBRE 2014

Zeruzalɛm bɛɛbã sãoongo

¹ Sɩbgr koɛɛga. Sẽn-Ka-Saab koɛɛg Israyɛll wɛɛngẽ. Ade, Sẽn-Ka-Saab sẽn yaa soab ning sẽn yɛdg sa-gãongã la b vigl tẽngã, n kɩt tɩ sɩɩg be ninsaalb pʋgẽ wã yetame:

² «Mam na n kɩtame tɩ Zeruzalɛm lebg bõn-yũudl sẽn yilimd neng soolem nins fãa sẽn gũbgã yĩnga. Wakat ning b sẽn n wa n gũbg Zeruzalɛmã, a na n yɩɩ woto ne Zʋʋda nebã.

³ Badaare, mam na n kɩtame tɩ Zeruzalɛm lebg kug-zɩsg nebã buud fãa yĩnga. Neb nins fãa sẽn na n tʋlg n zẽk-a wã na n pogla b mense. La dũniyã buud toay-taoyã fãa na n tigma taab n zab ne-a.»

⁴ Sẽn-Ka-Saab yetame: «Badaare, mam na n kɩtame tɩ nen-yiling yõk wed-moosã fãa, la m kɩt tɩ neb nins sẽn zombd bãmbã gãeeme. La m na n gũu Zʋʋda buudã, n lobg bu-zẽmsã wed-moosã zondo.

⁵ Zʋʋda nanambsã na n tagsa b sũyã pʋs a woto: ‹Zeruzalɛm nebã yaa tõnd pãnga, Saasẽ-Pãng-Soabã sẽn yaa bãmb Wẽnnaamã maasem yĩnga.› »

⁶ Badaare, mam na n kɩtame tɩ Zʋʋda buudã nanambs yɩ wa bugum sẽn be raad sʋka, la wa bug-vɩleng sẽn be mood tẽngre. Bãmb na n sãama soolem nins fãa sẽn gũbg bãmb goabg la rɩtgã, la Zeruzalɛm na n kell n pa a zĩigẽ wã Zeruzalɛm.

⁷ Sẽn-Ka-Saab na n deng n fãaga Zʋʋda buudã fu-roto, sẽn na n yɩl t'a Davɩɩd buudã ne sẽn be-b Zeruzalɛmã ziir ra wa yɩɩg Zʋʋda buudã ye.

⁸ Badaare, Sẽn-Ka-Saab na n kogla Zeruzalɛm nebã. Ned sã n be bãmb sʋkã n ka tar pãnga, badaare, a na n talla pãng wa a Davɩɩde, la a Davɩɩd buudã na n yɩɩ wa Wẽnnaam, a na n yɩ wa Sẽn-Ka-Saab malɛɛk sẽn be bãmb taoore.

Yãbr sẽn na n zĩnd tẽngã fãa pʋga

⁹ Badaare, mam na n maana m sẽn tõe tɛk n sãam soolem nins fãa sẽn na n wa zab ne Zeruzalɛmã,

¹⁰ mam na n kɩtame tɩ nimbãan-zoeer ne se-yõkr sɩɩg sig a Davɩɩd buudã ne Zeruzalɛm nebã zugu, la bãmb na n wẽnemd n gesa maam, bãmb na n wẽnemd n gesa soab ning bãmb sẽn dag n kõsã. Bãmb na n yãba a yĩnga, wa ned sẽn yãbd a bi-yend yĩnga. Bãmb na n yãba yẽnda yĩng wʋsg wa ned sẽn yãbd a pipi bi-ribl yĩnga.

¹¹ Badaare, Zeruzalɛm yãbrã na n yɩɩ kãseng wa Hadaad-Rimon sẽn yãb to-to Megido longẽ wã.

¹² Tẽngã na n yãbame, roog fãa neb na n yãba toore: a Davɩɩd buudã neb roog na n yãba toore, tɩ pagbã me yãb toore. A Natã buudã neb roog na n yãba toore, tɩ pagbã me yãb toore.

¹³ A Leevi buudã neb roog na n yãba toore, tɩ pagbã me yãb toore. A Sɩmeyi roogã neb na n yãba toore, tɩ pagbã me yãb toore.

¹⁴ Rot a taabã neb fãa na n yãba toore, tɩ pagbã me yãb toore.