Zakari 10 - WẼNNAAM SEBRE 2014

Sẽn-Ka-Saab n wat ne tɩlgre

¹ Kos-y Sẽn-Ka-Saab tɩ b tʋm saaga, kos-y tɩ b tʋm yaoolem saaga. Yaa Sẽn-Ka-Saab n wat ne sa-ko-bɛda. Bãmb na n kɩtame tɩ sa-koom ni wʋsgo, la b kɩt tɩ ned kam fãa pʋʋg bõn-koaadl yi.

² Bala, bõn-naandsã sẽn yetã yaa wẽnse. La bagbã vẽnegr yaa zĩrẽ-beed bala. Bãmb zãmsdã yaa belgr zãmsdo, bãmb belsg goamã yaa zaalem. Yaa rẽ n kɩt tɩ nebã yeebd wa piisi. Bãmb sũyã sãamame, b sẽn ka tar pe-kɩɩmã yĩnga.

³ «Mam sũurã puuga ne pe-kɩɩmbã, mam na n sɩbga boeesã. Saasẽ-Pãng-Soabã gesa Zʋʋda buudã sẽn yaa bãmb piisã yelle. Bãmb kɩtame tɩ b lebg b weef sẽn tar ziir zabr zĩigẽ.

⁴ Roogã soak zĩigẽ kugrã na n yii Zʋʋda buudã pʋga, baafã ne zabr tãpã na n yii beenẽ. Nanambsã fãa me na n yii beenẽ.

⁵ Bãmb na n yɩɩ wa gãndaad sẽn be zabr zĩigẽ, bãmb na n zabame, n tab b zabd-n-taasã wa soay zut begdo. Bãmb na n zabame, bala, Sẽn-Ka-Saab na n zĩnda ne-ba, la sẽn zao-b wiidã na n dɩɩ yãnde.

⁶ Mam na n kɩtame tɩ Zʋʋda buudã paam pãnga, la m na n fãaga a Zozɛf buudã. Mam na n leb n lebs-b-la b zĩigẽ wã, bala, mam zoeta b nimbãanega, bãmb na n yɩɩ wa mam dag n ka bas-b ye. Mam yaa Sẽn-Ka-Saab sẽn yaa bãmb Wẽnnaam, la m na n leok-b lame.

⁷ Efrayiim buudã neb na n paama raood wa gãndaoogo. Bãmb na n paama sũ-noog wa b yũu reezẽ rãam. Bãmb kambã sã n yãnd bãmba, b na n kɩdmame, n maan sũ-noog Sẽn-Ka-Saab yĩnga.

⁸ Mam na n fɩɩl n bool-b lame n tigme, bala, yaa maam n fãagd bãmba, la b na n leb n fɩɩga wa pĩndã.

⁹ Mam na n sãeega bãmb bu-zẽmsã sʋka, la bãmb na n zĩnda zĩ-zãrsẽ wã n tẽeg mam yelle. Bãmb ne b kambã na n vɩɩmdame, la b na n lebg n waame.

¹⁰ Mam na n tall-b lame n yi Ezɩpt n lebg n wa. Mam na n yiisa bãmb Asiiri n tall-b n wa tigme. Mam na n kẽesa bãmb Galaad ne Libã tẽngã pʋga, la ne rẽ fãa, zĩigã ka na n sek-b ye.

¹¹ Bãmb na n pɩʋʋga sũ-sãang ko-kãsengã, Sẽn-Ka-Saab na n wẽe ko-kãsengã ko-pɛmã, la Nill kʋɩlgã ko-zulumsã na n kʋɩɩme. B na n sika Asiiri, a zẽk-m-mengã yĩnga, la Ezɩpt tẽngã naam na n sɛɛme.

¹² Mam na n kɩtame tɩ bãmb paam pãng Sẽn-Ka-Saab pʋga, la b na n kẽnda ne Sẽn-Ka-Saab yʋʋre. Yaa maam a Sẽn-Ka-Saab n yeele.»