Zakari 1 - WẼNNAAM SEBRE 2014

Sẽn-Ka-Saab yeela Israyɛll nebã tɩ b tek zʋgo

¹ Dĩm a Daryʋʋs naamã yʋʋm a yiibẽ soabã kiuug a nii soabã pʋga, Sẽn-Ka-Saab goma ne b no-rɛɛs a Zakari. A Zakari yaa a Berekɩya biiga, t'a Berekɩya yaa no-rɛɛs a Ido biiga. Sẽn-Ka-Saab yeelame tɩ b yeel Israyɛll nebã yaa:

² «Maam a Sẽn-Ka-Saab sũur yika wʋsg ne yãmb yaab-rãmbã.

³ Yeel-b tɩ Saasẽ-Pãng-Soabã yetame: ‹Lebg-y n wa-y mam nengẽ. Maam a Saasẽ-Pãng-Soabã n yeele. La mam me na n lebg n waa yãmb nengẽ!› Maam a Saasẽ-Pãng-Soabã n yeele.»

⁴ Saasẽ-Pãng-Soabã leb n yeelame: «Da yɩ-y wa y yaab-rãmbã ye. Wakat sẽn looge, no-rɛɛsdbã rag n moondame n yet bãmb tɩ Saasẽ-Pãng-Soabã yetame yaa: ‹M kot-y lame tɩ y bas y manesem-wẽnsã ne y tʋʋm-wẽnsã n lebg n wa mam nengẽ!› La bãmb ka kelg ye. Bãmb maana b toog kae ne maam ye. Maam a Sẽn-Ka-Saab n yeele.

⁵ Yãmb yaab-rãmbã bee yɛɛnẽ? La no-rɛɛsdbã vɩɩme n ka kiidẽ la?

⁶ La ne rẽ fãa, goam nins la noy nins mam sẽn dag n kɩt tɩ mam tʋmtʋmdbã sẽn yaa no-rɛɛsdbã togsã, ka ta y yaab-rãmbã sɩda?» Bãmb lebg n waame n wa yeel yaa: «Saasẽ-Pãng-Soaba maana tõnd wa b sẽn dag n yãk yam n na n maanã, b maana tõnd wa sẽn zems d nao-kẽndrã ne d yel-manesmã.»

Pipi vẽnegre: Wed-moose

⁷ Rĩm a Daryʋʋs sẽn deeg naam tɩ yʋʋm yiiblẽ, kiuug piig la a yembr soabã sẽn yaa Sebat kiuugã rasem pisi la a naasã daare, Sẽn-Ka-Saab goma ne a Zakari sẽn yaa a Berekɩya biiga, n yaa a Ido yagenga, n yaa Sẽn-Ka-Saab no-rɛɛsã vẽnegr pʋgẽ:

⁸ Ad bũmb ning maam a Zakari sẽn yãnd badaar yʋngã: «Mam yãnda rao sẽn zao wed-zẽega, n yas tɩɩs sẽn tar maasem n be bog-zulungã pʋgã sʋka. La wiid sẽn yaa wed-zẽese, la wed-bĩis-naar ne wed-peels n dag n yas yẽnda poorẽ wã.»

⁹ Mam soka wed-rʋʋdã yaa: «M soaala, nin-bãmbã yaa ãnda rãmba?» La malɛɛk ning sẽn dag n gomd-a ne maamã yeela maam yaa: «Mam na n wilga foom bãmb sẽn yaa neb ninsi.»

¹⁰ La ned ning sẽn dag n yas tɩɩsã sẽn tar maasmã sʋk yeelame yaa: «Bãmb yaa neb nins Sẽn-Ka-Saab sẽn tʋm tɩ b saag n ges dũniyã.»

¹¹ Dẽ, bãmb yeela Sẽn-Ka-Saab malɛɛkã sẽn yas tɩɩsã sʋkã yaa: «Tõnd gilgame n ges dũniyã, la d mikame tɩ dũniyã gill bee vʋʋsg ne vɩ-bãan pʋga.»

¹² Sẽn-Ka-Saab malɛɛkã leb n yeelame yaa: «Saasẽ-Pãng-Soaba, yãmb na n basame n ka zoe Zeruzalɛm ne Zʋʋda tẽmsã nimbãaneg hal tɩ ta dabʋre? Bala, yãmb sũurã rag n yika ne bãmb hal yʋʋm pis-yopoe sẽn looge.»

¹³ La Sẽn-Ka-Saab leoka malɛɛk ning sẽn dag n gomda ne maamã ne pɛlg kengr koɛɛga, la raood paasg koɛɛga.

¹⁴ Dẽ, malɛɛk ning sẽn dag n gomda ne maamã yeela maam yaa: «Moon n yeel yaa: Ade, Saasẽ-pãng-soabã yetame: ‹Mam nonga Zeruzalɛm, mam nonga Sɩyõ hal wʋsgo,

¹⁵ la mam sũurã yika wʋsg ne buud nins sẽn vɩ-bãanã. Mam sũurã yaool n dag n yika bilf bala. La bãmb leb n wa paasa toogã.»

¹⁶ Rẽ kɩtame tɩ Sẽn-Ka-Saab yetẽ yaa: «Mam na n lebg n waa Zeruzalɛm ne nimbãan-zoeere, b na n lebs n mee mam doogã beenẽ.» Yaa Saasẽ-Pãng-Soabã n yeele. La b na n tẽega wĩir n lebs n me Zeruzalɛm.

¹⁷ Malɛɛkã leb n yeela maam yaa: «‹Moon yɛs n yeel tɩ Saasẽ-Pãng-Soabã yetame: Mam tẽmsã na n leb n paama bõn-sõama tɩ sek-ba. Sẽn-Ka-Saab na n leb n belsa Sɩyõ. Bãmb na n leb n yãka Zeruzalɛm.› »