Yikri 37 - WẼNNAAM SEBRE 2014

Kaoolã koglgo

¹ A Betsaleyɛll maana koglg ne akasiya raado, t'a woglmã yaa kãntɩɩg a yiib la pʋɩ-sʋka, t'a yalmã yaa kãntɩɩg a yembr la pʋɩ-sʋka, t'a zãntlmã me yaa kãntɩɩg a yembr la pʋɩ-sʋka.

² Yẽnda bolga a pʋgã ne a yɩngã ne sãnem halaale, n maan kogr ne sãnem n gilg a zugã.

³ La yẽnda rõoga sãnem tuiids sẽn yaa gils a naase, n ning a nao a naasã. Yẽnda ninga tuiids a yiibã kɩreng a yembre, la a ning a yiibã me kɩreng a to wã.

⁴ Yẽnda maana ra-bɩlem ne akasiya raado, n bolg bãmb ne sãnem.

⁵ Yẽnda tuii ra-bɩlmã tuiidsã koglgã kɩremse, n zã koglgã.

⁶ Yẽnda maana limd sẽn boond tɩ bas-taal zĩig ne sãnem halaale. A woglem yaa kãntɩɩg a yiib la pʋɩ-sʋka, a yalmã yaa kãntɩɩg a ye la pʋɩ-sʋka.

⁷ La yẽnda maana serubẽ-rãmb a yiib sẽn kud ne sãnem n ning bas-taal zĩigã kɩrems a yiibã.

⁸ Yẽnda maana serubẽ a yembr kɩreng a yembre, la maan a to wã me kɩreng a to. Serubẽ-rãmb a yiibã fãa sẽn be kɩrems a yiibã lagma taab n yaa bũmb a yembr ne bas-taal zĩigã.

⁹ Serubẽ-rãmbã tẽega b pɩgs a zug n lud bas-taal zĩigã. La bãmb teesa taaba. Serubẽ-rãmbã nems teesa bas-taal zĩigã.

Burã b sẽn kõtã taable

¹⁰ Yẽnda maana taabl ne akasiya raado. A woglem yaa kãntɩɩg a yiibu, a yalem yaa kãntɩɩg a yembre, la a zãntlem yaa kãntɩɩg a ye la pʋɩ-sʋka.

¹¹ Yẽnda luda taablã ne sãnem halaal n maan kogr ne sãnem n gilg-a.

¹² La yẽnda maana ra-pɩʋʋgds sẽn zems nug-bi a naas n gilg-a. Yẽnda maana kogr ne sãnem n gilg ra-pɩʋʋgdsã.

¹³ Yẽnda maana sãnem tuiids a naas sẽn yaa gilsi, n ning bãmb a nao a naasã fãa sokr zĩisẽ.

¹⁴ Yẽnda ninga tuiidsã da-pɩʋʋgdsã kɩremse n tui da-bɩlem a bãmb pʋse n zã taablã.

¹⁵ Yẽnda maana ra-bɩlem ne akasiya raado, n bolg bãmb ne sãnem n na n zã taablã.

¹⁶ Yẽnda maana teed nins sẽn na n dogl taablã zug ne sãnem halaale, yaa laase, ne wũmbli, la tʋgdo la laas sẽn na n tall n pʋdg rãam n maan maando.

Fɩtl doagendg sẽn tar wil a yopoe

¹⁷ Yẽnda kuda sãnem halaal n maan fɩtl doagendgã. A naoorã ne a sɛɛgã, la a yoadã ne a puudã fãa yaa bũmb a yembre.

¹⁸ Wil a yoob n dag n be fɩtl doagendgã kɩremse. Wil a tãab rag n bee kɩreng a yembre, tɩ wil a tãab me be kɩreng a to wã.

¹⁹ Fɩtl doagendgã will a yembrã rag n tara laas a tãab sẽn yaa wa amand tɩɩg puudu, ne a yoadã, la a puudã, t'a will a to wã me rag n tar laas a tãab sẽn yaa wa amand tɩɩg puudu, ne a yoadã, la a puudã.

²⁰ Fɩtl doagendgã tɩɩg tara laas a naas ne puud sẽn wẽnd wa amand tɩɩg puudu, ne b yoadã, la b puudã.

²¹ Yodr a yembr n dag n be a pipi wil a yiibã tẽngre, tɩ yodr a yembr be wil a yiibã sẽn pʋgdã tẽngre, tɩ yodr a yembr me be yaoolem wil a yiibã tẽngre. Yɩɩ woto ne wil a yoobã fãa sẽn dag n yit be wã.

²² Yoadã ne wilã lagma taab n yaa bũmb a yembr ne fɩtl doagendgã sẽn maan ne sãnem halaal sẽn kudã.

²³ Yẽnda maana fɩtl-doagendgã fɩtl-dãmb a yopoe wã ne yʋʋse, la bug-zẽend laasã ne sãnem halaale.

²⁴ Yẽnda maana fɩtl doagendgã ne a teedã fãa ne sãnem halaal ne talã a yembre.

Wisd yõogr tẽn-kugri

²⁵ Yẽnda maana tẽn-kugr ne akasiya raado, tɩ b na n yõog wisd a zugu. A yaa maoko. A woglem yaa kãntɩɩg a yembre, a yalmã me yaa kãntɩɩg a yembre, la a zãntlmã yaa kãntɩɩg a yiibu. A yɩɩlã naaga ne a mengã.

²⁶ Yẽnda bolga a zugã ne a kɩremsã fãa ne a yɩɩlã ne sãnem, n maan sãnem kogr n gilg-a.

²⁷ Yẽnda maana sãnem tuiids a yiib-yiib a kɩrems a yiibã fãa yĩnga, n ning a kogrã tẽngre, a kɩremsã gõdgr zĩisẽ. Yaa tuiid-kãens la b na n tuiid ra-bɩlmã n zãad tẽn-kugrã.

²⁸ Yẽnda maana ra-bɩlmã ne akasiya raado, n bolg bãmb ne sãnem.

²⁹ Yẽnda maana nug-tikr kaam sẽn welg toore, ne wisd halaal sẽn tar yũ-noogo, wa parfẽ-maand sẽn maand to-to wã.