Yikri 36 - WẼNNAAM SEBRE 2014

¹ A Betsaleyɛll ne a Oholiyaab la tʋʋm-mitb nins fãa Sẽn-Ka-Saab sẽn kõ yam la yẽesem tɩ b maan tʋʋmã fãa sɛk roogã yĩngã maana bũmb fãa wa Sẽn-Ka-Saab sẽn yeelã.

² A Moyiis boola a Betsaleyɛll ne a Oholiyaab ne tʋʋm-mitb nins fãa Sẽn-Ka-Saab sẽn kõ yamã sẽn dat n wa sɩng tʋʋmdã ne yamleoogã.

³ La bãmb kẽnga a Moyiis nengẽ n tɩ reeg kũun nins fãa Israyɛll nebã sẽn tall n wa sɛk roogã meeb yĩngã. La yibeoog fãa nebã ket n tallda kũunã n wat yẽnda nengẽ ne yamleoogo.

⁴ La tʋʋm-mitb nins fãa sẽn maand sɛk roogã tʋʋmdã basa tʋʋm nins fãa bãmb sẽn maandã

⁵ n wa yeel a Moyiis yaa: «Nebã wata ne bũmb wʋsg n yɩɩd sẽn zems tʋʋm nins fãa Sẽn-Ka-Saab sẽn yeel tɩ b maanã.»

⁶ Dẽ, a Moyiis kõo noor tɩ b pɩʋʋg nebã sik zĩigẽ n moon n yeele: «Bɩ raopã ne pagbã ra leb n wa ne kũun sɛk zĩigã yĩng ye.» La yẽnda gɩdga nebã tɩ b ra leb n tall n wa ye.

⁷ Bala, bũmb nins nebã sẽn kõ wã yaa wʋsg n yɩɩd b sẽn tog n tall n tʋm tʋʋmdã.

Sɛk roogã

⁸ Tʋʋm-mitbã fãa sẽn tʋmd tʋʋmdã maana sɛk roogã ne pɛɛl piig sẽn wʋg ne lamd gĩs-bãanega, la gĩs sẽn yaa kẽeg haoo ne gĩs-moaama, la gĩs-miidu, la b gʋla serubẽ-rãmb pɛɛlã zutu. Rag sɩd yaa tʋʋm-mit tʋʋmde.

⁹ Peend a yembr fãa woglem yaa kãntɩɩg pisi la a nii, la a yalem yaa kãntɩɩg a naase. B maga pɛɛlã fãa tɩ b yaa bũmb a yembre.

¹⁰ B bogla pɛɛl a nu wã ne taaba, la a bogl a nu wã sẽn ketã me ne taaba.

¹¹ La b maana gãts ne gĩs sẽn yaa kẽeg haoo peendã noor kɩreng a yembr sẽn maan ne pɛɛl a nu sẽn bogl taabã, la b maana woto ne peend a yiib soabã me noor kɩreng a yembr sẽn maan ne pɛɛl a nu sẽn bogl taabã.

¹² B maana gãts pis-nu peend a yembrã zugu, la b maan gãts pis-nu peend a yiib soaba me kɩrenga. B ninga bãmb b yiibã fãa gãtsã tɩ b zems taaba.

¹³ La yẽnda maana sãnem sogds pis-nu n sog pɛɛlã ne taab tɩ b lebg roog a yembre.

¹⁴ Yẽnda wʋga pɛɛl ne bʋʋs kõbd sẽn na n lud sɛk roogã. Yẽnda wʋga pɛɛl piig la a yembre.

¹⁵ Peend a yembr fãa woglem yaa kãntɩɩg pis-tã, la a yalem yaa kãntɩɩg a naase. B maga pɛɛl piig la a yembrã tɩ b yalmã ne b woglmã zem taaba.

¹⁶ B bogla pɛɛl a nu wã ne taaba, la b bogl a yoobã sẽn kellã me ne taaba.

¹⁷ La b maana gãts pis-nu dẽenem peendã sẽn maan ne pɛɛl sẽn bogl taabã kɩreng a yembre. La b maana gãts pis-nu me n ning a yiib soabã sẽn maan ne pɛɛl sẽn bogl taabã kɩreng a yembre.

¹⁸ La b maana zũud sogds pis-nu n sog-a t'a lebg fu-roog a yembre.

¹⁹ La b maana lutg ne pe-raad gãnd sẽn monem fu-roogã yĩnga, la b maan lutg a to ne dofẽ-rãmb gãnd n pʋgl a zugã.

²⁰ B maana ra-pegdã sɛk roogã yĩnga. B maana bãmb ne akasiya raado, n yik-b n yals yĩngri.

²¹ Ra-peok a ye fãa woglem yaa kãntɩɩg piiga, la a yalem yaa kãntɩɩg a yembr la pʋɩ-sʋka.

²² Ra-peok fãa tara sogds a yiib sẽn na n sog bãmb ne taaba. B maana sɛk roogã ra-pegdã fãa woto.

²³ B maana ra-pegd sɛk roogã yĩnga. Kɩreng ning sẽn be goabgã yaa ra-pegd pisi, tɩ kɩreng ning sẽn be rɩtgã me yaa ra-pegd pisi.

²⁴ La b maana wanzuri nao pis-naas sẽn na n ning ra-pegd pisi wã tẽngre. Yẽnda ninga ra-peok fãa nao a yiib a sogds a yiibã yĩnga.

²⁵ B maana ra-pegd pisi sɛk roogã kɩreng ning sẽn be rɩtgã yĩnga,

²⁶ ne wanzuri nao pis-naas n ning bãmb yiib-yiib ra-peok a yembr fãa tẽngre.

²⁷ B maana ra-pegd a yoob sɛk roogã kɩreng ning sẽn teesd taoorã yĩnga.

²⁸ La b maana ra-pegd a yiib sɛk roogã lals gõdgr zĩis a yiibã sẽn be roogã yaangã yĩnga.

²⁹ Sẽn sɩng ne tẽngrã, bãmb bogla a yiibu, la bãmb zutã tɩ teeg taab yĩngr tuiidgã zĩigẽ. Lals a yiibã fãa gõdgr zĩis yɩɩ woto.

³⁰ Bãmb yaa ra-pegd a nii ne b wanzuri nao piig la a yoobe. Ra-peok a yembr fãa tẽngr tara nao a yiibu.

³¹ B maana akasiya da-bɩlem a nu sɛk roogã kɩreng a yembr da-pegd yĩnga,

³² la ra-bɩlem a nu a kɩreng a yiib soaba me ra-pegd yĩnga. La b maana ra-pegd a nu me sɛk roogã yaang sẽn teesd taoorã yĩnga.

³³ B maana ra-bɩlemd ning sẽn na n zĩnd sʋkã n pɩʋʋg ra-pegdã fãa sẽn sɩng ne lalgã noor a yembre, hal tɩ ta a noor a to wã.

³⁴ B luda ra-pegdã ne sãnem. La a maana sãnem tuiids sẽn yaa gils ra-bɩlmã yĩnga, n bolg ra-bɩlmã ne sãnem.

³⁵ B wʋga fu-lillidg ne gĩs sẽn yaa kẽeg haoo, la gĩs-moaam ne gĩs-miidu, la lamd gĩs-bãanega, yẽnda maan-a-la wa tʋʋm-mit sẽn maande, n gʋl serubẽ-rãmb a zugu.

³⁶ B maana akasiya ra-lugds a naas a yĩnga, n bolg bãmb ne sãnem. Bãmb yagendsã yaa sãnem. La b maana wanzuri nao a naas b yĩnga.

³⁷ B maana fu-lillidg sẽn na n ning fu-roogã noor ne gĩs sẽn yaa kẽeg haoo, la gĩs-moaam ne gĩs-miidu, la lamd gĩs-bãaneg sẽn tar tʋʋm-mitbã nug tʋʋmd a zugu.

³⁸ La b maana fu-lillidgã ra-lugds a nu wã ne b yagendsã, n bolg bãmb pugli wã ne sãnem n ning yagendsã bãmb zutu. La b maana bãmb nao a nu wã ne zũudu.