Yikri 34 - WẼNNAAM SEBRE 2014

Tõogã kug-wal-paalse

¹ Sẽn-Ka-Saab yeela a Moyiis yaa: «Pees kug-wals a yiib sẽn zems wa pĩnd-dãmbã. Mam na n gʋlsa m goam nins sẽn dag n be dẽenem kug-wals nins fo sẽn wã wã zutã b zugu.

² Segl f meng n dʋ Sinayi tãngã zug beoog zĩ-yẽegr wakate, n yals beenẽ mam taoore.

³ Bɩ ned da tũ foom n dʋ tãngã ye, la bɩ ned da kẽng n ta zĩig baa a yembr tãngã zug me ye. La sẽn paase, bɩ rũm-bãooneg ne rũm-bɛd me ra kolg tãngã pend n wãb yamd ye.»

⁴ La a Moyiis peesa kug-wals a yiib sẽn zems wa pĩnd-dãmbã. La yibeoog pĩnda, yẽnda zãa kug-wals a yiibã a nugẽ n dʋ Sinayi tãngã zug wa Sẽn-Ka-Saab sẽn yeel yẽnda wã.

⁵ La Sẽn-Ka-Saab siga sawaodgã pʋgẽ n yals beenẽ ne yẽnda. Yẽnda pʋʋsa ne Sẽn-Ka-Saab yʋʋre.

⁶ Sẽn-Ka-Saab looga yẽnda taoor n moon n yeele: «Mam yʋʋr yaa Sẽn-Ka-Saabo, yaa Sẽn-Ka-Saab sẽn yaa Wẽnnaam sẽn yaa nimbãan-zoɛta, la bark kõata. Mam sũur ka yikd tao-tao ye, la mam yaa nonglem soaba, la m maanda sɩda.

⁷ La mam maanda sɩd hal tɩ ta zamaan tusri, n kõt neb sugr b beegrã ne b kɩɩsgã la b yel-wẽnã fãa yĩnga. La baoosgo, mam ka na n bas yãmb taal y beegrã yĩng ye. Mam na n kɩtame tɩ ba-rãmbã beegrã sɩbgr zĩnd bãmb kambã zutu, la bãmb yagensã zut hal tɩ ta zamaan a tãabo, la ne a naase.»

⁸ Dẽ, tao-tao bala, a Moyiis sulgame hal n tãag tẽng n wõgemde.

⁹ La yẽnda yeelame: «M Zu-soaba, yãmb sã n nonga maam, baa nebã sũyã sã n yaa kegemse, mam kotame tɩ y yãag tõndo. La y kõ tõnd sugr d kongrã ne d yel-wẽnã yĩnga. La tõnd na n yɩɩ yãmb dẽnda.»

Kaoolã palengo

¹⁰ Sẽn-Ka-Saab yeelame yaa: «Ade, mam na n maana kaool ne foom. Mam na n maana bõn-bãnd fo nebã fãa taoore, yaa bõn-bãnd sẽn nan zɩ n maan buud baa a yembr sʋk dũniyã pʋgẽ ye. La nebã fãa sẽn be ne foomã na n yãnda Sẽn-Ka-Saab tʋʋmdã sẽn sek zoeesã, mam sẽn na n tall foom n maanã.

¹¹ Gũus neer n sak bũmb ning mam sẽn wilgd foom dũndã wã. La mam na n diga Amoor-dãmbã ne Kana-rãmbã la Hɛt-dãmbã ne Perɛɛz-rãmbã la Hevi-rãmbã ne Zebuuz-rãmbã fo taoore.

¹² Fo sã n ta zĩig ning fo sẽn dabdã, bɩ f gũus n da wa maan kaool ne tẽngã nebã, tɩ b lebg wa bẽdg yãmb sʋk ye.

¹³ La bɩ y sãam bãmb tẽn-kugã ne b kug-vigindsã bãmb sẽn viglã, la y kɛ bãmb wẽn-naandg a Aseera ra-lugdsã n lubi.

¹⁴ Bɩ y ra wõgemd wẽnnaam a to taoor ye. Sẽn-Ka-Saab yaa sũ-kiir soaba, bãmb yaa Wẽnnaam sẽn yaa sũ-kiir soaba.

¹⁵ Ra maan kaool ne tẽngã neb ye. Bãmb sẽn maand yoob ne b wẽnnaam-dãmbã yĩnga, bɩ b ra wa bool foom tɩ f naag-b n dɩ bãmb wẽn-naandsã maand nemd ye.

¹⁶ La bɩ f ra peeg bãmb kom-pugli n kõ f kamb tɩ b maan b pagb ye, tɩ bãmb kom-pugli wã sẽn maand yoob ne b wẽnnaam-dãmbã, ra wa kɩt tɩ fo kom-dibli wã maan yoob ne bãmb wẽnnaam-dãmbã ye.

¹⁷ Ra rõog kut bõn-naandg baa a yembre tɩ yɩ fo wẽnnaam ye.

¹⁸ Maan bur sẽn ka rã-bɩll tigrã. Rɩ bur sẽn ka rã-bɩll dasem a yopoe b sẽn yãk bõn-bɩʋʋng kiuugã pʋgẽ wã, wa mam sẽn yeel foomã. Bala, yaa bõn-bɩʋʋng kiuugã pʋgẽ la fo yi Ezɩpt tẽngã.

¹⁹ Bi-rẽeng buudã fãa sẽn deng n yi a ma pʋgẽ yaa maan n so. Yaa fo rũm-daoog fãa sẽn yaa bi-rẽega, rũmsã sʋka, sã n yaa nag-bila, pe-bila wall bulla.

²⁰ Rɩk pe-bila, wall bʋʋg n tek bõang fãa sẽn yaa a ma bi-rẽenga. La fo sã n ka rat n tek bõangã, bɩ f wẽ a kãar n wãage. La fo kom-dibli wã fãa sẽn yaa kom-dẽemsã. Bɩ ned da wa mam taoor ne nug-vɩɩd ye.

²¹ Tʋm dasem a yoobe, la f vʋʋs rasem a yopoe wã daare. Vʋʋse, baa sã n yaa peseng wakat bɩ tigsg wakate.

²² Yʋʋmdã vẽkre, bɩ f maan dasem a yopoe-poe tigrã sẽn yaa bõn-koaadlã dẽenem biis kẽebgã, n paas tigsgã tigrã.

²³ Yʋʋmd fãa pʋgẽ, bɩ raop nins fãa sẽn be ne foomã wa Zu-soab a Sẽn-Ka-Saab sẽn yaa Israyɛll Wẽnnaamã taoor naoor a tãabo.

²⁴ Bala, mam na n diga buud wʋsg tɩ b zoe fo taoore, la mam na n yalga fo soolmã. Fo sã n kẽng Sẽn-Ka-Saab sẽn yaa fo Wẽnnaamã nengẽ naoor a tãab yʋʋmd fãa pʋgẽ, ned ka be sẽn na n bao tɩ soog fo tẽngã ye.

²⁵ Ra lagem bur sẽn tar dã-bɩll ne maoong zɩɩm ye. Ra bas Pak tigrã maoong nemd tɩ kell n vẽeg beoog ye.

²⁶ Tall fo tẽn-gãongã dẽenem biisã sẽn yaa sõama n yɩɩdã n wa Sẽn-Ka-Saab sẽn yaa fo Wẽnnaamã roogẽ. Da rʋg-y bull a ma bĩisim pʋg ye.»

²⁷ Sẽn-Ka-Saab yeela a Moyiis yaa: «Gʋls gom-kãensã. Bala, yaa ne gom-kãensã la mam maand kaool ne foom, la ne Israyɛlle.»

²⁸ A Moyiis paa ne Sẽn-Ka-Saab rasem pis-naase, n ka rɩ rɩɩbo, la a ka yũ koom ye. La yẽnda gʋlsa kãabg goamã sẽn yaa tõod piigã kug-walsã zutu.

A Moyiis lebg n waa tãb-sikẽ wã

²⁹ A Moyiis siga Sinayi tãngã zugu, la yẽnda rag n zãada kaset kug-wals a yiibã a nugẽ. Yẽnda sẽn wa n sigd tãngã zugã, a rag n ka mi tɩ yẽnda sẽn gom ne Sẽn-Ka-Saabã kɩtame tɩ yẽnda nengã pɩnd ye.

³⁰ A Aarõ ne Israyɛll nebã fãa yãndame t'a Moyiis nengã pɩndame. Dẽ, bãmb zoee rabeem n ka rat n kolg-a ye.

³¹ A Moyiis boola bãmba. La a Aarõ ne Israyɛll nebã nanambsã fãa waa yẽnda nengẽ, la a Moyiis goma ne bãmba.

³² Dẽ poorẽ, Israyɛll nebã fãa yaool n kolgame, la yẽnda togsa bãmb bũmb nins fãa Sẽn-Ka-Saab sẽn togs yẽnda Sinayi tãngã zugã.

³³ La a Moyiis sẽn gom ne bãmb n sɛ, yẽnda luda a nengã ne peende.

³⁴ La a Moyiis sã n kẽng Sẽn-Ka-Saab nengẽ n na n tɩ gom ne bãmba, a pilgda peendã, hal tɩ yẽnda yi sɛk roogã pʋgẽ. La yẽnda sã n yi, a togsda Israyɛll nebã bũmb nins fãa Sẽn-Ka-Saab sẽn togs yẽnda wã.

³⁵ Israyɛll nebã yãndame t'a Moyiis nengã pɩndame. Dẽ, a Moyiis lebgd n luda a nengã ne peendã yɛsa, hal tɩ ta yẽnda sẽn na n leb n kẽ n gom ne Sẽn-Ka-Saabo.