Yikri 33 - WẼNNAAM SEBRE 2014

Wẽnaam yeelame tɩ b yi Sinayi n looge

¹ Sẽn-Ka-Saab yeela a Moyiis yaa: «Bɩ foom ne neb nins fo sẽn yiis Ezɩpt soolem pʋgẽ wã yi ka n kẽng tẽng ning mam sẽn dag n kãab a Abrahaam ne a Izak la a Zakoob n yeel tɩ m na n kõo bãmb yagensã.

² Mam na n tʋma mam malɛɛk t'a reng foom taoore. La mam na n diga Kana-rãmbã ne Amoor-dãmbã la Hɛt-dãmbã ne Perɛɛz-rãmbã la Hevi-rãmbã ne Zebuuz-rãmbã.

³ Kẽng-y tẽng ning sẽn tar bĩisim ne sɩɩd wʋsgã. La mam ka na n yãag yãmb ye, mam sã n yãag yãmba, mam na n wa sãama yãmb sorã zugu. Bala, yãmb yaa neb sũy sẽn yaa kegemse.»

⁴ Nebã sẽn wʋm koe-kãng sẽn yaa toogã, b sũyã sãamame. La ned baa a yembr ka yeelg a fan-teed ye.

⁵ Sẽn-Ka-Saab yeela a Moyiis t'a yeel Israyɛll nebã yaa: «Yãmb sũyã yaa kegemse, mam sã n wa yãmb sʋk wakat bilf bala, mam na n sãama yãmba. La moasã, bɩ y yiis y fan-teedã tɩ mam bãng mam sẽn na n maan yãmb bũmb ninga.»

⁶ Dẽ, sẽn sɩng ne bãmb sẽn be Hoorɛɛb tãngã, Israyɛll nebã yiisa b fan-teedã.

Sɛk roogã

⁷ La a Moyiis rɩka fu-roog n yi kɛɛng n tɩ tilg n zãag ne sik zĩigã bilfu. La yẽnda pʋda a yʋʋr tɩ sɛk roogo. La neb nins fãa sẽn dag n baood Sẽn-Ka-Saabã yii sik zĩigẽ wã n kẽng sɛk roogã sẽn dag n be kɛɛngã.

⁸ La a Moyiis sã n yi sik zĩigẽ wã n dabd sɛk roogã sẽn beẽ wã, ned kam fãa yikame n yals a rignoorẽ n get a Moyiis hal tɩ yẽnda tɩ kẽ fu-roogẽ wã.

⁹ La a Moyiis sẽn kẽ fu-roogẽ wã, sawad-taokã sigame n yals rignoorẽ wã. La Sẽn-Ka-Saab rag n gomda ne a Moyiisi.

¹⁰ Nebã fãa rag n nee sawad-taokã sẽn sigd n yals sɛk roogã rignoorẽ wã. Dẽ, bãmb yikdame, tɩ ned kam fãa wõgemd a fu-roog noore.

¹¹ Sẽn-Ka-Saab rag n gomda ne a Moyiis neng ne neng wa ned sẽn gomd ne a zoa. La a Moyiis sã n wa lebg n lebd sik zĩigẽ wã, bi-bɩɩg a Zozoe sẽn yaa yẽnda sõangda, n yaa a Nun biigã ka yit fu-roogẽ wã ye.

Sẽn-Ka-Saab sõsda ne a Moyiisi

¹² A Moyiis yeela Sẽn-Ka-Saab yaa: «Ade, yãmb n yeel maam tɩ m yik n tall nin-bãmbã n looge! La yãmb yaool n ka wilg maam yãmb sẽn na n tʋm a soab t'a yãag maam ye. Baoosgo, yãmb yeelame: ‹Mam mii foom ne f yʋʋre, la fo tara bark mam nifẽ me.›

¹³ Moasã, sã n yaa tɩ mam paama bark yãmb nifẽ, mam kotame tɩ y kɩt tɩ mam bãng yãmb soayã, dẽ, mam na bãng yãmba, n kell n paam bark yãmb nifẽ. Ade, nin-bãmbã yaa yãmb mengã nebã!»

¹⁴ La Sẽn-Ka-Saab yeelame: «Mam mengã n na n yãag foom, la mam na n kõo foom vʋʋsgo.»

¹⁵ A Moyiis yeela Sẽn-Ka-Saab yaa: «Yãmb meng sã n ka na n yãag tõndo, bɩ y ra sak tɩ tõnd yi ka ye.

¹⁶ Dẽ, yaa ne bõe la ned na n bãng tɩ maam ne yãmb nebã paama bark yãmb nifẽ? Ka yãmb sẽn yãagd tõndã yĩng sɩda? Yaa rẽ yĩng la maam ne yãmb nebã yaa toor ne neb a taabã fãa sẽn be dũniyã zugã.»

¹⁷ Sẽn-Ka-Saab yeela a Moyiis yaa: «Mam na n maana wa fo sẽn kosã kɛpɩ. Bala, fo paama bark mam nifẽ, la mam mii foom ne f yʋʋre.»

¹⁸ A Moyiis yeelame: «Mam kotame tɩ y wilg maam yãmb ziirã.»

¹⁹ La bãmb yeelame: «Mam na n kɩtame tɩ mam sõmblmã fãa lʋɩ fo taoore, la m wilg foom m yʋʋrã sẽn yaa Sẽn-Ka-Saabo, la mam na n ninga m sẽn dat n ning a soab zug barkã barka, la m zoe mam sẽn dat n zoe a soab nimbãanegã nimbãanega.»

²⁰ La bãmb yeelame: «Fo ka tõe n yãnd mam nengã ye. Bala, ninsaal ka tõe n yãnd maam n ket n vɩ ye.»

²¹ Sẽn-Ka-Saab leb n yeelame: «Ad zĩig sẽn pẽ ne maam. Yals pĩigã zugu.

²² La mam ziirã sã n tũud beenẽ n loogdẽ, mam na n kẽesa foom pĩig bokẽ. La mam sẽn wat loogdẽ wã wakate, mam na n luda foom ne m nugu.

²³ La m sã n wa loog n sɛ, m na n yaool n yãka m nugã tɩ f yãnd mam kudgã. Bala, ned ka tõe n yãnd mam nengã ye.»