Yikri 32 - WẼNNAAM SEBRE 2014

Sãnem nag-bila

¹ Nebã sẽn yãnd t'a Moyiis kaoosda tãngã zug n ka sigdã, bãmb tigma taab a Aarõ nengẽ n yeel yẽnda yaa: «Maan wẽnnaam n kõ tõnd t'a lʋɩ tõnd taoor n tɛ tõndo. Bala, Moyiis-kãngã, rao ning sẽn yiis-a tõnd Ezɩpt tẽngã, tõnd ka mi bũmb ning sẽn paam-a ye.»

² La a Aarõ yeela bãmb yaa: «Bɩ y yãgs sãnem tʋb-londã sẽn be yãmb pagbã tʋbẽ wã, la yãmb kom-dibli wã ne y kom-pugli wã tʋbẽ wã n wa kõ maam.»

³ Nebã fãa yãgsa sãnem tʋb-londã sẽn be bãmb tʋbẽ wã n wa kɩs a Aarõ.

⁴ La yẽnda reega sãnemã bãmb nugẽ, n ning-a boaag pʋg n dõog sãnem nag-bila. La nebã yeelame: «Israyɛll nebã, wẽnnaam-dãmb nins sẽn yiis-b yãmb Ezɩpt tẽngã la woto.»

⁵ La a Aarõ sẽn yãnd bõn-kãnga, yẽnda maana tẽn-kugr sãnem nag-bilã taoore. La yẽnda mooname n yeele: «Beoog na n yɩɩ tigr Sẽn-Ka-Saab waoogr yĩnga.»

⁶ Nebã yika yibeoog pĩnd n maan maand sẽn yõogd bugum, la b wa ne zems-n-taar maando. Nebã zĩndame n dɩ la b yũ, la b yik n maan deem.

⁷ Dẽ, Sẽn-Ka-Saab yeela a Moyiis yaa: «Lebg n sigi. Bala, fo nebã fo sẽn yiis Ezɩpt tẽngã sãama b mense.

⁸ Bãmb basa sor ning mam sẽn wilg bãmbã tao-tao. Bãmb maana sãnem nag-bila, n wõgemd a taoore, n maan maand a yĩng n yeele: ‹Israyɛll nebã, wẽnnaam-dãmb nins sẽn yiis-b yãmb Ezɩpt tẽngã la woto.› »

⁹ Sẽn-Ka-Saab yeela a Moyiis yaa: «Mam yãame tɩ nin-bãmbã sũyã yaa kegemse.

¹⁰ La moasã, bas tɩ mam sũ-kãbrã wɩng n dɩ-ba. Mam na n kɩtame tɩ buud sẽn yaa kãseng yi fo pʋgẽ.»

¹¹ La a Moyiis baoome n na n sigs Sẽn-Ka-Saab sẽn yaa yẽnda Wẽnnaamã sũuri. Yẽnda soka bãmb yaa: «Sẽn-Ka-Saabo, yaa bõe tɩ yãmb sũur kãbd wʋsg ne yãmb nebã yãmb sẽn yiis Ezɩpt ne pãn-kãsenga, la ne nug sẽn tar pãngã?

¹² Yaa bõe tɩ Ezɩpt nebã na n yeele: ‹Wẽnnaam yiisa bãmb Ezɩpt tẽngã n na n tɩ kʋ-b tãmsã sʋka, tɩ b buudã menem tẽng zugu!› Bas-y yãmb sũ-kãbrã, la y ra maan y nebã wẽng ning y sẽn dag n dat n maan-bã ye.

¹³ Tẽeg-y yãmb tʋmtʋmdb a Abrahaam ne a Izak la a Israyɛll yãmb sẽn dag n wẽen ne bãmb ne yãmb meng yʋʋr n yeel tɩ: Mam na n kɩtame tɩ yãmb yagensã fɩɩg n lebg wʋsg wa ãds sẽn be yĩngrã. Mam na n kõo yãmb yagensã tẽng ning mam sẽn dag n gom a yellã n yeel t'a na n yɩɩ bãmb pʋɩɩr wakat sẽn ka sɛtã.»

¹⁴ Dẽ, Sẽn-Ka-Saab basame n ka maan bãmb nebã wẽng ning bãmb sẽn dag n yeel tɩ b na n maaname wã.

¹⁵ A Moyiis lebg n yii tãngã zug n sigi. La yẽnda rag n zãada kaset kug-wals a yiibã a nugẽ. Gʋlsem n dag n be kug-walsã nems a yiib fãa zutu, b poorẽ la b taoore.

¹⁶ Kug-walsã yaa Wẽnnaam n maane, la gʋlsmã yaa Wẽnnaam n gʋlse, tɩ wẽnd wa ned sẽn gʋls ne kɩtg kug-wals zutu.

¹⁷ A Zozoe sẽn wʋm nebã sẽn kaasdã, yẽnda yeela a Moyiis yaa: «Zabr kelems n be nebã sik zĩigẽ wã!»

¹⁸ La a Moyiis leokame yaa: «Yõwã ka tõogr yɩɩl ye. La yɩɩlã ka wẽnd b sẽn tõog neb tɩ b yɩɩndẽ me ye. Mam sẽn wʋmd bũmb ningã yaa neb sẽn yɩɩnd n deesd taaba!»

¹⁹ La bãmb sẽn kolg nebã sik zĩigã n yãnd nag-bilã la nebã sẽn saood warbã, a Moyiis sũur yika wʋsg t'a lob kug-walsã tẽng tɩ b wã tãngã sɛɛga.

²⁰ Dẽ, yẽnda rɩka nag-bil ning b sẽn maanã n yõog bugum n wer-a t'a lebg zom-bãanega, la yẽnda rɩk-a lame n fẽrg koomã pʋgẽ n kɩt tɩ Israyɛll nebã yũ-a.

²¹ La a Moyiis soka a Aarõ yaa: «Nebã maana foom bõe tɩ fo sak tɩ yel-wẽn-kẽeng a woto wa bãmb zugu?»

²² La a Aarõ leokame: «M zu-soaba, da puug-y y sũur ye. Yãmb meng mii nin-bãmbã sẽn yaa neb ninsi. Bãmb datmã yaa tɩ maan wẽnga.

²³ Nebã yeela maam yaa: ‹Maan wẽnnaam n kõ tõnd t'a lʋɩ tõnd taoor n tɛ-do. Bala, Moyiis-kãngã, rao ning sẽn yiis-a tõnd Ezɩpt tẽngã, tõnd ka mi bũmb ning sẽn paam-a ye.›

²⁴ La mam yeela bãmb yaa: ‹Bɩ neb nins fãa sẽn tar-b sãnem teedã yãgs-b n wa ne. La bãmb dɩk-b lame n wa kõ maam. La mam dɩka sãnem te-bãmb n ning bugmẽ, la nag-bi-kãngã yii beenẽ.»

Sɩbgre

²⁵ La a Moyiis sẽn yãnd tɩ nebã wegmame t'a Aarõ me kell n bas bãmb b wegengã pʋgẽ tɩ b lebg nin-faad b bɛɛbã sʋkã.

²⁶ Yẽnda yalsa sikã zĩig noor n yeele: «Neb nins fãa sẽn dat Sẽn-Ka-Saabã, wa-y mam nengẽ ka.» La Leevi buudã fãa wa n tigma taab yẽnda nengẽ.

²⁷ La yẽnda yeela bãmb yaa: «Sẽn-Ka-Saab sẽn yaa Israyɛll Wẽnnaamã yetame: ‹Ned kam fãa bob a sʋʋg n pɩʋʋg sik zĩigẽ wã, sẽn sɩng ne noor a yembre, n tɩ tãag noor a to, n kʋ a ba-biiga, a zoa la a roagda.»

²⁸ La Leevi buud nebã saka a Moyiis noore, la badaar bala, nebã sʋka, neb tus a tãab n ki.

²⁹ Dẽ, a Moyiis yeelame: «Rũndã, a bee yãmb zug tɩ y ges maan-kʋʋr tʋʋmdã yell Sẽn-Ka-Saab waoogr yĩnga, tɩ bark zĩnd yãmb zug moasã. Bala, yãmb ned kam fãa kisga a biiga la a ba-biiga.»

A Moyiis kota sugr Israyɛll nebã yĩnga

³⁰ Vẽkembeoogo, a Moyiis yeela nebã yaa: «Yãmb kongame n maan yel-wẽn-kãsenga. La mam na n kẽnga Sẽn-Ka-Saab nengẽ moasã. Daarninga, mam na n paama sugr yãmb yel-wẽnã yĩnga.»

³¹ La a Moyiis lebg n leba Sẽn-Ka-Saab nengẽ n tɩ yeele: «M Zu-soabã, m kãntɩɩga! Nin-kãensã maana yel-wẽn-kãsenga. Bãmb maana sãnem wẽnnaam b mensã yĩnga.

³² Baoosgo, kõ-y bãmb b yel-wẽnã sugri. La yãmb sã n ka na n kõ bãmb b yel-wẽnã sugri, m kotame tɩ y yẽes mam yʋʋrã yãmb sẽn dag n gʋls yãmb sebrã pʋgẽ wã.»

³³ Sẽn-Ka-Saab yeela a Moyiis yaa: «Yaa ned ning sẽn beeg maamã yʋʋr la m na n yẽes m sebrã pʋga.

³⁴ Moasã, kẽng n tɩ tall nebã tɩ b ta zĩig ning mam sẽn wilg foomã. La ade, mam malɛɛkã na n lʋɩɩ fo taoore. Baoosgo, mam sũ-kãbrã daare, mam na n sɩbga bãmb b kongrã yĩnga.»

³⁵ La Sẽn-Ka-Saab sɩbga nebã, nag-bil ning bãmb ne a Aarõ sẽn maanã yĩnga.