Yikri 30 - WẼNNAAM SEBRE 2014

Wisd yõogr tẽn-kugri

¹ Maan tẽn-kugr sẽn na n yõogd wisd a zugu. Maan-a ne akasiya raado.

² A woglmã na n yɩɩ kãntɩɩg a yembre, a yalmã me kãntɩɩg a yembre, a tog n yɩɩ maoko, a zãntlmã na n yɩɩ kãntɩɩg a yiibu. Maan yɩɩl n ning-a.

³ Lud a zugã ne a kɩrems a yiibã fãa, la a yɩɩlã ne sãnem halaale. La f maan sãnem kogr n gilg-a.

⁴ La f maan sãnem tuiids a yiib a kɩrems a yiibã fãa yĩnga, n ning bãmb a kogrã tẽngre, a kɩremsã gõdgr zĩisẽ. Bãmb yaa tuiids sẽn na n tui da-bɩlem n zã tẽn-kugrã.

⁵ La f maan da-bɩlem ne akasiya raado, n bolg bãmb ne sãnem.

⁶ Bɩ f rɩgl tẽn-kugrã fu-lillidg ning sẽn lill kaset koglgã taoore, la sẽn be bas-taal zĩigã sẽn be kaset koglgã zugã taoorã. Yaa zĩ-kãng la mam na n seg foom.

⁷ Bɩ a Aarõ yõog wisd sẽn tar yũ-noog a zugu. Yẽnda na n yõogd-a-la yibeoog fãa, yẽnda sẽn wat n manegd fɩtl-dãmbã wakate.

⁸ A Aarõ sã n na n yõgen fɩtl-dãmbã zaabre, bɩ a yõog-a. Yaa woto la yãmb na n yõog wisd wakat fãa Sẽn-Ka-Saab taoor yãmb zamaan-dãmbã fãa.

⁹ Bɩ y ra yõog wisd yaar a zug ye. La bɩ y ra yõog maoong bɩ zom kũun a zug ye. La y ra pʋdg bõn-yũudl kũun a zug me ye.

¹⁰ Yʋʋmd fãa pʋgẽ, bɩ a Aarõ yãk yel-wẽnã maoong zɩɩm vugr n ning tẽn-kugrã yɩɩlã zut n maan paoosg a yĩnga. Yaa vugr yʋʋmd pʋgẽ la yẽnda na n maan paoosg a zugu, yãmb zamaan-dãmbã fãa yĩnga. Bõn-kãng na n yɩɩ bũmb sẽn welg toor meng-meng Sẽn-Ka-Saab yĩnga.

Sɛk roogã yaoodo

¹¹ Sẽn-Ka-Saab goma ne a Moyiis n yeel-a yaa:

¹² «Fo sã n sõd Israyɛll nebã n bãng b sõore, bɩ f kɩt tɩ ned Kam fãa yao Sẽn-Ka-Saab a yõor yaoodo, tɩ bã-loangdg da wa yõk bãmb b sõdbã yĩng ye.

¹³ Ad yaood ned kam fãa b sẽn sõd sẽn tog n yao. Yaa wanzuri ligd zɩslem sẽn zems garem a yopoe la bɛka, sẽn zems sɛk roogã sɩkɛll pʋɩ-sʋka. Sɩkɛll yaa geera pisi. Yaa yaood bãmb sẽn na n yao Sẽn-Ka-Saabo.

¹⁴ Neb nins b sẽn na n sõdã fãa, sẽn sɩng ne neb nins sẽn tar yʋʋm pisi la sẽn yɩɩd woto wã na n yaoo Sẽn-Ka-Saab b yõor yaoodo.

¹⁵ La wakat ning yãmb sẽn na n yao Sẽn-Ka-Saab yãmb yõor yaoodã, arzɛk rãmbã ka na n yao sẽn yɩɩd ye, la naong rãmbã me ka na n yao sẽn ka ta sɩkɛll pʋɩ-sʋk ye.

¹⁶ Bɩ y reeg wanzuri Israyɛll nebã nengẽ tɩ yɩ b yõor yaood sɛk roogã tʋʋmã yĩnga, tɩ yɩ tẽegr Israyɛll nebã yĩng Sẽn-Ka-Saab taoore, na n yɩɩ bãmb mengã yaoodo.»

Yɩlg-m-meng sĩnga

¹⁷ Sẽn-Ka-Saab goma ne a Moyiis n yeele:

¹⁸ «Maan zũud sĩnga, t'a naoã yaa zũudu, waasg yĩnga. Rɩk-a n dɩgl sɛk roogã ne tẽn-kugrã sʋka, n ning koom a pʋgẽ.

¹⁹ A Aarõ ne a kom-dibli wã na n yãka koomã be n nudg b nusi la b waas b naoã.

²⁰ Bãmb sã n na n kẽ sɛk roogẽ wã, bɩ b nudg b nusi, la b waas b naoã ne ko-kãnga, n da wa ki ye. La bãmb sã n na n kolg tẽn-kugrã me n maan b tʋʋmde, n yõog maoong bugum Sẽn-Ka-Saab waoogr yĩnga,

²¹ bɩ b nudg b nusi, la b waas b naoã, n da wa ki ye. A na n yɩɩ no-tũudg sẽn ka sɛta, a Aarõ ne a yagensã yĩnga, zamaan woo zamaane.»

Kaam sẽn welg toore

²² Sẽn-Ka-Saab goma ne a Moyiis n yeele:

²³ «Rɩk parfẽ buud toor-toor sẽn yaa sõama wʋsgo, rɩk miir halaal kɩlo a nii la garem koabg la pis-nii la a nu, la sinamom sẽn tar yũ-noog sẽn zems miirã zɩslem pʋɩ-sʋka, sẽn dat n togs tɩ kɩlo a naase la garem pis-wɛ la a tãabo, la parfẽ sẽn tar yũ-noog sẽn zems kɩlo a naase, la garem pis-wɛ la a tãabo,

²⁴ la kass sẽn zems kɩlo a nii la garem koabga la pis-nii la a nu, sẽn zems sɛk roogã sẽn tar n makd bũmb zɩslem, la oliiv kaam sẽn zems litr a yoob la bɛka.

²⁵ Rɩk bõn-kãens fãa n maan nug-tikr kaam sẽn welg toore, n yaa kaam buud toor-toor sẽn kalem taaba, t'a yɩ wa parfẽ maand sẽn maand to-to wã. A na n yɩɩ nug-tikr kaam b sẽn tar n maand welg toor tʋʋmdã.

²⁶ Yãk ka-kãng n tik sɛk roogã ne kaset koglgã,

²⁷ la taablã ne a teedã fãa, la fɩtl doagendgã ne a teedã fãa, la tẽn-kugr ning b sẽn na n yõog wisd a zugã,

²⁸ la tẽn-kugr ning b sẽn na n yõog maand bugum a zugã ne teedã fãa, la sĩngã me ne a tɛbendgã.

²⁹ Welg-y bãmb tɩ b lebg bũmb sẽn welg toor wʋsgo. La bũmb sã n sɩɩs bãmba, bõn-kãng me na n welga toore.

³⁰ La bɩ f pʋdg kaam a Aarõ ne a kom-dibli wã zutu, n welg bãmb toor tɩ b maan maan-kʋʋr tʋʋmdã mam waoogr yĩnga.

³¹ Togs Israyɛll nebã tɩ kaam bu-kãng sẽn pʋdgd maan-kʋʋdbã zutã welga toor mam yĩnga, yãmb zamaan-dãmbã fãa yĩnga.

³² B ka tog n dɩk ka-kãngã n sõog ned yaar ye. La yãmb ka tog n maan kaam sẽn wẽnd ka-kãng buudu, wa sẽn zems teed nins yãmb sẽn tall n maan-a wã ye. Ka-kãng yaa bũmb sẽn welg toore, la a na n yɩɩ bũmb sẽn welg toor yãmb yĩnga.

³³ Ned sã n maan ka-kãngã buudu, wall ned sã n ning-a ned sẽn ka maan-kʋʋd zugu, bɩ b yiis-a a buud sʋk n kʋ.»

Wisdã maanego

³⁴ Sẽn-Ka-Saab yeela a Moyiis yaa: «Rɩk kaam buud toor-toor b sẽn boond tɩ ɛstakte ne onigs la galbanom. Yaa parfẽ bu-kãens la wisd zom-bãanegã. Bãmb fãa zɩslem tog n zema taaba.

³⁵ Rɩk bõn-kãens n maan wisd sẽn tar yũ-noogo, wa sẽn maand-a parfẽ wã sẽn maand to-to wã. Maan-a t'a tar yamsem, n yaa sõama zãnga, n welg toore.

³⁶ Yãk-a n to t'a lebg bãanega, tɩ f yãk-a n ning kaset koglgã taoor sɛk roogã pʋgẽ, zĩig ning mam sẽn na n seg foomã. A na n yɩɩ bũmb sẽn welg toor wʋsg yãmb yĩnga.

³⁷ Bɩ y ra maan wisd a woto buud yãmb mensã yĩng ye. Ne foom, a na n yɩɩ bũmb sẽn welg toor Sẽn-Ka-Saab yĩnga.

³⁸ Ned sã n maan wisd sẽn wẽnd a woto buudu, n na n kok a yũ-noogã, bɩ b yiis a soab a buudã sʋk n kʋ.»