Yikri 28 - WẼNNAAM SEBRE 2014

A Aarõ ne a kambã lebga maan-kʋʋdba

¹ «Bool f kẽem a Aarõ ne a kom-dibli wã tɩ b yi Israyɛll nebã sʋk n wa fo nengẽ, n wa maan maan-kʋʋr tʋʋmd mam waoogr yĩnga. Yaa a Aarõ ne a kom-dibli wã, a Nadaabe, ne a Abihu la a Eleyazaar ne a Itamaare.»

Maan-kʋʋr kãsmã fuugu

² «Maan fut sẽn welg toor n kõ f kẽem a Aarõ, sẽn na n wilg yẽnda a zĩiga, la a naam.

³ Gom ne tʋʋm-mitb nins fãa mam sẽn kõ yamã tɩ b maan a Aarõ futã tɩ b welg toore, yẽnda sẽn kʋʋd maand mam taoorã yĩnga.

⁴ Ad fut nins bãmb sẽn na n maanã: yaa yãoog lutga, ne maan-kʋʋr kãsem fuugu, la fu-yor-bil ne fuug sẽn kãde, la zu-vindga, ne sẽbdga. Bɩ bãmb maan fut sẽn welg toor n kõ f kẽemã ne a kom-dibli wã tɩ b maand maan-kʋʋr tʋʋmd mam taoore.

⁵ Bɩ bãmb dɩk sãnem gĩsi, ne gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãaneg n maan-ba.»

Maan-kʋʋrã fuugu

⁶ «Bɩ b maan maan-kʋʋr kãsem fuug sẽn wʋg ne sãnem gĩsi, la gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã, tʋʋm-mitbã sẽn maandã.

⁷ B tog n ninga bãg-tabd a yiib a zĩis a yiibã, n tong fuugã taoor ne a poorẽ.

⁸ Bɩ b kell n sẽ maan-kʋʋr kãsem fuugã sẽbdga t'a tabend ne fuugã menga, ne sãnem gĩsi la gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã.

⁹ Gʋls Israyɛll buudã yʋy onigs kug a yiib zut ne kɩtga.

¹⁰ Gʋls yʋy a yoob kugr a ye zugu, la f gʋls yʋy a yoobã me kugr a to zug wa sẽn zems kãsem pʋgdg-pʋgdga.

¹¹ Gʋls Israyɛll kambã yʋy kug a yiib zut wa tʋʋm-mitb sẽn dɩkd kɩtg n gʋlsd kug n maand bãndã. Ning kugã sãnem gãtsã pʋsẽ.

¹² Ning kug a yiibã fãa maan-kʋʋr kãsem fuugã bãgdẽ. Bãmb na n yɩɩ kug Israyɛll nebã tẽegr yĩnga. Yaa woto la a Aarõ na n zã bãmb yʋyã a bãgd a yiibã zutu, n tẽegd bãmb yell Sẽn-Ka-Saab taoore.

¹³ Maan sãnem loetse,

¹⁴ ne sãnem halaal sogl-bãooneg a yiibu, n kal bãmb wa wĩiri. Tong soglã sẽn kalã ne gãtsã.»

Yãoog lutgã

¹⁵ «Maan yãoog lutg sẽn wilgd bʋʋdo. Tog n yɩɩ tʋʋm-mitb n na n tʋm-a, wa b sẽn tʋm maan-kʋʋr kãsem fuugã to-to wã. Yaa ne sãnem gĩsi, la gĩs sẽn yaa miuug masɩ, la sẽn yaa kẽeg haoo, ne gĩs-moaama, la gĩs-miidu, ne lamd gĩs-bãanegã.

¹⁶ Maan-a ne pɛɛl a yiib sẽn pʋgl taaba, t'a yɩ maoko. A woglmã tog n zemsa nug-yakemd a yembre t'a yalmã me zems nug-yakemd a yembre.

¹⁷ Rɩk kug nins fo sẽn na n ning gãtsã pʋsẽ wã, n munums yãoog lutgã zug ruls a naasã pʋga. Maan dẽenem dulgã ne sardoan la topaaz ne emerood kuga.

¹⁸ B tog n maana rulg a yiibẽ soabã ne ɛskarbukli, la ne safɩɩre, ne diyama kuga.

¹⁹ Rulg a tãabẽ soabã tog n yɩɩ ne opalle, la ne agate, ne ametist kuga.

²⁰ La rulg a naasẽ soabã tog n yɩɩ ne kirzoliti, ne onigsi, la ne zaspe kuga. B na n ninga bãmb sãnem gãtsã pʋsẽ.

²¹ Kugã yʋy ne b sõorã na n zemsa a Israyɛll kom-dibli wã piig la a yiibã yʋyã. Bɩ b gʋls bãmb zut ne kɩtg tɩ b lebg wa bãnde, kugr fãa ne a yʋʋre, sẽn yaa yʋʋr a yembr Israyɛll buud piig la a yiibã sʋka.

²² Maan sãnem halaal sogle, n kal-a wa wĩir n ning yãoog lutgã zugu.

²³ Maan sãnem tuiids a yiib sẽn yaa gils yãoog lutgã yĩnga, n ning-b a kɩrems a yiibã gõdgr zĩisẽ.

²⁴ Tong sãnem wĩy a yiibã ne tuiids a yiibã sẽn be yãoog lutgã kɩrems a yiibã gõdgr zĩisẽ wã.

²⁵ Tong wĩy a yiibã noy ne gãtsã sẽn be maan-kʋʋr kãsem fuugã bãgdẽ wã taoorã.

²⁶ La f maan sãnem tuiids a yiib n ning bãmb yãoog lutgã kɩrems a yiibã gõdgr zĩisẽ, n ning bãmb pʋgẽ, n tablg ne maan-kʋʋr kãsem fuugã.

²⁷ Maan sãnem tuiids a yiib n ning maan-kʋʋd kãsem fuugã taoor bãgdã tẽngre, zĩig ning sẽbdgã sẽn tong ne fuugã.

²⁸ Tui gĩs sẽn yaa kẽeg haoo yãoog lutgã tuiidsẽ, ne tuiids nins sẽn be maan-kʋʋr kãsem fuugẽ wã, n loe tɩ yãoog lutgã kell n pa sẽbdgã zug n ka tõe n lak n bas fuugã ye.

²⁹ La a Aarõ sã n kẽed sɛk roogã pʋgẽ, a na n zãa Israyɛll buudã yʋy a sũurẽ, wa sẽn gʋls yãoog lutgã sẽn wilgd bʋ-kaoorã zugã, tɩ yɩ tẽegr Sẽn-Ka-Saab taoor daar fãa.

³⁰ Ning urim ne tumim yãoog lutgã sẽn wilgd bʋ-kaoorã pʋgẽ, t'a Aarõ sã n wa Sẽn-Ka-Saab taoore, bɩ be a yãoogẽ wã. Woto, a Aarõ na n zãa Israyɛll nebã bʋ-kaoor a yãoogẽ daar fãa Sẽn-Ka-Saab taoore.»

Maan-kʋʋr fut a taaba

³¹ «Maan fu-yor-bil maan-kʋʋr kãsem fuugã yĩnga, ne gĩs sẽn yaa kẽeg haoo bala.

³² Kɩbg fuugã loor peendã tẽn-sʋka, n kõog a noorã ne peend t'a yɩ wa gãong fuug loore, t'a ra wa kẽeg ye.

³³ La f maan gernaad-dãmb sẽn yaa kẽeg haoo ne gĩs-moaama, la gĩs-miidu, n ning fuugã noor tẽngr n gilgi. La f maan sãnem bugl n ning fuugã tẽngr n gilgi.

³⁴ La f ning sãnem buglã ne gernaad-rãmb n lɩʋʋs taab n gilg fuugã noor zãnga.

³⁵ Bɩ a Aarõ yeelg fu-kãng wakat ning fãa yẽnda sẽn maand maan-kʋʋr kãsem tʋʋmdã, tɩ b wʋm buglã rãamd yẽnda sẽn wat n kẽed Sẽn-Ka-Saab taoor sɛk roogã pʋgẽ, la yẽnda sẽn wat n yit wakate. Woto, yẽnda ka na n ki ye.

³⁶ Maan rĩ-tɛɛg ne sãnem halaale, la f gʋls a zugã ne kɩtga tɩ yɩ wa bãnde. A gʋlsmã na n yɩɩ woto: Welga toor Sẽn-Ka-Saab yĩnga.

³⁷ La f ning yẽnda loɛtg sẽn yaa kẽeg haoo t'a zĩnd zu-vindgã taoore.

³⁸ A na n zĩnda a Aarõ dĩirẽ wã t'a Aarõ zɩ yel-wẽnã sẽn tũud ne kũuni la maand fãa Israyɛll nebã sẽn welg n kõtẽ wã. A na n zĩnda yẽnda dĩirẽ wã daar fãa, tɩ bãmb tõe n ta Sẽn-Ka-Saab yam.

³⁹ Wʋg fuug ne lamd gĩs-bãanega, la f maan zu-vindg ne lamd gĩs-bãanega. La f wʋg sẽbdg sẽn kãde, t'a yaa neere.»

Maan-kʋʋdb a taabã futu

⁴⁰ «Maan fu-yerd n kõ a Aarõ kom-dibli wã. La f maan sẽbds ne pugli me n kõ bãmba, sẽn na n wilg tɩ b tara b zĩiga la b ziiri.

⁴¹ Yeelg f kẽem a Aarõ ne a kom-dibli wã ne fu-kãense. La f pʋdg kaam bãmb zut n ning tʋʋmdã bãmb zutu, n welg bãmb toor tɩ b maan maan-kʋʋr tʋʋmd mam taoore.

⁴² Maan lamd gĩs-bãaneg kur-koees n kõ bãmb tɩ b sẽgen n lud b yãndã, sẽn sɩng ne b seesã tɩ tãag b gɛy wã.

⁴³ A Aarõ ne a kom-dibli wã sã n wa na n kẽ sɛk roogã pʋgẽ, wall b sã n wa na n kolg tẽn-kugrã n maan sɛk zĩigã tʋʋmde, b tog n sẽgna kur-bãmba, tɩ yel-wẽnã ra zĩnd bãmb zut tɩ b wa ki ye. Bõn-kãng na n yɩɩ no-tũudg sẽn ka sɛta, a Aarõ ne a yagensã sẽn na n pʋgl yẽnda wã yĩnga.»