Yikri 27 - WẼNNAAM SEBRE 2014

Maandã tẽn-kugri

¹ «Maan-y tẽn-kugr ne akasiya raado. Maan-y-yã-a t'a woglmã yɩ kãntɩɩg a nu, t'a yalmã me yɩ kãntɩɩg a nu. Maan-a maoko. Maan-a t'a zãntlmã yɩ kãntɩɩg a tãabo.

² Maan yɩɩl a kɩremsã gõdgr zĩis a naasẽ wã. Maan-a yɩɩlã tɩ b yɩ yembr ne tẽn-kugrã, la f bolg-a ne zũudu.

³ Rɩk zũud n maan tẽn-kugrã teed fãa, maan laas sẽn tar n wʋkd tompeglem sẽn lagem ne kaam, la pɛll-dãmb ne maoong zɩɩm laase, la nemd kõsds ne bugum laase. Maan a teedã fãa ne zũudu.

⁴ Maan zũud gãmbr a yĩnga, la f maan zũud tuiids a naas sẽn yaa gilsi n ning gãmbrã kɩrems a naasã gõdgr zĩisẽ.

⁵ Yagl-a tẽn-kugrã kogrã tẽngre tɩ gãmbrã noor a ye ta tẽnga, t'a noor a ye wã me ta tẽn-kugrã zãntlem pʋɩ-sʋka.

⁶ Maan-y akasiya ra-bɩlma, n bolg bãmb ne zũudu.

⁷ Bɩ y tui ra-bɩlmã tuiidsã pʋsẽ, tɩ ra-bɩlmã zĩnd tẽn-kugrã kɩrems a yiibã fãa a zãabã yĩnga.

⁸ Maan tẽn-kugrã ne ra-pegdo, t'a pʋgã yɩ yoko. Maan-a tɩ zems mamsg ning mam sẽn wilg foom tãngã zugã.»

Sɛk roogã zaka

⁹ «Maan sɛk zĩigã zaka. Maan zakã kɩreng ning sẽn teesd nug-goabgã ne lamd gĩs-bãanega. A kɩreng a yembrã woglem tog n yɩɩ kãntɩɩg koabga.

¹⁰ Lugl da-lugds pisi zũud nao pisi wã zutu, n maan da-lugdsã yagends ne b bãensã ne wanzuri.

¹¹ La a kɩreng ning sẽn teesd nug-rɩtgã me tog n yɩɩ woto. A pɛɛlã tog n zemsa kãntɩɩg koabg wa zakã woglmã. La bɩ f lugl da-lugdsã pisi wã zũud nao pisi wã zutu, n maan da-lugdsã yagendsã ne b bãensã ne wanzuri.

¹² La zakã pɛɛl nins sẽn be nin-taoorã na n zemsa zakã yalem: A na n yɩɩ kãntɩɩg pis-nu. La bãmb da-lugdsã na n yɩɩ piiga ne b nao piiga.

¹³ La zakã kɩreng ning sẽn teesd yaangã yalem na n yɩɩ kãntɩɩg pis-nu.

¹⁴ Zakã rignoor kɩreng a yembrã rata pɛɛl yalem sẽn zems kãntɩɩg piig la a nu, ne bãmb ra-lugds a tãabã, la b nao a tãabã.

¹⁵ Zĩig ning sẽn be zakã noor kɩreng a yiib soabã me rata pɛɛl yalem sẽn zems kãntɩɩg piig la a nu, ne bãmb ra-lugds a tãabã ne b nao a tãabã.

¹⁶ Zakã noor fu-lillidgã yalem na n zemsa kãntɩɩg pisi, sẽn wʋg ne gĩs sẽn yaa miuug masɩ, la sẽn yaa kẽeg haoo, ne gĩs-moaama la gĩs-miidu, ne lamd gĩs-bãanegã, tʋʋm-mitbã sẽn maandã. B tog n ning-a-la ra-lugds a naas ne b nao a naase.

¹⁷ Ra-lugds nins fãa sẽn gũbgd zakã tog n tonga taab ne wanzuri bãense, tɩ yagendsã yaa wanzuri, tɩ b naoã yaa zũudu.

¹⁸ Zakã woglem tog n yɩɩ kãntɩɩg koabga, la a yalmã tog n yɩɩ kãntɩɩg pis-nu, t'a zãntlmã yaa kãntɩɩg a nu. Wʋg a pɛɛlã ne lamd gĩs-bãanega, la f maan a naoã ne zũudu.

¹⁹ B tog n maana sɛk zĩigã tʋʋm teed fãa ne a biili wã fãa, la zakã biili wã fãa ne zũudu.»

Kaam fɩtl-dãmbã yĩnga

²⁰ «Foom, bɩ f yeel Israyɛll nebã tɩ b tall oliiv kaam bãmb sẽn wõd n wa kõ foom, tɩ f ning fɩtlã tɩ vẽenem zĩnd daar fãa.

²¹ Yaa sɛk roogã pʋgẽ, zĩig ning sẽn ka ta fuug sẽn lillid kaset koglgã, la bɩ a Aarõ ne a kom-dibli wã ges fɩtl-dãmbã yelle, tɩ b wid Sẽn-Ka-Saab taoor zaabr tɩ ta yibeoogo. Yõwã na n yɩɩ no-tũudg sẽn ka sɛta, Israyɛll yagensã zamaan fãa yĩnga.»