Yikri 25 - WẼNNAAM SEBRE 2014

WẼNNAAM LUGLA B ROOGÃ ISRAYƐLL NEBÃ SƲKA Kũun Sɛk roogã yĩnga

¹ Sẽn-Ka-Saab yeela a Moyiis yaa:

² «Togs Israyɛll nebã tɩ b bao kũun n kõ maam. Reeg kũun ned kam fãa nengẽ sẽn kõt ne yamleoogo.

³ Ad kũun nins yãmb sẽn na n deeg bãmb nengẽ wã: yaa sãnem ne wanzuri la zũudu,

⁴ ne gĩs sẽn yaa kẽeg haoo la gĩs-moaama, ne gĩs-miidu, la lamd gĩs-bãanega, ne gĩs sẽn maan ne bʋʋs kõbdo,

⁵ la pe-raad gãnd sẽn moneme, ne dofẽ-rãmb gãndo, la akasiya raado,

⁶ ne kaam fɩtl-dãmbã yĩnga, la parfẽ-rãmb sẽn tar yũ-noog nug-tikr kaamã ne wisdã yĩnga,

⁷ la onigs kuga, ne kug a taab sẽn na n ning maan-kʋʋr kãsem fuugã, la yãoog lutgã.

⁸ Bɩ bãmb maan doog mam yĩnga, tɩ mam tõe n zĩnd bãmb sʋka.

⁹ Bɩ yãmb maan sɛk zĩigã ne a teedã fãa tɩ zems wa mam sẽn na n wilg foomã.»

Kaset koglgo

¹⁰ «Bɩ bãmb maan koglg ne akasiya raado. A woglmã na n yɩɩ kãntɩɩg a yiib la pʋɩ-sʋka, la a yalmã na n yɩɩ kãntɩɩg la pʋɩ-sʋka, la a zãntlmã na n yɩɩ kãntɩɩg la pʋɩ-sʋka.

¹¹ La bɩ f bolga a pʋgã ne a yɩngã ne sãnem halaale. La f maan kogsr sẽn yaa sãnem n gilg a zugã.

¹² Rõog sãnem tuiid-gils a naas n ning bãmb a kɩrems a naasẽ wã. Ning tuiids a yiibã kɩreng a yembre, la f ning tuiids a yiibã me a kɩreng a to wã.

¹³ Maan ra-bɩlem ne akasiya raado, n bolg bãmb ne sãnem.

¹⁴ Rɩk ra-bɩlmã n tui tuiidsã sẽn be koglgã kɩremsã, tɩ b tar bãmb n zãad koglgã.

¹⁵ Ra-bɩlmã tog n paa koglgã tuiidsã pʋse. Ra yiis bãmb ye.

¹⁶ Ning kaset kug-wals nins mam sẽn na n kõ foomã koglgã pʋga.

¹⁷ Maan limd sẽn boond tɩ bas-taal zĩig ne sãnem halaale. A woglmã tog n yɩɩ kãntɩɩg a yiib la pʋɩ-sʋka, la a yalmã tog n yɩɩ kãntɩɩg la pʋɩ-sʋka.

¹⁸ Kud sãnem n maan serubẽ-rãmb a yiibu. Maan a yembre bas-taal zĩigã kɩreng a yembre, la f maan a yembrã me a kɩreng a to wã.

¹⁹ Maan serubẽ a yembr a kɩreng a yembre, la f maan serubẽ a to a kɩreng a yembrã me, tɩ serubẽ-rãmb a yiibã fãa sẽn be kɩrems a yiibã fãa sũgun ne bas-taal zĩigã sẽn yaa limdã sẽn yaa sãnemã n yaa a yembre.

²⁰ Serubẽ-rãmbã pɩgsã tog n tẽegame n lud bas-taal zĩigã. B nensã tog n teesa taaba. B nensã tog n teesa bas-taal zĩigã.

²¹ Ning kaset kug-walsã mam sẽn na n kõ foomã koglgã pʋgẽ, la f fõgen koglgã ne a limdã sẽn yaa bas-taal zĩigã.

²² Yaa beenẽ la mam na n seg foom. Mam na n goma ne foom bas-taal zĩigã zugẽ, serubẽ-rãmb a yiibã sẽn be kaset koglgã zugẽ wã sʋka, n kõ foom mam noyã fãa Israyɛll nebã yĩnga.»

Burã taable

²³ Maan taabl ne akasiya raado. A woglmã tog n yɩɩ kãntɩɩg a yiibu, a yalmã kãntɩɩg a yembre, a zãntlmã kãntɩɩg a ye la pʋɩ-sʋka.

²⁴ Lud-a ne sãnem halaale. Maan kogsr ne sãnem n gilg a zãngã.

²⁵ Maan da-pɩʋʋgds a naas sẽn zems nug-bi a naas n gilg-a. Maan kogsr ne sãnem n gilg ra-pɩʋʋgdsã.

²⁶ Maan sãnem tuiids a naase n ning a nao a naasã sokr zĩisẽ.

²⁷ Ning tuiidsã ra-pɩʋʋgdsã kɩrems tɩ b tui ra-bɩlmã bãmb pʋsẽ n zã taablã.

²⁸ Maan da-bɩlem ne akasiya raado, n bolg bãmb ne sãnem n tar bãmb n zãad taablã.

²⁹ Maan laase, la wũmbli, ne tʋgdo, la laas maandã pʋdgr yĩnga. Maan bãmb ne sãnem halaale.

³⁰ Fo na n dogla burã b sẽn kõt maamã taabl ning sẽn be mam taoorã zug wakat fãa.

Fɩtl doagendgã

³¹ «Maan fɩtl doagendg ne sãnem halaale. Maan-a ne sãnem sẽn kudi. Maan a naoorã ne a sɛɛgã la a laasã ne a yoadã la a puudã fãa tɩ yɩ bũmb a yembre.

³² Wil a yoob n na n zĩnd fɩtl doagendgã kɩremse. Wil a tãab na n zĩnda a kɩreng a yembre, tɩ wil a tãab me zĩnd a kɩreng a to wã.

³³ Will a yembr zugu, b tog ninga laas a tãab sẽn wẽnd amand tɩɩg bila, n tar yoad ne puudu, la will a to wã me zugu, b tog ninga laas a tãab sẽn wẽnd amand tɩɩg bila, n tar yoad ne puudu. B tog n maana a woto ne wil a yoobã fãa sẽn be fɩtl doagendgã zugã.

³⁴ Maan fɩtl doagendgã, n ning laas a naas sẽn wẽnd amand tɩɩg bila, n tar yoad ne puudu.

³⁵ Bɩ b maan yodr a yembr n ning a pipi wil a yiibã tẽngre, la yodr a yembr a wil a yiib nins sẽn pʋgdã tẽngre, la yodr a yembr a yaoolem wil a yiibã me tẽngre. A na n yɩɩ woto ne wil a yoobã sẽn yit fɩtl doagendgẽ wã.

³⁶ Fɩtl-dãmbã yoad ne b wilã na n yɩɩ bũmb a yembr ne fɩtl doagendgã. Bãmb fãa na n yɩɩ ne sãnem halaale b sẽn kudi, n yaa bũmb a yembre.

³⁷ Maan fɩtl-dãmb a yopoe. Dogl fɩtl-dãmbã a zugu, tɩ bãmb vẽenem yãg fɩtl doagendgã taoore.

³⁸ B tog n maana a yʋʋsã ne tom-peglem laasã ne sãnem halaale.

³⁹ Bɩ b rɩk sãnem halaal talã a yembr n maan fɩtl doagendgã ne a teedã fãa.

⁴⁰ La bɩ f gũusi, n maan bãmb tɩ b zems mamsg ning mam sẽn wilg foom tãngã zugã.»