Yikri 23 - WẼNNAAM SEBRE 2014

Ka-pãens rãmbã nanebo

¹ «Da rɩk zĩrẽ koɛɛg n saag ye. Ra naag ne nin-wẽng n kɩs zĩrẽ kaset ye.

² Ra lagem neb n maan wẽnga, b sẽn yaa wʋsgã yĩng ye. Ra kɩs kaset kegr bʋʋd wakate, fo sẽn dat n tũ neb wʋsgã yĩng ye.

³ Ra sõng ned bʋʋd zĩigẽ, a sẽn yaa naong soab yĩng ye.

⁴ Fo bɛ loalg bɩ a bõang sã n menem tɩ f yãnd-a, bɩ f yõk-a n tɩ kõ-a.

⁵ Fo sã n yãnd zɩɩb sẽn zɩsg f bɛ bõang t'a lʋɩ bɩ f ra loog n bas-a ye. Sõng-a n sik a bõangã zɩɩbo.

⁶ Ra kɩt tɩ b kao naong soab bʋʋd kegr ye.

⁷ Zãag f meng ne zĩrẽ goamã. Ra kʋ ned sẽn yaa bʋʋm soab la nin-tɩrg ye. Bala, mam ka na kõ nin-wẽng bʋʋm ye.

⁸ Ra sak n deeg zãmb kũun ye. Bala, zãmb kũun luta yam dãmb nini, la a golemd nin-tɩrs goamã.

⁹ Ra nams sãan ye. Bala, yãmb mens mii sãand vɩɩm yelle. Bala, yãmb yɩɩ sãamb Ezɩpt tẽnga.»

Vʋʋsg yʋʋmdã noyã

¹⁰ «Bʋd f pʋʋgã yʋʋm a yoobe, n tigs a bõn-koaadlã biisi.

¹¹ Yʋʋm a yopoe soabã, bɩ f bas-a t'a vʋʋse, tɩ naong rãmbã sẽn be ne foomã wʋk n dɩ, tɩ we-rũms rɩ bãmb sẽn bas bũmb ninsã. Maan woto ne f reezẽ tɩɩs pʋʋgo, la f oliiv tɩɩsã me.

¹² Maan f tʋʋmdã rasem a yoobe, la rasem a yopoe wã daare, tog n yɩɩ vʋʋsg daar fo yĩnga, tɩ fo loalga, ne f bõang me vʋʋse, tɩ f yem-poak biig ne f sãan me paam n vʋʋse.»

Sẽn kẽed ne tigã wɛɛngẽ

¹³ «Sak-y bũmb nins fãa mam sẽn yeel yãmbã, la y ra pʋd wẽnnaam-dãmb a taab yʋy ye. Ra sak tɩ ned wʋm tɩ fo gomd b yell ye.»

¹⁴ «Yʋʋmd fãa, bɩ f maan tigr naoor a tãab n waoog maam.

¹⁵ Maan bur sẽn ka rã-bɩll tigr rasem a yopoe, n dɩ bur sẽn ka rã-bɩll wa mam sẽn yeel foom wakat ning mam sẽn yãk bõn-bɩʋʋng kiuugã pʋgẽ wã, bala, yaa ki-kãng pʋgẽ la fo yi Ezɩpte. Ned ka tog n wa mam taoor nug-zaal ye.

¹⁶ Maan f tʋʋmdã dẽenem biisã fo sẽn bʋd f pʋʋgẽ wã tigri. La f maan tigsg tigr sɩpaolgo, wakat ning fo sẽn wʋk f bõn-koaadlã biis n wa yirã.

¹⁷ Yʋʋmd fãa, bɩ yãmb daopã fãa wa yals Sẽn-Ka-Saab sẽn yaa Soaalã taoor naoor a tãabo.

¹⁸ Ra lagem bur sẽn tar dã-bɩll ne mam maoongã zɩɩm ye. Yãmb sã n kʋ tigr maoong n na n waoog maam, bɩ y ra bas a kaamã tɩ gãand n vẽeg beoog ye.

¹⁹ Tall fo dẽenem biisã n wa Sẽn-Ka-Saab sẽn yaa fo Wẽnnaamã roogẽ. Da rʋg-y bull a ma bĩisim pʋg ye.»

Kãab-nood ne sagls sẽn deng kẽndã

²⁰ Ade, mam tʋmda malɛɛk t'a lʋɩ yãmb taoore, n gũ yãmb kẽndã fãa pʋgẽ, la a tall yãmb n taas zĩig ning mam sẽn seglã.

²¹ Gũus-y neere, n sak koɛɛg ning fãa yẽnda sẽn na n togs yãmbã. Ra kɩt tɩ yẽnda sũur yik ye. Sã n ka rẽ, yẽnda ka na n kõ yãmb sugr y beegrã yĩng ye. Bala, mam yʋʋr bee yẽnda pʋgẽ.

²² Fo sã n sak yẽnda koɛɛgã neere, n sak bũmb nins fãa mam sẽn yeelã, mam na n lebga fo bɛɛbã bɛ, la mam na n namsa neb nins sẽn namsd foomã.

²³ Mam malɛɛkã na n lʋɩɩ fo taoor n yãag foom tɩ f ta tẽng ning Amoor-dãmbã ne Hɛt-dãmbã la Ferɛɛz-rãmbã ne Kana-rãmbã la Hevi-rãmbã ne Zebuuz-rãmbã sẽn be wã. La mam na n menesa bãmb zãnga.

²⁴ Ra wõgemd bãmb wẽnnaam-dãmbã taoor n waoog-b ye. La f ra maan wa bãmb sẽn maandã ye. Lub bãmb tẽn-kugã b sẽn luglã n wã.

²⁵ Bɩ y sak Sẽn-Ka-Saab sẽn yaa yãmb Wẽnnaamã. La bãmb na n ninga yãmb dɩɩbã ne y ko-yũudmã barka. La mam na n yiisa bãas yãmb sʋka.

²⁶ Yãmb pag ba a yembr pʋg kõn sãame, la kiir kõn zĩnd yãmb soolmã pʋgẽ me ye. La mam na n kɩtame tɩ f vɩɩmd n kaoose.

²⁷ Mam na n tʋma mam yɛɛsg tɩ reng yãmb taoore, la m na n kɩtame tɩ rabeem kẽ neb nins fãa yãmb sẽn na n kẽng b sʋkã, la m kɩt tɩ y rig y bɛɛbã fãa tɩ b zoe.

²⁸ Mam na n tʋma kãnenkãas tɩ b reng yãmb taoor n dig Hevi-rãmbã ne Kana-rãmbã la Hɛt-rãmbã tɩ b zoe.

²⁹ La mam ka na n dig bãmb fãa tɩ b zoe yʋʋmd-yɛng pʋgẽ ye, tɩ tẽngã ra wa lebg we-raoogo, tɩ we-rũms lebg wʋsgo, tɩ wa lebg toog ne yãmb ye.

³⁰ La mam na n diga bãmb bilf-bilf hal tɩ wakat ta tɩ yãmb nebã wa rog n lebg wʋsgo, tɩ yãmb pãngã sek tɩ soog soolmã.

³¹ Mam na n kɩtame tɩ yãmb soolmã tɛk yɩ rudum ko-kãsengã noor tɩ ta Filisti ko-kãsengã noore, la we-raoogã tɛk tɩ ta kʋɩl-kãsengã noore. Bala, mam na n ninga tẽngã nebã yãmb nugẽ, la yãmb na n diga bãmb tɩ b zoe.

³² Ra sak n maan kaool ne bãmba, wall ne bãmb wẽnnaam-dãmbã me ye.

³³ Bɩ y ra sak tɩ bãmb zĩnd yãmb soolmã pʋgẽ ye. Sã n ka rẽ, bãmb na n wa kɩtame tɩ yãmb maan yel-wẽnd n beeg maam. Bala, yãmb na n waooga bãmb wẽnnaam-dãmbã, la, yõwã na n yɩɩ bẽdg yãmb yĩnga.