Yikri 22 - WẼNNAAM SEBRE 2014

¹ Wagdr sã n poog lalg n dat n kẽ tɩ ned ling-a n wẽ n kʋ, yẽnda zɩɩmã raagr taal ka na n zĩnd ned ning sẽn kʋ-a wã zug ye.

² La b sã n kʋ-a sõor pukr zugẽ, wagdrã zɩɩm daagr taal na n zĩnda ned ning sẽn kʋ-a yẽnda wã zugu. Wagdr sã n zuk bũmb tɩ b yõk-a, wagdrã tog n lebsa bũmb ning a sẽn zukã, la a sã n ka tar baa fɩ, b tog n koos-a lame n yao a sẽn zukã.

³ La b sã n yãnd rũng ning a sẽn zukã vɩɩg a nugẽ, sã n yaa naaf bɩ bõang wall pesgo, a na n lebsa rũms a yiibu.

⁴ Ned sã n wãbend a rũms a pʋʋgẽ ka rẽ bɩ a reezẽ tɩɩs pʋʋgẽ n bas rũmsã tɩ b tɩ kẽ n sãam ned a to pʋʋgo, yẽnda na n yaoo yaood sẽn zems pʋʋgã bõn-koaadlã, wall reezẽ tɩɩs pʋʋgã bõn-koaadlã a sẽn womd sõama wakate.

⁵ Ned sã n yõgen bugum t'a kok moog n tɩ rɩ ned ka-gina, wall kood sẽn bɩ, wall kood sẽn nan sɩngd bɩʋʋngo, bɩ sẽn yõgen-a bugmã yao bũmb ning fãa bugmã sẽn dɩ wã.

⁶ Ned sã n dɩk a ligd bɩ a teed n kɩs ned a to t'a bĩngi, tɩ wagdr wa kẽ n zuki, b sã n yãnd wagdrã, bɩ a yao bũmb ning a sẽn zukã naoor a yiibu.

⁷ La b sã n ka yãnd wagdrã, dẽ, bɩ yirã soab kolg Wẽnnaam taoor n kɩs kaset tɩ ka yẽnda n dɩk a to wã laogã ye.

⁸ Ned sã n yãnd bũmb a to nengẽ n yeel tɩ yaa yẽnda rẽnda, sã n yaa naaf bɩ bõanga, wall pesgo, wall bʋʋga, bɩ fuugu, wall bũmb sẽn meneme, bɩ bãmb b yiibã fãa tũ taab n wa Wẽnnaam nengẽ, la Wẽnnaam sẽn wilg t'a soab ka tar bʋʋmã na n yaoo a to wã naoor a yiibu.

⁹ Ned sã n dɩk a rũng n kɩs ned t'a bĩngi, sã n yaa bõang bɩ loalga, wall pesgo, bɩ bʋʋga, wall sẽn yaa rũng ning fãa, rũngã sã n ki, wall a kõbr n kaooge, wall wagdr n zuk tɩ kaset kaẽ,

¹⁰ bɩ bãmb b yiibã wa wẽen Sẽn-Ka-Saab taoor tɩ ka yakã n dɩk a to wã rẽnd ye. Bɩ rũngã soab sak wẽenegã, la bɩ a to wã ra yao bũmbã ye.

¹¹ La sã n yaa wagdr n zuk-a yẽnda nengẽ, bɩ a yao rũngã soaba.

¹² Sã n yaa we-rũng n yõk-a n wãbe, bɩ a tall sẽn ketã n wa tɩ yɩ kaseto. La bɩ a ra yao ye.

¹³ Ned sã n peng rũng ned a to nengẽ tɩ rũngã yĩng will sã n kaooge, wall a ki a soab sẽn ka be beenẽ wakate, bɩ sẽn peng-a rũngã yao.

¹⁴ La rũngã soab sã n be beenẽ, bɩ a ra yao ye. La b sã n dag n sara ne taab tɩ yẽnda na n yao rũngã soab rũngã tʋʋmdã yĩnga, bɩ a yao rũngã soab a tʋʋmdã yaoodo.

Nebã ne taab vɩɩm yelle

¹⁵ Rao sã n belg pʋg-sad sẽn nan ka tar baood n gãand-a, bɩ a soab yao sẽn zems pag beleng yaoodo, la a reeg-a tɩ yɩ a paga.

¹⁶ La baa pʋg-sadã ba sã n ka sak n na n kõ yẽnda a bi-puglã, bɩ a yao ligd sẽn zems pʋg-sad beleng yaoodo.

¹⁷ Ra sak n bas bag sẽn yaa tɩɩm soab t'a vɩɩmd ye.

¹⁸ Ned sã n gãand rũng bɩ b kʋ-a.

¹⁹ Ned sã n maan maoong n kõ wẽnnaam-dãmb a taab tɩ ka Sẽn-Ka-Saabo, bɩ b welg a soab n sãam-a.

²⁰ Ra wẽg sãana, la f ra nams-a ye. Bala, yãmb me rag n yaa sãamb Ezɩpt tẽnga.

²¹ Ra nams pʋg-kõor ne kɩɩb ye.

²² Fo sã n nams bãmb tɩ b kelem n bool maam, mam na n wʋma bãmb kɛlengã.

²³ La mam sũur na n yika wʋsg tɩ m kɩt tɩ y pa tãpẽ, tɩ y pagbã lebg pʋg-kõapa, tɩ y kambã me lebg kɩɩbse.

²⁴ Fo sã n dɩk f ligd n peng mam nebã ned a yembr sẽn yaa naong soab n be ne foom, bɩ f ra maan yẽnda wa ned sẽn peng fo ligd ye. Fo ka tog n kɩt tɩ yẽnda yao ne roagleng ye.

²⁵ Fo sã n deeg ned fu-goabg a sẽn tar fo samd yĩnga, bɩ f lebs-a a fu-goabgã tɩ wĩndg nan ka kẽ ye.

²⁶ Bala, a ka tar fu-goabg a to ye. Yaa rẽndã la yẽnda me tar n pindẽ. Yẽnda na n pila bõe n gãande? Yẽnda sã n kelem n bool maam, mam na n wʋmame. Bala, mam yaa nimbãan-zoeer soaba.

²⁷ Ra tʋʋs Wẽnnaam ye. La f ra kãab f nebã naab wẽng ye.

²⁸ Ra kaoos n yãk f bõn-koaadl dẽenem biisi, wall fo reezẽ rãam sẽn na n deng n yi reezẽ wẽkr koglg pʋgẽ wã ye. La bɩ f rɩk f bi-rẽeng n kõ maam.

²⁹ La bɩ f maan woto ne f rũm-bɛdã la f rũm-bãoonegã me. Rũm-dẽeng tog n paa ne a ma rasem a yopoe. La rasem a nii wã daare, bɩ f tall-a n wa kõ maam.

³⁰ Yãmb na n yɩɩ neb sẽn welg toor mam yĩnga. Woto, bɩ y ra wãb rũng we-rũms sẽn kʋ nemd ye. Rɩk-y-yã-a n lob baase.