Yikri 21 - WẼNNAAM SEBRE 2014

Tõod sẽn kẽed yembs wɛɛngẽ

¹ «Ad noy nins fo sẽn na n wilg nebã:

² Fo sã n da yamb sẽn yaa Ebre buudã neda, yẽnda na n tʋma yʋʋm a yoobe, la yʋʋm a yopoe wã, yẽnda na n yii ne lohorem n ka yao bũmb ye.

³ Yẽnda sã n dag n wa a yembre, yẽnda na n leb n yi a yembr bala. La a sã n dag n waa ne a paga, a pagã na n tũ-a lame n yi.

⁴ Yẽnda zu-soabã sã n kõ yẽnda paga, t'a pagã rog kom-dibli la kom-pugli, pagã ne a kambã yaa yẽnda zu-soabã n so, yẽnda na n yi a yembr bala.

⁵ La yambã sã n yeel t'a nonga a zu-soabã ne a pagã, la a kambã, tɩ la a ka rat tɩ b kõ-a lohorem t'a yi,

⁶ bɩ a tall-a n wa Wẽnnaam taoore, n kɩt t'a kolg kʋɩlengã, wall lugrã sɛɛgẽ t'a zu-soabã vʋdg a tʋbrã ne pĩim. La yẽnda na n kell n yɩ a zu-soabã yamb a yõor tɛka.

⁷ La ned sã n koos a bi-pugl t'a lebg yem-poakã, bi-pugl-kãng sẽn lebg yem-poakã ka na n yi a yembdã pʋg wa yem-daad sẽn yit to-to wã ye.

⁸ La a soaalã sã n ka rat-a, bɩ a tɩ lebs-a la a reeg a ligdi. Yẽnda ka tar noor tɩ koos-a ne sãan ye. Bala, yẽnda belg-a lame.

⁹ La yẽnda sã n dat n dɩk-a n kõ a meng biiga, bɩ a maan-a wa sẽn zems b noor ning sẽn kẽed kom-pugli wɛɛngẽ wã.

¹⁰ La a sã n peeg pag a to, bɩ a ra boog dẽenem soabã rɩɩbo, wall a fut ye. Yẽnda tog n kell n kẽeda ne pipi pagã wa sẽn zems kãadem tõogo.

¹¹ Yẽnda sã n ka maan bõn-kãensã a tãabã n kõ yem-poakã, yem-poakã tõe n yiime n ka kɩs bũmbu, wall a yao ligd ye.»

Beegr sẽn tõe n kɩt tɩ b kʋ neda

¹² «Ned sã n wẽ a to n kʋ, bɩ b kʋ a soabã.

¹³ La yẽnda sã n ka maan ne pʋ-toogo, la yaa Wẽnnaam n kɩt t'a nug maane, mam na n wilga foom zĩig yẽnda sẽn tõe n zoe n kẽng n põse.

¹⁴ La ned sã n maan sɩlem n kʋ-a to ne pʋ-toogo, bɩ f yõk-a, ba a sã n bee mam tẽn-kugrã taoore, bɩ f yiis-a beenẽ n kɩt tɩ b kʋ-a.

¹⁵ Ned sã n wẽ a ba bɩ a ma, bɩ b kʋ-a.

¹⁶ Ned sã n zuk ninsaala, a sã n paam n koos-a lame, wall b sã n yãnd nedã t'a ket a nugẽ, bɩ b kʋ sẽn zuk-a nedã.

¹⁷ Ned sã n tʋʋs a ba bɩ a ma, bɩ b kʋ-a.

¹⁸ Raop a yiib sã n zab taaba, t'a yembr rɩk kugr n wẽ a to wã, wall a wẽ-a ne nug-giulg t'a pogl n ka ki, n gãe a gãagẽ n ka tõe n yiki,

¹⁹ la a sã n wa tõe n yik n tik raoog n yi n kẽne, bɩ b bas sẽn wẽ-a yẽnda wã taale. La baoosgo, bɩ a kõ yẽnda sẽn pogl a soabã ligd sẽn zems wakat ning a sẽn ka tʋmã yaoodo, la a ges a yell hal t'a wa paam laafɩ zãnga.

²⁰ Ned sã n wẽ a yem-daoogo, wall a pãb a yem-poak ne dasaar n kʋ, bɩ b sɩbg-a n lebse.

²¹ La yambã bɩ yem-poakã sã n kell n vɩɩmd daar a yembr wall rasem a yiibu, bɩ b ra sɩbg a soaalã ye. Bala, yambã yaa yẽnda ligdi.

²² Raop sã n zab taaba, n fão pag sẽn tʋt t'a pʋgã sãam tɩ pagã meng yaool n ka ki, bɩ sẽn fão-b pagã yao sẽn zems pagã sɩd sẽn yaoolg bãmb bũmb ningã, wa sẽn zems bʋ-kaoodbã sẽn yeelã.

²³ La a sã n ki, nedã na n yao a vɩɩm vɩɩm yĩnga,

²⁴ la nifu, nif yĩnga, la yẽnde, yẽnd yĩnga, la nugu, nug yĩnga, la naoore, naoor yĩnga,

²⁵ bugum yõogre, bugum yõogr yĩnga, la poglgo, poglg yĩnga, la yĩng bugbu, yĩng bugb yĩnga.

²⁶ Ned sã n wẽ a yem-daoog bɩ a yem-poak t'a nif feooge, bɩ a kõ-a lohorem a nifã feoogr yĩnga.

²⁷ Yẽnda sã n wẽ a yem-daoog bɩ a yem-poak n feooge a yẽnde, bɩ a kõ-a lohorem a yẽndã feoogr yĩnga.

²⁸ Loalg sã n tãag rao bɩ pag t'a ki, bɩ b lob loalgã ne kuga, la b ra wãb a nemdã ye. Bɩ b bas loalgã soab taale.

²⁹ La loalgã sã n dag n yaa lol-tãadga, tɩ b togs a soabã t'a ka loe-a, a sã n kʋ rao bɩ paga, bɩ b lob loalgã kug n kʋ, la b kʋ a soabã me.

³⁰ B sã n yaoolg a soabã yaood t'a yao, tɩ b bas-a n ka kʋ, yaa tɩlɛ tɩ yẽnda yao yaood ning fãa b sẽn yeelã, a vɩɩmã yĩnga.

³¹ Loalgã sã n tãag bi-ribl bɩ bi-pugla, bɩ b maan-a wa sẽn zems tõ-kãngã me.

³² Loalgã sã n tãag yem-daoog bɩ yem-poaka, loalgã soab na n yaoo yem-poakã bɩ yem-daoogã soaalã wanzuri ligd pis-tã, la b lob loalgã kug n kʋ.

³³ Ned sã n pak bulga, ka rẽ bɩ a tuu bulg n ka pag a noorã tɩ ned loalg bɩ a bõang lʋɩ a pʋgẽ,

³⁴ bulgã soab na n yaoo bũmbã sẽn sãamã. A na n yao a soabã rũngã ligdi, la a tall rũm-kɩɩngã.

³⁵ Ned loalg sã n tã ned a to loalg n kʋ, bãmb na n koosa lol-vɩɩgã n pʋɩ taab ligdã, la bãmb na n pʋɩɩ lol-kɩɩngã nemd me.

³⁶ La b sã n dag n deng n bãngame tɩ loalgã yaa lol-tãadga, t'a soaba ka loe-a, loalgã soab tog n lebsa ned a to wã loalga, la a tall lol-kɩɩngã.

³⁷ Ned sã n zuk a to naafo, a pesgo, wall a bʋʋg n kʋ, wall a koos-a, a tog n lebsa loalgã soab niig a nu lol-yendã yĩnga, la rũm-bãooneg a naase, peosg a yembre, wall bʋʋg a yembr fãa yĩnga.»