Yikri 16 - WẼNNAAM SEBRE 2014

Mand ne kodense

¹ La Israyɛll nebã fãa yii Elim. Bãmb dɩka sor n kẽn n ta Sĩn we-raoogã sẽn be Elim ne Sinayi sʋkã. Bãmb taa be kiuug a yiibẽ soabã rasem piig la a nu daare, bãmb sẽn yi Ezɩptã zugẽ.

² La Israyɛll nebã fãa yẽgma ne a Moyiis la a Aarõ we-raoogã pʋgẽ.

³ Israyɛll nebã yeela bãmb yaa: «Sẽn-Ka-Saab sã n dag n kʋẽ tõnd Ezɩpt tẽngã wakat ning tõnd sẽn dag n ket n zĩ nemdã rʋgd sɛɛgẽ, la tõnd sẽn dag n dɩt n tɩgdã n são! Bala, yãmb sẽn tall tõnd n wa we-ra-kãngã pʋgẽ wã yaa sẽn na n yɩlẽ tɩ kom kʋ kʋʋn-kãngã fãa!»

⁴ Dẽ, Sẽn-Ka-Saab yeela a Moyiis yaa: «Ade, mam na n kɩtame tɩ rɩɩb yi yĩngr n ni wa saag yãmb yĩnga. La nebã na n yii daar fãa n wʋk sẽn sekd daar a yembr dɩɩbo, tɩ mam tõe n mak bãmb n bãng bãmb sã n na n saka mam tõodã.

⁵ Rasem a yoobã daare, bɩ b wʋk wʋsg n wa segl n yɩɩd bãmb sẽn mi n wʋkd daar fãa wã, sẽn na zems rasem a yiib rẽnda.»

⁶ A Moyiis ne a Aarõ yeela Israyɛll nebã fãa yaa: «Zaabrã, yãmb na bãng tɩ yaa Sẽn-Ka-Saab n yiis yãmb Ezɩpt tẽngã.

⁷ La beoog yibeoogo, yãmb na n yãnda Sẽn-Ka-Saab ziiri. Bala, bãmb wʋma yãmb sẽn yẽgemd ne bãmbã. La tõndo, tõnd yaa bõe tɩ yãmb yẽgemd ne tõndo?»

⁸ La a Moyiis yeelame: «Zaabrã, Sẽn-Ka-Saab na n kõo yãmb nemd tɩ y wãbe, la beoog yibeoogo, bãmb na n kõo yãmb dɩɩb tɩ y rɩ n tɩge. Bala, Sẽn-Ka-Saab wʋma yãmb sẽn yẽgemd ne bãmbã. La tõndo, tõnd yaa bõe? Yãmb ka yẽgemd ne tõnd ye, yaa ne Sẽn-Ka-Saabo.»

⁹ A Moyiis yeela a Aarõ yaa: «Yeel Israyɛll zama wã fãa yaa: ‹Kolg-y Sẽn-Ka-Saab taoore. Bala, bãmb wʋma yãmb yẽgengã.› »

¹⁰ La a Aarõ sẽn wa n ket n gomd ne Israyɛll zama wã, bãmb wẽnemda b nens n tees we-raoogã sẽnẽ. La ade, Sẽn-Ka-Saab ziirã puka sawaodg pʋgẽ.

¹¹ Dẽ, Sẽn-Ka-Saab goma ne a Moyiis n yeele:

¹² «Mam wʋma Israyɛll nebã yẽgengã. Togs bãmb yaa: Zaabrã, yãmb na n wãba nemdo. La beoog yibeoogo, yãmb na n dɩɩ rɩɩb n tɩge. Dẽ, yãmb na n bãngame tɩ mam yaa Sẽn-Ka-Saab sẽn yaa yãmb Wẽnnaam.»

¹³ Zaabr sẽn ta, kodens n wa n lud sik zĩigã. La vẽkembeoogo, meenem n gãneg zĩigã fãa sẽn gilg sik zĩigã.

¹⁴ La meenemã sẽn wa n mesge, bũmb n be tẽn-gãongã zug we-raoogã pʋgẽ n yaa faasga, n yaa bɩrb-bɩrba, n yaa pɛɛlga.

¹⁵ La Israyɛll nebã sẽn yãnd mandã, b soka taab yaa: «Yõwã yaa bõe?» Bala, bãmb dag n ka mi a sẽn yaa bũmb ning ye. La a Moyiis yeela bãmb yaa: «Yõwã yaa rɩɩb Sẽn-Ka-Saab sẽn kõt yãmb tɩ y rɩ.

¹⁶ Ad Sẽn-Ka-Saab sẽn yeele: ‹Bɩ yãmb ned kam fãa wʋk sẽn sek a rɩɩbo. Yaa wamd noor a yembr ned kam fãa yĩnga, wa sẽn zems yãmb nebã y sẽn tog n dɩlgã sõore. Bɩ ned kam fãa wʋk tɩ sek a yir dãmba.»

¹⁷ Israyɛll nebã maana a woto. La neb kẽer wʋka wʋsgo, tɩ neb kẽer me wʋk bilfu.

¹⁸ La bãmb sẽn dɩk wam-makdgã n mak mandã, b mikame tɩ neb nins sẽn wʋk wʋsgã ka paam n yɩɩd sẽn zems ye. La neb nins sẽn wʋk bilfã me, ka paoog-b ye. Bãmb ned kam fãa sẽn wʋkã rag n zemsda ne a sẽn date.

Noy buud toor-toor mandã wɛɛngẽ

¹⁹ A Moyiis yeela bãmb yaa: «Bɩ ned baa a yembr da bas mandã tɩ beoog vẽeg ye.»

²⁰ La bãmb ka kelg a Moyiis ye. Neb kẽer bas-a lame t'a vẽeg beoogo. La a pida ne zũnzũy n tar yũugu. A Moyiis sũurã yika ne bãmba.

²¹ Dẽ, daar fãa, bãmb wʋkda mandã sẽn zems ned kam fãa rɩɩbo. La wĩndgã sã n bɩ, a boogdame.

²² La rasem a yoob daarã, bãmb wʋka sẽn zems rasem a yiib rɩɩbo. Yaa wam a yiib-yiib ned kam fãa yĩnga. La nebã nanambsã fãa wa n togsa a Moyiisi.

²³ Dẽ, a Moyiis yeela bãmb yaa: «Yaa Sẽn-Ka-Saab n yeel tɩ b maan a woto. Beoog na n yɩɩ vʋʋsg daare. Yaa vʋʋsg daar sẽn welg toor Sẽn-Ka-Saab waoogr yĩnga. Yãmb sẽn dat n kɩɩm bũmb ninsã, bɩ y kɩɩme, la yãmb sẽn dat n dʋg bũmb ninsã, bɩ y rʋge. La bũmb nins fãa sẽn kellã, bɩ y bĩng tɩ ta beoogo.»

²⁴ Dẽ, bãmb yãkame n bĩng tɩ ta beoog wa a Moyiis sẽn yeel bãmbã. La rɩɩbã ka põoge, la zũnzũiy me ka kẽ-a ye.

²⁵ A Moyiis yeelame: «Bɩ y rɩ-a rũndã. Bala, rũndã yaa vʋʋsg daar Sẽn-Ka-Saab waoogr yĩnga. Rũndã, yãmb ka na n yãnd mandã weoogã pʋgẽ ye.

²⁶ Yãmb na n wʋk-a-la rasem a yoobe, la rasem a yopoe wã daar sẽn yaa vʋʋsg daarã, a ka na n zĩnd ye.»

²⁷ La rasem a yopoe wã daare, kẽer yii nebã sʋk n kẽng n na n tɩ wʋk mandã, la b ka yãnd ye.

²⁸ Dẽ, Sẽn-Ka-Saab yeela a Moyiis yaa: «Yãmb na n kɩɩsa mam noyã ne m tõodã hal tɩ ta dabʋre?

²⁹ Ges-y-yã! Sẽn-Ka-Saab sẽn kõ yãmb vʋʋsg daarã yĩng n kɩte, tɩ bãmb kõt yãmb dasem a yiib rɩɩbo, rasem a yoobã daare. Bɩ ned kam fãa kell n pa a zĩigẽ n da yi rasem a yopoe wã daar ye.»

³⁰ Dẽ, nebã vʋʋsa rasem a yopoe wã daare.

³¹ Israyɛll nebã pʋda rɩɩbã yʋʋr tɩ mande. A rag n wẽnda wa baninga, n yaa pɛɛlga. La a noosmã wẽnda wa bur-maas sẽn maan ne sɩɩdo.

³² A Moyiis yeelame: «Ad Sẽn-Ka-Saab sẽn kõ noor ninga: ‹Yãk-y mandã n pid wam-makdgã n bĩng y yagensã yĩnga, tɩ b wa yãnd rɩɩb ning mam sẽn kõ yãmb tɩ y rɩ we-raoogã pʋgẽ, mam sẽn wa n yiis yãmb Ezɩpt tẽngã wakatã.› »

³³ A Moyiis yeela a Aarõ yaa: «Rɩk-y yʋʋr n sui mandã ne wam makdgã noor a yembr n tẽgn-a Sẽn-Ka-Saab taoore, n bĩng-a beenẽ yãmb yagensã yĩnga.»

³⁴ Dẽ, a Aarõ tẽgna yʋʋrã ne mandã kug-walsã sẽn kɩt Wẽnnaam tõodã kasetã taoore, n bĩng a beenẽ wa Sẽn-Ka-Saab sẽn dag n yeel a Moyiisã.

³⁵ La Israyɛll nebã rɩɩ mandã hal tɩ ta yʋʋm pis-naase, hal n wa n ta tẽng neb sẽn be. Bãmb dɩɩ mandã hal n ta wakat ning bãmb sẽn ta Kana soolmã toadgẽ wã.

³⁶ Wam-makdgã noor piig yaa peoog a yembre.