Yikri 15 - WẼNNAAM SEBRE 2014

A Moyiis ne Israyɛll nebã yɩɩlle

¹ Dẽ, a Moyiis ne Israyɛll nebã yɩɩla yɩɩn-kãngã n waoog Sẽn-Ka-Saab n yeele: «Mam na n yɩɩlame n waoog Sẽn-Ka-Saabo. Bala, bãmb naamã yaa kãsenga. Bãmb luba wiid ne b wed-rʋʋdb ko-kãsengã pʋgẽ.

² Sẽn-Ka-Saab yaa mam pãnga, la b yaa mam pãn-kãsenga, n yaa mam pẽgr yɩɩlle. Bãmb yaa mam fãagda. Bãmb yaa mam Wẽnnaam, la mam na n waooga bãmba. Bãmb yaa mam ba wã Wẽnnaam, la mam na n pẽga bãmba.

³ Sẽn-Ka-Saab yaa zabr gãndaoogo. Bãmb yʋʋr la a Sẽn-Ka-Saabo.

⁴ Bãmb luba Faarõ saar-dãmbã ne a tãb-biisã ko-kãsengã pʋgẽ. Rudum ko-kãsengã lima tãb-biis nins yẽnda sẽn yãkã.

⁵ Zĩ-zulums lima bãmba. Bãmb siga zĩ-zulumsẽ wa kugri.

⁶ Sẽn-Ka-Saabo, yãmb nug rɩtg pãng yaa kãsenga. Sẽn-Ka-Saabo, yãmb nug rɩtgã wãa bɛɛbã.

⁷ Yãmb naam-kãsengã pʋga, yãmb lubda neb nins sẽn yik n zabd ne yãmbã. Yãmb tʋmda y sũ-kãbre, t'a rɩt bãmb wa moodo.

⁸ Yãmb yõ-bogdã pemsem kɩtame tɩ koomã yiki. Koomã wa n sama taaba. Ko-zoetem yalsa yĩngr wa lalga. Ko-kãsengã zĩ-zulums koom gĩsa ko-kãsengã sʋka.»

⁹ Bɛ wã rag n yetame: «Mam na n pʋgla bãmba. Mam na n paam-b lame. Mam na n pʋɩɩ te-zɛɛdem n maan m sẽn date. Mam na n wõoga m zabr sʋʋga. Mam nug na n sãamã bãmba.»

¹⁰ Yãmb fʋʋsame n kɩt tɩ ko-kãsengã lim bãmba. Bãmb tisga wa namd ko-kãsemsã pʋsẽ.

¹¹ Sẽn-Ka-Saabo, wẽnnaam-dãmbã sʋka, ãnda n zem yãmba? Ãnda n tar naam ne sõmblem wa yãmba, n sek zoeese, la sẽn zems waoogre, n maand tʋʋm-kãsemse?

¹² Yãmb tẽega y rɩtg nugã, la tẽngã vela bãmba.

¹³ Yãmb yãaga nin-bãmbã y sẽn fãagã ne y nonglmã. Yãmb pãngã tara bãmb n dabd yãmb yir sẽn welg toorã pʋga.

¹⁴ Nebã wʋmame n digda. Toog tara Filistẽ-dãmbã soolem nebã wa pag sẽn kũmd rogem.

¹⁵ La Edom nanambsã pelens yɩkame. Moaab pãens rãmbã rigdame. Kana nebã fãa gĩin maagame.

¹⁶ Sẽn-Ka-Saabo, rabeem-kãseng ne yɛɛsg yõka bãmba, yãmb nugã pãn-kãseng yĩnga. Bãmb lebga mugs wa kugri, hal tɩ yãmb nebã looge, hal tɩ yãmb nebã yãmb sẽn da wã looge.

¹⁷ Sẽn-Ka-Saabo, yãmb na n talla bãmb n wa sel yãmb tãngã zugu, zĩig ning yãmb sẽn segl n na n zĩnd a pʋgẽ wã, yaa zĩig ning sẽn welg toorã, yaa zĩig yãmb sẽn yẽbg ne y meng nusi.

¹⁸ Sẽn-Ka-Saab yaa rĩm wakat fãa la wakat sẽn kõn sa.»

¹⁹ Bala, Faarõ wiidã ne a saar-dãmbã la a wed-rʋʋdbã sẽn kẽ ko-kãsengã pʋgẽ wã, Sẽn-Ka-Saab kɩtame tɩ ko-kãsengã koom lebg n lim bãmba. La Israyɛll nebã kẽna tẽn-koɛɛng zug n pɩʋʋg ko-kãsengã.

²⁰ La no-rɛɛs-poak a Miryam sẽn yaa a Aarõ tão wã rɩka sɩlsãka, la pagbã fãa yii n pʋgla yẽnda n wẽ sɩlsãgs n sao.

²¹ La a Miryam rag n deesda bãmb yɩɩllã n yetẽ: «Bɩ y yɩɩl n waoog Sẽn-Ka-Saabo. Bala, bãmb wilgame tɩ b yaa na-kãsenga. Bãmb luba wiid ne wed-rʋʋdb ko-kãsengã pʋgẽ»

Maara koomã

²² A Moyiis kɩtame tɩ Israyɛll nebã rɩk sor n yi rudum ko-kãsengã zĩigẽ n kẽng Suur we-raoogã sẽnẽ. La bãmb kẽna rasem a tãab kẽnd we-raoogã pʋgẽ n ka yãnd koom ye.

²³ Bãmb taa Maara, la b ka tõog n yũ Maara koomã ye. Bala, a rag n yaa toogo. Yaa woto n kɩt tɩ b pʋd zĩigã yʋʋr tɩ Maara.

²⁴ La nebã yẽgma ne a Moyiis n yeele: «Tõnd na n yũu bõe?»

²⁵ Dẽ, a Moyiis zẽka a koɛɛg n pʋʋs Sẽn-Ka-Saabo, la Sẽn-Ka-Saab wilga yẽnda tɩɩg buud a yembre. A Moyiis keega tɩɩgã n los koomã pʋgẽ, la koomã lebga noogo. Yaa beenẽ la Sẽn-Ka-Saab wilg bãmb b no-tũudsã ne b noyã. Leb n yaa zĩ-kãng la bãmb mak nebã.

²⁶ Sẽn-Ka-Saab yeelame: «Yãmb sã n sak Sẽn-Ka-Saab sẽn yaa yãmb Wẽnnaamã koɛɛg neere, yãmb sã n maan sẽn tat bãmb yam, yãmb sã n yok y tʋb n kelg bãmb noyã, la y sã n sak bãmb no-tũudsã fãa, mam kõn lobg yãmb ne bãas nins fãa mam sẽn lobg Ezɩpt nebã ba a yembr ye. Bala, mam yaa Sẽn-Ka-Saab sẽn maagd yãmba.»

²⁷ Dẽ, bãmb taa Elim, la ko-bunds piig la a yiib ne koms tɩɩs pis-yopoe n dag n be beenẽ. Bãmb tilga b sik-zĩigã koomã noor beenẽ.