Yɩɩn‑sõamyã 99 - WẼNNAAM SEBRE 2014

Sẽn-Ka-Saab yaa Israyɛll sɩd soaba

¹ Sẽn-Ka-Saab yaa rĩmã. Nebã rigdame. Sẽn-Ka-Saab rɩta naam serubẽ-rãmbã sʋka, la tẽngã rigimdidame.

² Sẽn-Ka-Saab n yaa kãseng Sɩyõ. Bãmb n so nebã fãa.

³ Bɩ nebã waoog yãmb yʋʋrã sẽn yaa kãsenga, la sẽn sek zoeesã! Bãmb yaa Pʋ-Peelem-Soaba!

⁴ Bɩ nebã waoog rĩmã sẽn nong tɩrlmã pãngã! Yãmb n vigl tɩrlem. Yãmb n kɩt tɩ zemsg ne tɩrlem zĩnd a Zakoob yagensã sʋka.

⁵ Kils-y Sẽn-Ka-Saab sẽn yaa tõnd Wẽnnaamã yĩnga, la y wõgemd bãmb nao-roagendgã taoore, bala, bãmb yaa pʋ-peelem soaba!

⁶ A Moyiis ne a Aarõ sẽn dag n be Sẽn-Ka-Saab maan-kʋʋdbã sʋkã, ne a Samwɛll sẽn dag n be sẽn boond-b bãmb yʋʋrã sʋkã, b fãa boola Sẽn-Ka-Saabo, la b leoka bãmba.

⁷ Sẽn-Ka-Saab rag n bee sawad-taokã pʋg n gomd ne bãmba. Bãmb saka Sẽn-Ka-Saab tʋlsmã ne noor ning Sẽn-Ka-Saab sẽn dag n kõ bãmbã.

⁸ Sẽn-Ka-Saab sẽn yaa tõnd Wẽnnaam, yãmb n leokd bãmb y toore. Yãmb yɩɩ Wẽnnaam sẽn yaa sugr kõt bãmb yĩnga, la y rokda y sũur b tʋʋm-beedã yĩnga.

⁹ Pẽg-y Sẽn-Ka-Saab sẽn yaa tõnd Wẽnnaamã, la y wõgemd bãmb tãngã sẽn welg toorã zugu! Bala, Sẽn-Ka-Saab sẽn yaa tõnd Wẽnnaamã yaa pʋ-peelem soaba!