Yɩɩn‑sõamyã 98 - WẼNNAAM SEBRE 2014

Ned sẽn pẽgd Wẽnnaam

1 Yɩɩlle

¹ Yɩɩlle Yɩɩl-y yɩɩn-paalg Sẽn-Ka-Saab yĩnga! Bala, bãmb maana bõn-bãna. Bãmb nug-rɩtg ne b kan-sõngã kõo bãmb tõogre.

² Sẽn-Ka-Saab kɩtame tɩ b bãng bãmb fãagrã. B puka b tɩrlmã tɩ bu-zẽmsã yãnde.

³ Bãmb tẽega b nonglmã ne b pʋ-peelmã b sẽn tar Israyɛll nebã yĩngã yelle. La dũniyã gill fãa yãnda tõnd Wẽnnaamã fãagre.

⁴ Bɩ dũniyã nebã fãa kaas n waoog Sẽn-Ka-Saabo! Kils-y ne sũ-noog n yɩɩl n waoog-ba!

⁵ Wẽ-y pɛndg n yɩɩl n waoog Sẽn-Ka-Saabo. Wẽ-y pɛndg n maan noogo.

⁶ Peeb-y bard ne tãntãoogo. Kaas-y Sẽn-Ka-Saab sẽn yaa rĩmã taoore!

⁷ Bɩ ko-kãsengã ne a pʋgẽ teedã guglume. Bɩ dũniyã ne a nebã maan sũ-noogo.

⁸ Bɩ kʋɩlsã wẽ nug-pogse, tɩ tãmsã naag n kaas ne sũ-noogo.

⁹ Bɩ b kaas Sẽn-Ka-Saab taoore, bala, b wat n na n kaoo dũniyã bʋʋdo. Bãmb na n kaoo dũniyã bʋʋd ne tɩrlem, la b kao nebã bʋʋd wa sẽn zemse.