Yɩɩn‑sõamyã 9 - WẼNNAAM SEBRE 2014

Bark pʋʋsg yɩɩlle

¹ A Davɩɩd yɩɩlle, yɩɩlã naab yĩnga. Yɩɩnda ne yʋʋm-teedo.

² Mam na n pʋʋsa Sẽn-Ka-Saab bark ne m sũur fãa. Mam na n togsa yãmb bõn-bãnã fãa.

³ Mam na n maana sũ-noog n kɩdem yãmb pʋgẽ. Sẽn-Ka-To, mam na n yɩɩl n pẽga yãmb yʋʋrã!

⁴ Mam bɛɛbã na n lebg n zoeeme, n lagsd n lʋɩt n kiid yãmb taoore.

⁵ Bala, yãmb n kao m bʋʋdã tɩrga, yãmb zaba mam zabre. Yãmb sẽn yaa bʋ-kao-tɩrg soabã, yãmb zao y naam geerã zug n kaood bʋʋdo.

⁶ Yãmb lengda bu-zẽmsã, n kɩtdẽ tɩ nin-wẽns sãamdẽ. Yãmb menesda b yʋʋr wakat sẽn kõn sa yĩnga.

⁷ Bɛɛb ka leb n beẽ ye! Lebga rabood zãnga! Yãmb sãama tẽms tɩ b ka leb n tẽr b yell ye.

⁸ Sẽn-Ka-Saab rɩta naam wakat sẽn ka sɛta. Bãmb vigla b naam geer n na n kao bʋʋdo.

⁹ Bãmb kaooda dũniyã bʋʋd ne tɩrlem, la b kaood nebã bʋʋd ne zemsgo.

¹⁰ Sẽn-Ka-Saab yaa pãng zĩig neb nins b sẽn namsdã yĩnga, la b yaa pãng zĩig yel-pakr wakate.

¹¹ Sẽn-Ka-Saabo, bɩ neb nins sẽn mi yãmbã rɩk b teegrã n teeg yãmba. Bala, yãmb ka basd neb nins sẽn baood yãmbã ye.

¹² Bɩ y yɩɩl n pẽg Sẽn-Ka-Saab sẽn dɩt naam Sɩyõ wã. Moon-y bãmb tʋʋm-kãsemsã nebã sʋka!

¹³ Bala, bãmb ka basd nin-kʋʋdbã taal ye. Bãmb tẽra b nin-kʋʋrã yelle. Bãmb ka yĩmd nimbãan-neb kɛleng ye.

¹⁴ Sẽn-Ka-Saabo, zoe-y mam nimbãanega! Ges-y mam kisgdbã sẽn namsd maam. Yãmb n fãagd maam ne kũum,

¹⁵ tɩ mam tõe n togs yãmb pẽgrã fãa Sɩyõ tẽn-neerã pʋga, la m kɩdem ne sũ-noog yãmb fãagrã yĩnga.

¹⁶ Bu-zẽmsã wẽneg n lʋɩɩ bok ning bãmb sẽn tu wã pʋga. Bẽdg ning b sẽn solgã wẽneg n yõka bãmb naoã.

¹⁷ Sẽn-Ka-Saab kɩtdame tɩ b bãng bãmb sẽn yaa-a soaba, bãmb maanda sẽn yaa tɩrga. Nin-wẽng meng tʋʋmã n na n wẽneg n dɩ-a.

¹⁸ Bɩ nin-wẽnsã kẽng kɩɩm-kulgu, bɩ bu-zẽmsã fãa sẽn yĩmd Wẽnnaam yellã kẽng kɩɩm-kulgu.

¹⁹ La Wẽnnaam kõn tol n yĩm naong rãmbã yell ye. La nimbãan-nebã tẽeb kõn tol n pa n ka pids ye.

²⁰ Sẽn-Ka-Saabo, yik-y-yã! Yik-y tɩ ninsaal da wa paam tõogr ye! Kɩt-y tɩ bu-zẽmsã yals yãmb taoor tɩ b kao b bʋʋdo!

²¹ Sẽn-Ka-Saabo, kɩt-y tɩ rabeem yõk bu-zẽmsã! Kɩt-y tɩ b bãng tɩ b yaa ninsaalb bala!