Yɩɩn‑sõamyã 89 - WẼNNAAM SEBRE 2014

Wẽnnaam kãabg ne a Davɩɩde

¹ Ezra tẽng rao a Etan yɩɩlle.

² Mam na n yɩɩla Sẽn-Ka-Saab nonglmã wakat fãa. Mam noor na n moona yãmb pʋ-peelmã zamaan woo zamaane.

³ Bala, mam yeelame: «Yãmb nonglmã vigla wakat sẽn kõn sɛ yĩnga. Yãmb tilga y pʋ-peelmã saasẽ.»

⁴ Yãmb yeelame: «Mam maana kaool ne mam nin-tũusdgã. Mam wẽena ne m tʋmtʋmd a Davɩɩd n yeele:

⁵ Mam na n kɩtame tɩ f yagensã soog naamã wakat fãa, la m kɩt tɩ f zaoorã kaoos zamaan woo zamaane.»

⁶ Sẽn-Ka-Saabo, saasẽ pʋʋsda yãmb bark y bõn-neebã yĩnga! La pʋ-peelem dãmbã tiging pʋga, b pʋʋsda yãmb barka.

⁷ Sɩd me, ãnda n be saasẽ n tõe n mak a meng ne yãmb a Sẽn-Ka-Saabo? Ãnda n be wẽnnaam-dãmbã sʋka, n zem yãmb a Sẽn-Ka-Saabo?

⁸ Pʋ-peelem dãmbã tiging pʋga, Wẽnnaam seka zoees sẽn gũbg-b bãmbã fãa sʋka.

⁹ Sẽn-Ka-Saab sẽn yaa Saasẽ-Pãng-Soab a Wẽnnaam, ãndã n yaa wa yãmba? Sẽn-Ka-Saabo, yãmb tara pãnga, yãmb sõmblmã gũbga yãmba.

¹⁰ Yãmb n tõe ko-kãsengã ne a zẽk-m-mengã. Ko-kãsengã ko-pɛmã sã n zẽkdẽ, yãmb n tõe tɩ b sigi.

¹¹ Yãmb bedsa a Rahaab n kɩt t'a lebg wa kũum, yãmb sãeega y bɛɛbã ne y kangã pãnga.

¹² Yĩngr la tẽng yaa yãmb n so. Yãmb n vigl dũniyã la y naan bũmb nins sẽn be a pʋgẽ wã.

¹³ Yãmb n kɩt tɩ dũniyã rɩtg ne a goabg beẽ. Taboor ne Hɛrmo tãmsã kaasda ne sũ-noog yãmb yʋʋrã yĩnga.

¹⁴ Yãmb kangã yaa raood kanga. Yãmb nug tara pãn-kãsenga, y nug-rɩtg zẽkame.

¹⁵ Yãmb naam geerã tilga tɩrlem ne zemsg zugu. La nonglem la sɩd bee ne yãmba.

¹⁶ Bark bee neb nins sẽn mi tɩ kaas n waoog yãmb a Sẽn-Ka-Saabã zutu! Bãmb kẽnda yãmb a Sẽn-Ka-Saab vẽenemẽ wã.

¹⁷ Bãmb tara sũ-noog daar fãa yãmb yʋʋrã yĩnga. Bãmb tõe n doogã b zug yãmb tɩrlmã yĩnga.

¹⁸ Bala, yãmb n yaa bãmb ziirã ne b pãnga. Yãmb nonglmã yĩnga, tõnd tõe n zẽka d zugu.

¹⁹ Bala, tõnd gãongã yaa Sẽn-Ka-Saab rẽnda, tõnd dĩmã yaa Israyɛll Pʋ-Peelem-Soabã n so.

²⁰ Daar a yembre, yãmb goma ne y nin-nongdsã vẽnegr pʋgẽ n yeele: Mam sõnga gãndaoog a yembre, mam waooga bi-bɩɩg a yembr nebã sʋka.

²¹ Mam yãnda m tʋmtʋmd a Davɩɩde, mam pʋdga m naam kaam yẽnda zugu.

²² Mam nug sẽn tar pãngã na n tebla yẽnda. Mam kangã na n paas-a-la pãnga.

²³ Bɛ wã kõn tol n tõog n ling-a ye. Nin-wẽng kõn tõog n paoog-a ye.

²⁴ Mam na n bedsa a bɛɛbã a taoore, la m sãam neb nins sẽn kis-b yẽnda wã.

²⁵ Mam pʋ-peelmã ne m nonglmã na n zĩnda ne yẽnda, mam yʋʋrã yĩnga, mam na n zẽka a zugu.

²⁶ Mam na n dɩka ko-kãsengã n ning yẽnda nugẽ, la m dɩk kʋɩlsã n ning yẽnda nug-rɩtgo.

²⁷ Yẽnda na n boola maam tɩ: «Mam ba, la m Wẽnnaam, mam pĩig sẽn fãagd maam!»

²⁸ Mam na n kɩtame t'a lebg m bi-rẽenga, la m kɩt t'a yɩ dũniyã rĩm-dãmbã rĩm-kãsenga.

²⁹ Mam na n nonga yẽnda wakat fãa, la kaoolã mam sẽn maan ne yẽnda wã kõn tol n vaal ye.

³⁰ Mam na n kɩtame t'a yagensã rɩ naam wakat fãa, la a naamã geer na n kaoosa wa saasẽ.

³¹ Yẽnda yagensã sã n bas mam tõogã, n ka kẽn wa sẽn zemse,

³² bãmb sã n kɩɩs mam no-tũudsã, n ka sak mam noyã,

³³ mam na n talla rasaar n sɩbg-ba, b kɩɩsgã yĩnga, la m na n pãb-b-la b beegrã yĩnga.

³⁴ Mam nonglmã kõn tol n sɛ a yĩnga, mam kõn tol n mong yẽnda m pʋ-peelmã ye.

³⁵ Mam ka na n viig m kaoolã, la m kõn lebs m noorã poorẽ ye.

³⁶ Mam wẽena vugr bal ne mam mengã sõmblmã tɩ m kõn tol n belg a Davɩɩd ye.

³⁷ Yẽnda yagensã na n kaoosa wakat fãa. Yẽnda naam geerã na n kaoosa mam taoor wa wĩntoogã.

³⁸ A geerã na n vigla kãenkãe wakat fãa, wa kiuugã, wa kaset-sɩd soab ning sẽn be saasẽ wã.

³⁹ La yãmb yaool n basa rĩm ning yãmb sẽn yãkã la y zãgs-a! Yãmb sũur yika ne-a!

⁴⁰ Yãmb sãama kaoolã y sẽn dag n maan ne y tʋmtʋmdã. Yãmb fabga a naamã pugl tẽng n dẽgm-a.

⁴¹ Yãmb wura yẽnda lalsã fãa, yãmb siiga a tãn-soben-dotã.

⁴² So-loaadbã fãa zɛɛda yẽnda teedã. Yẽnda lebga a yagsã bõn-yaandga.

⁴³ Yãmb paasa yẽnda zabd-n-taasã pãnga. Yãmb nooga a bɛɛbã fãa sũuri.

⁴⁴ Yãmb kɩtame t'a zabr sʋʋgã põde, la y ka sõng-a zabrã wakat ye.

⁴⁵ Yãmb kɩtame t'a ra-sãndã sɛ, la y tus a naamã geer n lub tẽnga.

⁴⁶ Yãmb kʋʋga a yʋʋmã a bi-bɩɩlem wakate, yãmb kɩtame t'a rɩ yãnde.

⁴⁷ Sẽn-Ka-Saabo, yãmb na n solga y meng tɩ ta rabʋre? Yãmb sũ-puugrã na n dɩta wa bugum tɩ ta rabʋre?

⁴⁸ Tẽeg-y mam yʋʋmã sẽn ka kaoosdã yelle, la y ges ninsaalbã yãmb sẽn naan tɩ b yaa zaalmã.

⁴⁹ Ãnda n na n vɩɩmd n ka tol n ki, ãnda n tõe n põs kɩɩm-kulgu?

⁵⁰ Zu-soaba, nonglem ning yãmb sẽn dag n tar pĩndã bee yɛɛnẽ? Nonglem ning yãmb sẽn dag n wẽen ne y tʋmtʋmd a Davɩɩd y pʋ-peelmã pʋgã bee yɛɛnẽ?

⁵¹ Zu-soaba, tẽeg-y yãmb tʋmtʋmdbã b sẽn paoogdã yelle, la y tẽeg neb kʋʋng ning b sẽn dɩk n bobl maamã yelle.

⁵² Sẽn-Ka-Saabo, tẽeg-y tɩ yãmb bɛɛbã paoogdame, b paoogda y nin-tũusdgã a kẽnã pʋga.

⁵³ Bɩ Sẽn-Ka-Saab paam pẽgr wakat sẽn kõn sa! Ãmina! Ãmina!