Yɩɩn‑sõamyã 88 - WẼNNAAM SEBRE 2014

Ned sẽn kot Wẽnnaam tɩ b fãag-a ne kũum

¹ A Koore kom-dibli wã yɩɩlle, yɩɩlã naab yĩnga. Yɩɩnda ne wɩɩga. Yaa Ezra tẽng rao a Eman yɩɩlle.

² Sẽn-Ka-Saabo, Wẽnnaam sẽn yaa m fãagda! Mam bee yãmb taoor wĩndg la yʋng n boondẽ.

³ Bɩ mam pʋʋsgã ta yãmb sẽn beẽ wã! Kɩll-y y tʋbr n kelg m kɛlengã!

⁴ Bala, toodã wʋma maam, mam vɩɩmã pẽnega kɩɩm-kulgu.

⁵ B sõta maam n naagd sẽn sigd-b yaoogẽ wã, mam lebga ned pãng sẽn sɛ.

⁶ B gãnega maam sẽn ki-bã sʋka, mam wẽnda b sẽn kʋ-b rãmb tɩ b gãe yaoogẽ wã. Mam wẽnda yãmb sẽn ka leb n tẽr-b rãmb yellã, neb nins yãmb sẽn basã.

⁷ Yãmb loba maam bog-zulungẽ, tɩ m be lik bida pʋga, hal zĩ-zulumsẽ wã.

⁸ Yãmb sũ-puugrã zɩsga maam, la yãmb ko-wĩisã namsda maam.

⁹ Yãmb kɩtame tɩ mam mitbã zãag ne maam, yãmb kɩtame tɩ mam lebg yel-beed b nifẽ. B paga maam tɩ m ka tõe n leb n yi ye.

¹⁰ Namsgã menesa mam ninã. Sẽn-Ka-Saabo, mam boonda yãmb daar fãa! Mam zẽkda m nus n teesd yãmba.

¹¹ Yãmb maanda bõn-bãn sẽn ki-bã yĩng sɩda? Rẽ yĩnga, kũum tõe n yik n pʋʋsa yãmb barka?

¹² B gomda yãmb nonglmã yell yaoogẽ sɩda? B togsda yãmb pʋ-peelmã yell kɩɩm-kulgu?

¹³ B tõe n bãnga yãmb bõn-bãnã lik pʋgẽ bɩ? Bɩ b tõe n bãnga yãmb tɩrlmã yĩmb tẽngẽ?

¹⁴ La maam, mam kelemdame n kot yãmb a Sẽn-Ka-Saab sõngre. Yibeoogo, mam be y taoor n pʋʋsdẽ.

¹⁵ Sẽn-Ka-Saabo, yaa bõe tɩ y bas-ma? Bõe yĩng tɩ y solgd y neng ne-ma?

¹⁶ Hal mam bi-bɩɩlem wakate, mam dag n tara nimbãanega, n dat n ki. Yãmb yɛɛsa maam tɩ m pɛleng yɩke.

¹⁷ Yãmb sũ-puugrã yeelga maam wa bugum, yãmb yɩka mam pɛlenga, tɩ m ka leb n tõe n gom ye.

¹⁸ Yãmb sũ-puugrã gũbgda maam daar fãa wa koom, a gũbga maam wakat-yɛnga.

¹⁹ Yãmb kɩtame tɩ mam zo-rãmbã ne m tũud-n-taasã zãag ne maam. Lebga lik bal n yaa mam tũud-n-taaga.