Yɩɩn‑sõamyã 86 - WẼNNAAM SEBRE 2014

Ned sẽn kot tɩ b zoe nebã nimbãanega

1 A Davɩɩd pʋʋsgo.

¹ A Davɩɩd pʋʋsgo. Sẽn-Ka-Saabo, kɩll-y y tʋbr n kelge, la y leok-ma! Bala, mam yaa naong soaba la nimbãan-neda.

² Gũ-y mam vɩɩmã, bala, mam yaa yãmb nin-nongre! Mam Wẽnnaam, fãag-y y tʋmtʋmdã, mam dɩka m teegrã n teeg yãmba!

³ Zu-soaba, zoe-y mam nimbãanega! Bala, mam boonda yãmb daar fãa.

⁴ Bɩ y kõ y tʋmtʋmdã sũ-noogo. Zu-soaba, mam wẽnemda m neng n get yãmba.

⁵ Zu-soaba, yãmb yaa sõmblem soaba, la y kõta sugri. Yãmb nonglmã yaa kãsenga, neb nins fãa sẽn boond yãmbã yĩnga.

⁶ Sẽn-Ka-Saabo, kɩll-y y tʋbr n kelg m pʋʋsgã. Bɩ y wʋm mam se-yõkrã!

⁷ Mam yel-pakr wakate, m boonda yãmba, la yãmb leokda maam.

⁸ Zu-soaba, wẽnnaam-dãmbã sʋka, yãmb ka tar mak-n-taag ye. La yãmb tʋʋmã ka tar to ye.

⁹ Zu-soaba, buud toay-toayã fãa yãmb sẽn naanã na n wa wõgemda yãmb taoor n waoog yãmb yʋʋrã.

¹⁰ Bala, yãmb yaa kãsenga, la y maanda bõn-bãna. Yãmb y yembr bal la Wẽnnaam.

¹¹ Sẽn-Ka-Saabo, zãms-y maam tɩ m maan yãmb daabã! Mam na n kẽna yãmb sɩdã pʋga. Kɩt-y tɩ m paam tagsg a yembr bala, sẽn yaa tɩ m zoe yãmb yʋʋrã.

¹² Mam Zu-soab a Wẽnnaam, mam na n pʋʋsa yãmb bark ne m sũur fãa! La mam na n waooga yãmb yʋʋrã wakat fãa.

¹³ Bala, yãmb nonglmã yaa kãseng mam yĩnga, la yaa yãmb n fãagd maam ne kɩɩm-kulg zĩ-zulumsã.

¹⁴ Wẽnnaam, wilg-m-mens rãmb n yik n zabd ne maam, nin-toos lagma taab n dat n sãam mam vɩɩmã. Bãmb toog ka tol n be ne yãmb ye.

¹⁵ Zu-soab a Wẽnnaam yãmb yaa nimbãan-zoeer soaba, la y yaa maan-neer soaba. Yãmb yaa sũ-maasem soaba, yãmb nonglmã yaa kãsenga, la y yaa sɩd soaba.

¹⁶ Wẽnemd-y n ges-y maam, la y zoe m nimbãanega. Kõ-y mam sẽn yaa y tʋmtʋmdã pãnga, fãag-y y tʋmtʋmd-poakã bi-ribla!

¹⁷ Maan-y maam neer tɩ yɩ bãnde, tɩ sẽn kis-b maamã yã tɩ yãnd yõk-ba! Bala, yaa yãmb a Sẽn-Ka-Saab n sõngd maam, la y belsd maam.