Yɩɩn‑sõamyã 85 - WẼNNAAM SEBRE 2014

Ned sẽn kot tɩ b kõ-a vɩ-bãane

¹ A Koore yagens yɩɩlle, yɩɩlã naab yĩnga.

² Sẽn-Ka-Saabo, yãmb wilga y nonglem ne y tẽngã, yãmb kɩtame t'a Zakoob yagensã sẽn dag n be yembdã lebg n wa.

³ Yãmb kõ y nebã sugr b kongrã yĩnga, yãmb luda b yel-wẽnã fãa.

⁴ Yãmb basa y sũ-puugrã fãa tɩ sɛ, yãmb lebg n sika y sũuri.

⁵ Wẽnnaam sẽn yaa tõnd fãagda, lebs-y tõnd d soolmẽ wã! Bas-y y sũurã sẽn yik ne tõndã tɩ sɛ!

⁶ Yãmb sũur na n yika ne tõnd n ka basdẽ? Yãmb sũ-puugrã na n yɩɩ zamaan woo zamaan yĩng bɩ?

⁷ Rẽ yĩnga, ka yãmb n tõe n leb n wa kõ tõnd vɩɩm, n kɩt tɩ yãmb nebã tõe n maan sũ-noog yãmb pʋgẽ sɩda?

⁸ Sẽn-Ka-Saabo, wilg-y y nonglmã ne tõndo, la y fãag-do!

⁹ Mam na n kelga Wẽnnaam Sẽn-Ka-Saab sẽn yeelã. Bala, b gomdame tɩ b nebã ne b nin-nongdsã tõe n paam vɩ-bãane, la tɩ b ra leb n leb b yalem-tʋʋmẽ wã ye.

¹⁰ N-yẽe! Neb nins sẽn zoet Wẽnnaamã fãagr kolgame, la bãmb ziirã na n kell n paa tõnd tẽngẽ wã.

¹¹ La nonglem ne sɩd yeka taaba, tɩ tɩrlem ne vɩ-bãan mobg taaba.

¹² Sɩdã bulame n yi tẽngã zugu, tɩ tɩrlem be saasẽ n sulg n get tẽnga.

¹³ Sẽn-Ka-Saab meng n kõt naare, la tõnd tẽn-gãongã womda biisi.

¹⁴ Tɩrlem na n lʋɩɩ bãmb taoore, n tukd sorã tɩ bãmb kẽnda.