Yɩɩn‑sõamyã 84 - WẼNNAAM SEBRE 2014

Neb sẽn dabd Wẽnnaam doogẽ yɩɩlle

¹ A Koore yagensã yɩɩlle, yɩɩlã naab yĩnga.

² Saasẽ-Pãng-Soaba, zĩig ning yãmb sẽn be wã tara yamleoogo!

³ Sẽn-Ka-Saab roogã samand ratem tara maam, hal tɩ m sesdẽ tɩ m pãng sɛ. Mam sũurã ne m yĩngã kaasd n boonda Wẽnnaam sẽn vɩ wã.

⁴ Baa liuul mengã tara a gãag zĩiga, la sɩlaall me tara a tʋk n wekd kamba, yãmb a Sẽn-Ka-Saab sẽn yaa Saasẽ-Pãng-Soaba, n yaa mam dĩm la m Wẽnnaamã tẽn-kugr sɛɛgẽ!

⁵ Bark bee sẽn be-b yãmb doogẽ wã zutu! Bãmb na n pẽga yãmb n ka bas ye.

⁶ Bark bee neb nins pãng sẽn yit yãmb nengẽ wã zutu! Bãmb tagsg yaa tɩ kẽng yãmb sɛk zĩigẽ wã.

⁷ Bãmb sã n wa n pɩʋʋgd Baka longã, b kɩtdame t'a lebg ko-budum zĩiga, sigr saagã sikda a barkã a zugu.

⁸ Bãmb pãngã paasda wakat fãa, bãmb na n yalsa Wẽnnaam taoor Sɩyõ.

⁹ Saasẽ-Pãng-Soab a Wẽnnaam, wʋm-y mam pʋʋsgã! A Zakoob Wẽnnaam, kɩll-y y tʋbr n kelg-ma!

¹⁰ Wẽnnaam sẽn yaa tõnd gãongo, ges-y-yã! Bɩ y ges y nin-tũusdgã nenga!

¹¹ Daar a ye yãmb samandẽ wã, n são rasem tusr zĩig a to. Mam yãka yam n na n pa mam Wẽnnaamã roog rigno-koakẽ, n yɩɩd m sẽn na n tɩ zĩnd nin-wẽns zakẽ.

¹² Bala, Sẽn-Ka-Saab sẽn yaa Wẽnnaamã yaa tõnd wĩntoogo, la b yaa tõnd gãongo. Sẽn-Ka-Saab n kõt neb nins sẽn kẽnd ne burkĩndã bark ne ziiri, n ka mongd-b bõn-sõng ba a yembr ye.

¹³ Saasẽ-Pãng-Soaba, bark bee ned ning sẽn teeg yãmbã zugu!