Yɩɩn‑sõamyã 81 - WẼNNAAM SEBRE 2014

Wẽnnaam neerlem Israyɛll yĩnga

¹ A Azaf yɩɩlle. Yaa yɩɩlã naab yĩnga. Yɩɩnda ne yʋʋm-teedo.

² Kils-y ne sũ-noog Wẽnnaam sẽn yaa tõnd pãngã yĩnga! Kaas-y ne sũ-noog a Zakoob Wẽnnaamã yĩnga!

³ Pʋd-y yɩɩla, la y wẽ sɩlsãgse, la y wãag ruudg n maan noogo, la y wẽ kʋnde!

⁴ Peeb-y baorg ki-paalgã pʋga, ki-peoolgã wakate, peeb-y baorg tõnd tigrã daare!

⁵ Bala, yaa noor Israyɛll nebã yĩnga, la a yaa a Zakoob Wẽnnaamã no-tũudga.

⁶ Yaa kaset b sẽn kõ a Zozɛf buudã, wakat ning b sẽn yi n zab ne Ezɩpt tẽngã. Mam wʋma bu-zẽng goam sẽn yeele:

⁷ Mam sika zɩɩbã n bas b bãgdã, la peoog fãaga b nusẽ n lʋɩ.

⁸ Fo kelma f yel-pakrã pʋga, la mam yolsa foom. Mam tũnuga sa-tãs n leok foom. Meriba koomã noore, mam maka foom n gese.

⁹ Mam nebã, kelg-y-yã! Mam dat n keooga yãmba, Israyɛll nebã, yãmb sã n dag n tõe n kelgẽ maam!

¹⁰ Bɩ y ra sak tɩ wẽn-zẽng zĩnd yãmb sʋk ye! Ra wõgemd-y wẽn-sãang taoor ye!

¹¹ Mam yaa Sẽn-Ka-Saab sẽn yaa yãmb Wẽnnaam, sẽn yiis-a yãmb Ezɩpt tẽngã. Yaag-y y noor sõama, tɩ m pids-a.

¹² La mam nebã ka kelg mam koɛɛgã ye. Israyɛll nebã zãgsa maam.

¹³ Dẽ, mam bas-b-la ne b sũ-keelmã, la bãmb tũu b meng sũyã ratem.

¹⁴ Mam nebã sã n dag n kelgdẽ maam, Israyɛll sã n dag n tũudẽ mam soayã,

¹⁵ mam dag n na n ningẽ-la b bɛɛbã yãnd wakat-yɛnga. Mam dag n na n zẽka m nug n wẽ b bɛɛbã.

¹⁶ Sẽn-Ka-Saab kisgdbã rag n na n wõgemda bãmb taoore, la bãmb rag n na n vɩɩmdẽ-la a woto wakat fãa.

¹⁷ Wẽnnaam dag n na n kõẽ-la Israyɛll kood sẽn yaa sõama wʋsgo, la m na n kɩtẽ lame tɩ b paam pĩig sɩɩd n dɩ n tɩge.