Yɩɩn‑sõamyã 80 - WẼNNAAM SEBRE 2014

Ned sẽn kot tɩ b leb n kõ Israyɛll pãnga

¹ A Azaf yɩɩlle, yɩɩlã naab yĩnga. Yaa kaset yɩɩlle, b sẽn yɩɩnd wa yɩɩll sẽn boond tɩ ‹rulg lɛlma.›

² Israyɛll pe-kɩɩma, kɩll-y y tʋbr n kelge, yãmb n tɛt a Zozɛf yagensã wa rũmsi! Yãmb zĩi serubẽ-rãmbã zugu! Puk-y y meng ne y ziirã,

³ Efrayiim ne Benzame la Manaase taoore, wa-y ne y pãngã n wa fãag-do!

⁴ Wẽnnaam, leb-y n kõ-y tõnd pãnga! Kɩt-y tɩ y nengã vẽenem yãg n bui-du, tɩ d paam fãagre!

⁵ Wẽnnaam Sẽn-Ka-Saabo, Saasẽ-Pãng-Soaba! Yãmb na n puuga y sũur ne y nebã pʋʋsg tɩ ta dabʋre?

⁶ Yãmb kɩtame tɩ b nintãm lebg b rɩɩbo, yãmb kɩtame tɩ b nintãm lebg b ko-yũudum.

⁷ Yãmb kɩtame tɩ tõnd yagsã wẽed nokoɛɛmã tõnd wɛɛngẽ, la y kɩt tɩ d lebg bɛɛb laada.

⁸ Wẽnnaam sẽn yaa Saasẽ-Pãng-Soaba, leb-y n paas-y tõnd pãnga! Kɩt-y tɩ y nengã vẽenem yãg n bui-du, tɩ d paam fãagre!

⁹ Yãmb dag n võoga reezẽ tɩɩgã n yiis Ezɩpt tẽnga, n dig bu-zẽmsã n sel-a.

¹⁰ Yãmb manega zĩig a yĩnga. A kɩɩ yẽga, n tẽ n pid tẽngã fãa.

¹¹ Yẽnda maasmã rag n buii tãmsã, t'a wilã vind sɛɛdr tɩɩs nins sẽn yaa bɛd n yɩɩdã wila.

¹² Yẽnda wilã tãoome n tãag Mediterane ko-kãsengã, t'a yagensã tão n ta Efrat kʋɩlgã.

¹³ Bõe yĩng tɩ yãmb wurg a yãgrã, tɩ so-loaadbã fãa kẽed n fãsd a bi-gĩnã?

¹⁴ Reoog yii kãgrẽ n wa sãam-a, a lebga we-rũmsã yamdo.

¹⁵ Saasẽ-Pãng-Soab a Wẽnnaam, lebg-y n wa-y-yã! Zĩnd-y y sẽn beẽ wã saasẽ n gese! Bɩ y wa n sõng reezẽ tɩ-kãngã!

¹⁶ Kogl-y bũmb ning yãmb meng nug-rɩtg sẽn selã. Kogl-y bi-ribl ning yãmb meng sẽn kõ pãngã!

¹⁷ B yõog-a-la bugum, b kɛ-a lame! Yãmb sã n tãs-ba, b menemdame.

¹⁸ Bɩ y nug zĩnd ned ning sẽn be yãmb dɩtgã zugu. Bɩ y nug zĩnd ninsaal bi-ribl ning yãmb sẽn kõ pãngã zugu.

¹⁹ Tõnd ka na n leb n wẽnemd n bas yãmb ye. Bɩ y leb n kõ-d vɩɩm, la d na n waooga yãmb yʋʋrã.

²⁰ Saasẽ-Pãng-Soab a Wẽnnaam, tall-y tõnd n leb d tẽngẽ wã! Kɩt-y tɩ y nengã vẽenem yãg n bui-du, tɩ d paam fãagre!