Yɩɩn‑sõamyã 79 - WẼNNAAM SEBRE 2014

Sũ-sãang bu-zẽmsã yĩnga

1 A Azaf yɩɩlle.

¹ A Azaf yɩɩlle. Wẽnnaam, bu-zẽmsã reega yãmb pʋɩɩrã, bãmb dẽgmã yãmb ro-sõngã, bãmb kɩtame tɩ Zeruzalɛm lebg raboogo.

² Bãmb kʋ y tʋmtʋmdbã, n kɩt tɩ b lebg bõn-yɩgdɩ rɩɩbo, la b kɩt tɩ y nebã lebg we-rũms rɩɩbo.

³ Bu-zẽmsã raaga y nebã zɩɩm wa koom, b raaga bãmb zɩɩmã n gilg Zeruzalɛm, la ned ka be n na n mum bãmb kũumã ye.

⁴ Tõnd lebga d yagsã bõn-yaandga, la sẽn gũbg-b tõndã paoogda tõndo, la b laad tõndo.

⁵ Sẽn-Ka-Saabo, yãmb sũurã na n kell n yikame tɩ ta rabʋre? Yãmb sũ-kãbrã na n dɩta wa bugum tɩ ta dabʋre?

⁶ Puug-y y sũur ne bu-zẽmsã la ne neb nins sẽn ka mi yãmbã, la y kãbg y sũur ne soolem nins sẽn ka pʋʋsd ne yãmb yʋʋrã.

⁷ Bala, bãmb kʋ a Zakoob yagensã, la b sãam b soolmã.

⁸ Da leb-y n tẽeg tõnd kongr nins sẽn loogã yell ye! Seg-y tõnd tao-tao ne nimbãan-zoeere! Bala, tõnd pãngã sɛɛ zãnga.

⁹ Wẽnnaam sẽn yaa tõnd fãagda, sõng-y-do, yãmb yʋʋrã waoogr yĩnga! Fãag-y-do, la y pek d yel-wẽnã, yãmb yʋʋrã maasem yĩnga.

¹⁰ Bõe yĩng tɩ y na n bas tɩ bu-zẽmsã wa sokdẽ: «Bãmb Wẽnnaamã bee yɛ?» Bɩ y rok y sũur ne bu-zẽmsã, b sẽn daag yãmb tʋmtʋmdbã zɩɩmã yĩnga, tɩ tõnd yã.

¹¹ Bɩ y wʋm b sẽn kẽes-b rãmb bi-bees roogã sidgri. Tall-y yãmb pãn-kãsengã n fãag b sẽn dat n kʋ-b rãmbã!

¹² Zu-soaba, kɩt-y tɩ tõnd yagsã paam paoogr ning b sẽn paoogd yãmbã naoor a yopoe!

¹³ La tõndo, tõnd yaa yãmb nebã, la piis yãmb sẽn dɩlgda, tõnd na n pʋʋsa yãmb bark wakat sẽn ka sɛta. Tõnd na n pẽga yãmb zamaan woo zamaane.