Yɩɩn‑sõamyã 78 - WẼNNAAM SEBRE 2014

Yɩɩll sẽn wilgd Wẽnnaam tʋʋmã

1 A Azaf yɩɩlle.

¹ A Azaf yɩɩlle. Mam nebã, yok-y y tʋb n kelg m zãmsgã! Kɩll-y y tʋbr n kelg mam noorã goamã!

² Mam na n yaaga m noor n togs yel-bũna, la m togs kʋdemd wẽndẽ yel-solgdse.

³ Tõnd sẽn wʋm bũmb ningã, la d sẽn mi bũmb ningã, ne tõnd yaab-rãmbã sẽn togs tõndã,

⁴ tõnd ka na n solg b yagensã bõn-kãens ye. D na n wilga d yagensã Sẽn-Ka-Saab ziirã, la d togs bãmb b pãngã, ne bõn-bãnã b sẽn maanã.

⁵ Bãmb vigla kaset bãnd a Zakoob pʋgẽ. Bãmb vigla tõog Israyɛll pʋgẽ, la b yeel tõnd yaab-rãmbã tɩ b rɩk-a n togs b yagensã.

⁶ Yaa sẽn na n yɩlẽ tɩ y yagensã sẽn watã bãng-a, tɩ b kambã sẽn na n dogã bãng-a, tɩ bãmb me wa rɩk-a n togs b kamba.

⁷ Dẽ, b na n dɩka b teegrã n teeg Wẽnnaam, la b kõn yĩm Wẽnnaam tʋʋmã ye. Bãmb na n saka Wẽnnaam noyã.

⁸ Woto, bãmb kõn maan wa b yaab-rãmbã ye. B yaab-rãmbã yɩɩ tõatb ne kɩɩsdba, b yɩɩ neb sũy sẽn yaa golemse, la bãmb dag n ka maand sɩd ne Wẽnnaam ye.

⁹ A Efrayiim yagensã sẽn dag n bob b logd n tãoodẽ wã, kong n lebg n zoee zabrã daare.

¹⁰ Bãmb ka tall Wẽnnaam kaoolã ye. Bãmb ka sak n kẽn wa sẽn zems Wẽnnaam tõogã ye.

¹¹ Bãmb yĩma Wẽnnaam bõn-bãnã, bõn-bãn nins Wẽnnaam sẽn dag n maan bãmb nifẽ wã.

¹² Wẽnnaam maana bõn-bãnd b yaab-rãmbã nifẽ, Sowan tẽngã sẽn be Ezɩpt soolmẽ wã.

¹³ Wẽnnaam welga ko-kãsengã n kɩt tɩ b pɩʋʋg n looge. Wẽnnaam kɩtame tɩ koomã yals wa lalga.

¹⁴ Wĩndga, Wẽnnaam dag n yãagda bãmb ne sawaodgo, la yʋngã tõre, b rag n yãagd-b-la ne bugum vẽenem.

¹⁵ We-raoogã pʋga, Wẽnnaam kɩtame tɩ pĩis pus tɩ koom yi, wa zĩ-zulumsẽ ko-bundum tɩ bãmb yũ n tɩge.

¹⁶ Bãmb kɩtame tɩ koom yi pĩig pʋgẽ n zoe, la b kɩt tɩ koom zoe wa kʋɩlse.

¹⁷ La b yaab-rãmbã kell n maana yel-wẽn n beeg Wẽnnaam, la b kɩɩsa Sẽn-Ka-To we-rao-koɛɛngã pʋga,

¹⁸ Bãmb maka Wẽnnaam b sũyã pʋse, n kos tɩ b rata rɩɩb sẽn tat bãmb yam.

¹⁹ Bãmb goma Wẽnnaam wẽnga, B yeelame: «Wẽnnaam tõe n yãnd rɩɩb we-raoogẽ ka n kõ tõndo?

²⁰ Yaa sɩd tɩ b wẽe pĩig tɩ koom yi, la koom sɩd zoee wʋsgo. La bãmb tõe n yãnd rɩɩb n kõ tõndo, wall b paam nemd n kõ b nebã?»

²¹ Sẽn-Ka-Saab wʋmame, la b sũurã puugame. La bugum widgame n zab ne a Zakoob yagensã. Wẽnnaam sũur yika ne Israyɛll nebã,

²² b sẽn ka tẽ bãmbã yĩnga, la b sẽn ka rɩk b teegrã n teeg Wẽnnaam fãagrã yĩnga.

²³ Sẽn-Ka-Saab goma ne sawatã sẽn be yĩngrã, la b pagsa yĩngr kʋɩlemsã,

²⁴ n kɩt tɩ mand sig bãmb zug wa saag sẽn niid tɩ bãmb rɩ, Sẽn-Ka-Saab kõ-b-la bɩle sẽn yit yĩngri.

²⁵ Bãmb ned kam fãa paama yĩngr pãens rãmb dɩɩb n dɩ, b tʋma rɩɩb tɩ bãmb dɩ n tɩge.

²⁶ Wẽnnaam kɩtame tɩ yaang sobg fug saasẽ, bãmb pãngã waa ne sobg sẽn yit goabga.

²⁷ Wẽnnaam kɩtame tɩ nemd sig bãmb zug wa wubsgu, la b kɩt tɩ liuuli sẽn yaa wʋsg wa ko-kãsengã noor bĩisrã rʋʋge.

²⁸ B kɩtame tɩ b rʋʋg b sik zĩigã tẽn-sʋka, n gilg b rotã.

²⁹ Bãmb dɩɩme hal tɩ sek-ba, Wẽnnaam kõ-b-la b sẽn dag n datã.

³⁰ La bãmb velmã sẽn ket n nan ka yi, tɩ rɩɩbã rag n ket n be b noyẽ wã,

³¹ Wẽnnaam sũurã puuga ne Israyɛll nebã, tɩ b kʋ b neb nins sẽn tar pãng n yɩɩdã. B kʋʋ bãmb kom-bɩɩsã.

³² La ne rẽ fãa, b leb n maana yel-wẽnã, n ka tẽ Wẽnnaam bõn-bãnã ye.

³³ B kɩtame tɩ b rasmã loog wa sebgo, n kɩt tɩ b yʋʋmã lebg pelen-yɩka.

³⁴ Wẽnnaam sẽn wa n dat n kʋ-bã, la b yaool n yik n baood Wẽnnaam. Bãmb wẽnemdame n baood Wẽnnaam ne b sũyã fãa.

³⁵ Bãmb tẽegame tɩ yaa Wẽnnaam n dag n yaa bãmb pĩig kugri, tɩ Wẽnnaam Sẽn-Ka-To n yaa b fãagda.

³⁶ Bãmb noorã goam pʋga, b rag n dat n zãmba Wẽnnaam. La b zɛlma wã rag n yagda zĩrẽ ne bãmba.

³⁷ Bãmb dag n ka yas kãenkãe Wẽnnaam pʋgẽ ye. La b rag n ka maand pʋ-peelem ne Wẽnnaam kaoolã ye.

³⁸ La Wẽnnaam sẽn yaa nimbãan-zoɛtã yĩnga, b kõo bãmb b yel-wẽnã sugri, n ka sãam bãmb ye. Naoor wʋsgo, bãmb tõoga b sũuri, n ka bas tɩ b sũ-puugrã fudg ye.

³⁹ Wẽnnaam tẽrame tɩ ninsaal yaa yĩng bala, t'a yaa pemsem sẽn loogd n ka leb n watẽ ye.

⁴⁰ Wẽnnaam tẽrame tɩ we-raoogã pʋga, wakat kẽere, b kɩɩsa bãmb noorã, n sãam bãmb a Wẽnnaam sũur zĩ-peen-daagẽ wã!

⁴¹ Bãmb leb n maka Wẽnnaam yɛsa, bãmb leb n baoo Israyɛll Pʋ-Peelem-Soabã noore.

⁴² Bãmb ka leb n tẽr Wẽnnaam pãngã yelle, la b rag n ka tẽr daar ning Wẽnnaam sẽn fãag bãmb bɛyã nugẽ wã yell ye.

⁴³ La b yĩma bãn nins Wẽnnaam sẽn maan Ezɩptã yelle, la b ka tẽr bõn-bãn nins Wẽnnaam sẽn maan Sowan tẽngã ye.

⁴⁴ Wẽnnaam teka Nill kʋɩlsã koom tɩ lebg zɩɩm, tɩ b ka leb n tõe n yũ ye.

⁴⁵ Wẽnnaam tʋma kɛɛda tɩ b wãb Ezɩpt nebã, la b tʋm loms tɩ b sãam-ba.

⁴⁶ Wẽnnaam kɩtame tɩ sʋy rɩ b koodã, la b bas tɩ kalwaar sãam b sẽn tʋm n paamã.

⁴⁷ Wẽnnaam kɩtame tɩ sapɩlem dʋʋg n sãam b reezẽ tɩɩs pʋtã, la b kɩt tɩ wao-kãseng sãam b wom-seesã.

⁴⁸ Wẽnnaam basame tɩ sapɩlmã kʋ b rũmsã, n kɩt tɩ sa-tãs kʋ b rũm-kʋʋngã.

⁴⁹ Wẽnnaam kɩtame tɩ b sũ-yikrã, ne b sũ-puugrã, la b sũ-kãbrã, ne b sũ-sãangã rɩ Ezɩpt nebã. Bãmb tʋma b malegs tɩ b wa ne tood bãmb zutu.

⁵⁰ Bãmb basame tɩ b sũ-puugrã maan a tʋʋmde, Wẽnnaam ka bas-b n ka kʋ ye. B basame tɩ bã-loangdg sãam b vɩɩmã.

⁵¹ Bãmb kʋʋ Ezɩpt kom-dẽemsã fãa, kom-dẽems nins sẽn yaa yir fãa pãng sɩngrã, a Sam yagensã sʋkã.

⁵² Bãmb kɩtame tɩ nebã yi n loog wa piisi. Wẽnnaam tɛɛ b nebã we-raoogã pʋg wa rũm-kʋʋngo.

⁵³ Wẽnnaam tɛɛ bãmb ne laafɩ, tɩ rabeem ka yõk-b ye. La ko-kãsengã rɩɩ bãmb bɛɛbã.

⁵⁴ Wẽnnaam tall-b lame n taas tẽn-sõngẽ wã. B taas-b-la tãng ning bãmb sẽn dag n deeg ne b pãngã.

⁵⁵ Wẽnnaam diga bu-zẽmsã bãmb taoore, n pʋɩ tẽngã n kõ bãmb tɩ b sooge, n kɩt tɩ Israyɛll buudã reeg bu-zẽmsã fu-rot n kẽ.

⁵⁶ Bãmb maka Wẽnnaam Sẽn-Ka-To, n kɩɩs b noorã, n ka sak bãmb tõodã ye.

⁵⁷ Bãmb zãaga ne Wẽnnaam n lebg zãmb dãmb wa b yaab-rãmbã, bãmb bʋdga wa tãp sẽn fisgi.

⁵⁸ Bãmb maana maoong kʋʋb zĩis n kɩt tɩ Wẽnnaam sũurã puugi, la b maan bõn-naands n nek wẽnnaam sũ-kiirã.

⁵⁹ Wẽnnaam wʋmame tɩ b sũurã yiki, la bãmb basa Israyɛll zãng fasɩ.

⁶⁰ Bãmb basa Sɩlo sɛk roogã, fu-roog ning bãmb sẽn dag n be a pʋg ninsaalb sʋkã.

⁶¹ Bãmb basame tɩ b pãngã kẽ yembdo, tɩ bɛyã yõk-b n deeg b ziirã.

⁶² B basame tɩ b kʋ b nebã ne zabr sʋʋga. Bãmb sũurã puuga ne b nebã sẽn yaa b rẽndã.

⁶³ Bugum dɩɩ bãmb kom-bɩɩsã, la b kom-pugli wã ka paam pẽgr ye.

⁶⁴ Bãmb maan-kʋʋdbã paa tãpẽ, la b pʋg-kõapã ka yãb ye.

⁶⁵ Zu-soabã neka wa ned sẽn dag n gõe. Bãmb neka wa gãndaoog sẽn tɩg rãam.

⁶⁶ Bãmb gilga bɛɛbã poorẽ n wẽ-ba, n ning-b yãnd wakat sẽn kõn sa yĩnga.

⁶⁷ Baoosgo, Wẽnnaam basa a Zozɛf roogã. Bãmb ka yãk Efrayiim buudã ye.

⁶⁸ Bãmb yãka Zʋʋda buudã, yaa Sɩyõ tãngã bãmb sẽn nongã.

⁶⁹ B mee b zĩ-sõngã n zẽk wa saasẽ, b me-a-la wa tẽngã b sẽn yẽbg wakat fãa yĩngã.

⁷⁰ Wẽnnaam yãka b tʋmtʋmd a Davɩɩde. Bãmb yãk-a-la piis yãg zĩigẽ.

⁷¹ Bãmb yãka a Davɩɩd a sẽn wa n pʋgd a piis n gilgdẽ wã, n na n kɩt t'a rɩlg a Zakoob yagensã sẽn yaa bãmb nebã, ne Israyɛll sẽn yaa bãmb pʋɩɩrã.

⁷² La a Davɩɩd dɩlga bãmb ne burkĩndi, la a tɛ bãmb ne bãngre.