Yɩɩn‑sõamyã 77 - WẼNNAAM SEBRE 2014

Ned sẽn boond Wẽnnaam n kot sõngre

¹ A Azaf yɩɩlle, a Yedutun sẽn yɩɩle. Yɩɩlã naab yĩnga.

² Mam zẽkda m koɛɛg n kelemd n boond Wẽnnaam. Mam kelemdame n boond Wẽnnaam, la bãmb kelgda maam.

³ Mam yel-pakr wakate, mam baooda Zu-soabã. Yʋngo, mam zẽka m nus n tees bãmb n ka yɛɛdẽ ye. Mam zãgsda belsgo.

⁴ Mam sã n tẽeg Wẽnnaam yelle, mam sidgdame. Mam sã n tagse, mam sũurã sãamdame.

⁵ Yãmb kɩtame tɩ gõeem ka be m ninẽ ye. Mam yamã bondgame tɩ m ka tar m sẽn na n yɛɛlg ye.

⁶ Mam tagsa kʋdem-wẽndẽ yelle, m tagsa yʋʋm sẽn loog hal daar zarã yelle.

⁷ Mam ket n tẽra m yʋng yɩɩllã pʋgẽ. Mam tagsda m sũurẽ, n baood n wʋm a võore.

⁸ Rẽ yĩnga, Sẽn-Ka-Saab na n bas-d-la wakat fãa la? Bãmb ka na n tol n leb n bao d zĩiga?

⁹ Bãmb nonglmã ta a tɛk la? Bãmb sẽn yeelã ka na n leb n zĩnd zamaan woo zamaan la?

¹⁰ Wẽnnaam yĩma b nimbãan-zoeerã yell la? Dẽ yĩnga, bãmb sũ-yikrã kɩtame tɩ b nebã nimbãaneg ka leb n tar bãmb la?

¹¹ Mam yetame: Bũmb ning sẽn namsd maam, yaa tɩ Sẽn-Ka-To nug-rɩtgã ka leb n maand wa pĩndã ye.

¹² Mam na n tẽega Sẽn-Ka-Saab tʋʋmã yelle, mam na n leb n tẽega bõn-bãn nins yãmb sẽn maan hal kʋdem-wẽndẽ wã yelle.

¹³ Mam na n goma yãmb tʋʋmdã fãa yelle. Mam na n tagsa y tʋʋm-kãsemsã yelle.

¹⁴ Wẽnnaam, yãmb sorã yaa sõmblem sore. Wẽn-bʋg n yaa kãseng wa yãmb a Wẽnnaam?

¹⁵ Yaa yãmb la Wẽnnaam sẽn maand bõn-bãnã. Yãmb kɩtame tɩ nebã bãng yãmb pãngã.

¹⁶ Yãmb fãaga y nebã ne y nugã pãnga. Y fãaga a Zakoob ne a Zozɛf yagensã.

¹⁷ Koomã yãnda yãmb a Wẽnnaam! Koomã yãnda yãmb n yik n dãmbdẽ. N-yẽe! Ko-zulumsã gudgame.

¹⁸ Sawatã kiiga ko-bɛda, Yĩngr sa-tãsã guglmame, N-yẽe! Yãmb pɛɛmã pɩʋʋmda zĩig fãa.

¹⁹ Yãmb sa-kɛlengã koɛɛg yita sob-kãseng pʋgẽ. Sa-yãgbã vẽneem buii dũniyã gilli. La tẽn-gãongã rigimdame n miime.

²⁰ Yãmb sorã ra bee ko-kãsengã pʋga, yãmb so-bukã bee ko-zulumsã pʋse, la ned ka yã yãmb nao-bogd ye.

²¹ Yãmb dɩka a Moyiis ne a Aarõ tɩ b yɩ wa pe-kɩɩmb n tɛ yãmb nebã.