Yɩɩn‑sõamyã 75 - WẼNNAAM SEBRE 2014

Wẽnnaam n zẽkd nin-tɩrse

¹ A Azaf yɩɩlle. Yɩɩnd n yetame: Da sãam ye. Yaa yɩɩlã naab yĩnga.

² Wẽnnaam, tõnd na n pẽga yãmba. Bala, yãmb yʋʋrã n pẽ tõndo. Nebã moonda yãmb tʋʋm-kãsemsã.

³ Mam sẽn na n yãk wakat ningã, mam na n kaoo bʋʋdã ne tɩrlem.

⁴ Dũniyã na n yẽnega ne a nebã fãa. Yaa maam n vigl dũniyã a zĩigẽ.

⁵ Mam yeta pẽg-m-mens rãmbã yaa: Ra pẽg-y y mens ye! La m yet nin-toosã yaa: Ra gʋng-y kang ye!

⁶ Da gʋng-y kang tɩ loog ye, la y ra keng y sũur n gom wilg-m-men-goam ye.

⁷ Waoogr ka yit yaanga wall taoor ye, la a ka yit we-raoogẽ me ye.

⁸ Yaa Wẽnnaam n kaood bʋʋdo. Bãmb n sikd kẽere, la b zẽkd kẽere.

⁹ Bala, Sẽn-Ka-Saab zãada wamd b nugẽ, tɩ dɩvẽ sẽn mik be a pʋgẽ, tɩ b na n kɩrgdẽ, tɩ dũniyã nin-wẽnsã fãa na n yũ-a n tãag wamdã sɛɛga.

¹⁰ La ne maam, mam na n togsa bõn-kãng wakat fãa, mam na n yɩɩl n pẽga a Zakoob Wẽnnaamã.

¹¹ Mam na n sãama nin-wẽnsã fãa wilg-m-mengã. La nin-tɩrg na n paama zu-zẽkre.