Yɩɩn‑sõamyã 74 - WẼNNAAM SEBRE 2014

Ned sẽn kot tɩ b kao bɛɛbã bʋʋdo

1 A Azaf yɩɩlle.

¹ A Azaf yɩɩlle. Wẽnnaam, bõe yĩng tɩ y basd tõnd daar fãa? Bõe yĩng tɩ y puugd y sũuri? Bõe yĩng tɩ y puugd y sũur ne y piisã yãmb sẽn dɩlgdã?

² Tẽeg-y y nebã yãmb sẽn da hal kʋdem-wẽndẽ n fãag-bã yelle. Bu-kãng yaa yãmb buudu, la y pʋɩɩre! Tẽeg-y Sɩyõ tãngã sẽn yaa zĩig ning yãmb sẽn dag n be wã yelle.

³ Zẽk-y y naoor n kẽng rabood sẽn ka tɛkã zĩigẽ! Bɛyã sãama bũmb nins fãa sẽn be zĩ-sõngã pʋgẽ wã.

⁴ Yãmb zabd-n-taasã meng kelemda zĩig ning yãmb sẽn dag n segd tõndã. Bãmb ninga b mens bãnã beenẽ tɩ yɩ bãnde.

⁵ B rag n wẽnda wa neb sẽn yi ne lay n kẽ weoog n na n kɛ tɩɩse.

⁶ Moasã, bãmb pãba a bõn-naandɩ wã fãa ne lay la zãy n wã.

⁷ Bãmb yõoga yãmb sɛk-zĩigã bugum. Bãmb lub-a-la tẽng n dẽgem zĩig ning yãmb yʋʋrã sẽn be wã.

⁸ Bãmb dag n yeta b sũurẽ: «D menes-b wakat-yɛnga!» Bãmb yõoga Wẽnnaam sɛk zĩisã fãa sẽn dag n be tẽngã pʋgẽ wã bugum.

⁹ Tõnd ka leb n yãt bõn-bãn ye. Wẽnnaam no-rɛɛs ka leb n beẽ ye, la tõnd ned ba a ye ka mi rẽ sẽn na n kaoos n ta daar ning ye.

¹⁰ Wẽnnaam, bɛyã na n tara tʋy tɩ ta dabʋre? Bɛyã na n paoogda yãmb yʋʋrã n ka basdẽ?

¹¹ Bõe yĩng tɩ y kalemd y nus n sĩnd n get n ka maand bũmbu? Tẽeg-y y nug-rɩtgã n sãam-ba!

¹² Wẽnnaam yaa mam dĩm hal kʋdem-wẽndẽ. Bãmb n wat ne tõogr tẽngã pʋgẽ.

¹³ Yãmb n welg ko-kãsengã ne y pãngã. Yãmb n bõgs piryãndã sẽn be koomã pʋgẽ wã zutu.

¹⁴ Yãmb n beds parwẽndã zugu, n kɩt t'a lebg we-rũms rɩɩbo.

¹⁵ Yãmb n kɩt tɩ ko-bunds ne kʋɩls pus n yi. Yãmb n kɩt tɩ kʋɩls nins koom sẽn ka sɛtã kʋɩ.

¹⁶ Wĩndg ne yʋng yaa yãmb n so. Yãmb n kɩt tɩ kiuugã ne wĩntoogã beẽ.

¹⁷ Yãmb n yẽbg dũniyã todsã fãa. Yãmb n kɩt tɩ sẽoog ne sɩpaolg beẽ.

¹⁸ Tẽeg-y bũmb a yembre: Bɛyã paoogda Sẽn-Ka-Saabo, buud sẽn ka tar yam n paoogd yãmb yʋʋrã!

¹⁹ Da rɩk-y y wallã vɩɩm n kõ rũms ye. Da tol y n yĩm-y y nimbãan-nebã yell ye.

²⁰ Geelg-y y kaoolã, bala, tẽngã zĩis nins sẽn yaa libsgã, yaa wẽnem maneg n pid beenẽ.

²¹ Da bas-y tɩ b sẽn namsd-a soabã rɩ yãnd ye! Bɩ nimbãan-ned ne naong soab pẽg yãmb yʋʋrã!

²² Wẽnnaam, bɩ y yik n zab y meng zabre! Tẽeg-y yalembã sẽn paoogd yãmb n ka basdẽ wã yelle.

²³ Da yĩm-y y zabd-n-taasã kaasgã ye. Da yĩm-y sẽn zabd-b ne yãmbã bʋrgã sẽn zẽkdã ye!