Yɩɩn‑sõamyã 73 - WẼNNAAM SEBRE 2014

Nin-wẽng baoosgo

1 A Azaf yɩɩlle.

¹ A Azaf yɩɩlle. N-yẽe! Wẽnnaam yaa sõama Israyɛll yĩnga, b yaa sõama pʋ-peelem dãmbã yĩnga.

² La maam, kellẽ-la bilf tɩ m lʋɩẽ, bilf bal n kaẽ, tɩ m salg n lʋɩẽ.

³ Bala, mam dag n maanda sũ-kiir ne wuk-m-mens rãmbã, mam sẽn ne nin-wẽnsã sẽn tɩlgdã yĩnga.

⁴ Hal tɩ tãag b kũum, yɩɩr ka namsd bãmb ye. Bãmb nobame tɩ b yĩnsã pɩnda.

⁵ Bãmb ka namsd wa neb a taabã ye. Bãmb ka paamd sɩbgr wa ninsaalb a taabã ye.

⁶ Rẽ n kɩte, tɩ wuk-m-mengã yaa b nag-teoogo, tɩ wẽngã maaneg yaa b fuugu.

⁷ Bãmb nobame n pidi, la bãmb sũyã tags-wẽnsã yaa n looga nugu.

⁸ Bãmb laada neb a taaba, n gomd ne nen-keglem. B wukda b mense, n gomd b sẽn na n maan neb a taab pãng to-to.

⁹ Bãmb tol n yaagda b noy n tʋʋd Wẽnnaam, la b zelemdã saagda dũniyã fãa.

¹⁰ Rẽ kɩtame tɩ nebã wẽnemd n get-ba. B kelgda b goamã n yũud-a wa koom.

¹¹ La b yetame: Wẽnnaam na n maana a wãn n bãnge? Rẽ yĩnga, Sẽn-Ka-To tara bãngr la?

¹² Ad nin-wẽnsã sẽn yaa to-to: Bãmb vɩɩme n ka yɛɛsd bũmb ye, tɩ b paoongã tar fɩɩgr bala.

¹³ Dẽnd mam sẽn yɩlg m mengã yaa zaalem, la mam sẽn nudg m nus tɩ m ka tar yellã yaa zaalem bala.

¹⁴ Daar fãa, mam paamda toogo, yibeoog fãa, mam paamda sɩbgre.

¹⁵ Mam sã n dag n yeelẽ: «Mam me na n goma wa bãmba,» ade, mam dag n na n zãmbẽ-la kambã.

¹⁶ Dẽ, mam tagsame n na n wʋm bõn-kãng võore, la yɩɩ toog ne maam.

¹⁷ Yaa mam sẽn wa n ta Wẽnnaam do-sõngẽ wã, la m bãng nin-wẽng baoosg sẽn na n yɩ a soaba.

¹⁸ N-yẽe! Yãmb ningda bãmb soay sẽn yaa sals zutu, yãmb tusd-b lame n lubd sãoong pʋga.

¹⁹ La nin-wẽnsã sãama nif kamsg pʋgẽ, bãmb taa b tɛka, rabeemã looga ne-ba!

²⁰ Zu-soaba, yãmb sã n yiki, y na n menes-b lame, tɩ yaa wa ned sẽn yik a gãagẽ n ka leb n nand a zãmsd ye.

²¹ Mam sẽn dag n be sũ-toog pʋgã, hal tɩ mam sũurã sãam wʋsgã,

²² mam dag n yaa yalma, n ka mi baa fɩ ye. Mam dag n yaa wa rũng bal yãmb taoore.

²³ Baoosg zãnga, mam ket n bee ne yãmba, bala yãmb n zãad mam nugu.

²⁴ Yãmb saglgã tɛta maam, yãmb na n deega maam ne waoogre.

²⁵ Mam tara ãnda saasẽ? Mam ka maand sũ-noog dũniyã zugu, sã n ka yãmb pʋgẽ ye.

²⁶ Mam yĩngã ne m sũurã yɛɛme, la Wẽnnaam n kengd mam pɛlg wakat fãa, la bãmb yaa mam pʋɩɩre.

²⁷ Bala, sẽn zãagd-b b mens ne yãmbã na n sãamame. Yãmb menesda neb nins fãa sẽn basd yãmbã.

²⁸ Ne maam, tɩ pa Wẽnnaam sɛɛgẽ n tar yõodo. Mam yãka Zu-soab a Wẽnnaam tɩ b yaa mam soondg zĩiga. Tɩ mam tõe n moon yãmb tʋʋmã fãa.