Yɩɩn‑sõamyã 72 - WẼNNAAM SEBRE 2014

Rĩm-tɩrg naam

1 A Salmo yɩɩlle.

¹ A Salmo yɩɩlle. Wẽnnaam, kõ-y rĩmã yam t'a kao bʋʋd tɩrga, la y kõ rĩmã kamb y tɩrlmã!

² Woto, a na n kao y nebã bʋʋd ne tɩrlem, la a kao nimbãan-nebã bʋʋd tɩ zemse.

³ Tãmsã na n waa ne vɩ-bãan y nebã yĩnga, tɩ kunkubã wa ne tɩrlem.

⁴ Yẽnda na n kao naong rãmbã bʋʋd tɩ zemse, Yẽnda na n fãaga nimbãan-nedã kamba, la a na n sãama sẽn maand-a nebã pãngã.

⁵ Wĩndgã sã n ket n pukdẽ, tɩ kiuugã ket n kõt a vẽenem, nebã na n zoee yãmb dabeem zamaan woo zamaane.

⁶ Bɩ rĩmã naamã yɩ wa saag sẽn niid mo-toabeng zugu, la wa sa-kẽeng sẽn niid tɩ tẽn-gãongã mogemde.

⁷ Rĩmã naam wakate, tɩrlem na n tobame, la na n yɩɩ vɩ-bãan woo vɩ-bãane, n tãag dũniyã sɛɛbo.

⁸ Rĩmã soolem na n sɩnga ko-kãsengã, n tɩ tãag ko-kãseng a yembrã, ne kʋɩl-kãsengã n tɩ tãag dũniyã tɛka.

⁹ La we-raoogẽ nebã na n yĩgimda rĩmã taoore, la bãmb bɛɛbã na n moga tom.

¹⁰ Tarsɩɩs tẽngã ne tẽms nins koom sẽn gũbgã rĩm-dãmbã, la Seba ne Seba tẽms rĩm-dãmbã na n talla kũun n wa kõ yẽnda.

¹¹ Rĩm-dãmbã fãa na n wõgemda bãmb taoore, la bu-zẽmsã fãa na n saka bãmba.

¹² Bãmb na n fãaga nimbãan-ned sẽn kelemd n kot sõngre, la naong soab sẽn ka tar sõangda.

¹³ Bãmb na n zoee pãn-komsem soab ne nimbãan-ned nimbãanega. Bãmb na n fãaga nimbãan-nebã vɩɩm.

¹⁴ Rĩmã na n fãag-b-la ne namsgo, la ne wẽnga, bãmb ka na n sak tɩ b raag b zɩɩm ye.

¹⁵ Bɩ rĩmã vɩɩmd n kaoose, la bɩ nebã kõ bãmb Seba tẽng sãnem! Bɩ b pʋʋs rĩmã yĩng n da bas ye. Bɩ b ning rĩmã bark wakat fãa n da bas ye.

¹⁶ Tẽngã na n pida ne bɩle wʋsgo, la koodã na n miimda tãmsã zut wa Libã tãngã zug tɩɩsã sẽn miimdã. Tẽngã nebã na n fɩɩga wa moogã sẽn be weoogẽ wã.

¹⁷ Rĩmã yʋʋr na n paa wakat fãa, Wĩndgã sã n ket n pukdẽ, bãmb yʋʋrã na n paa wakat fãa. Nebã na n ninga taab bark ne bãmb yʋʋre, la bu-zẽmsã fãa na n yeelame tɩ rĩmã tara barka.

¹⁸ Bɩ Wẽnnaam Sẽn-Ka-Saab sẽn yaa Israyɛll Wẽnnaamã paam pẽgre! Bãmb b yembr bal n maand bõn-bãna!

¹⁹ Bɩ Sẽn-Ka-Saab yʋʋrã sẽn tar ziirã paam pẽgr wakat sẽn ka sɛta! Bɩ bãmb ziirã pid dũniyã gilli! Ãmina! Ãmina!

²⁰ Woto n yaa a Izayi biig a Davɩɩd pʋʋsgã baoosgo.